EN EL MOMENTO EL MAS TERRIBLE DE
LAS EPROVES KE TOUVO, AVRAHAM, MUESTRO PATRIARKA, DICHO : « AMONAI
YIRHE. » (Dio va proveer) (Genèse chap. 22, v. 7-8). DIZIENDO ANSI
AVRAHAM TRASFORMO L’EPROVE IN ORASSION I KONFIENSA EN DIO. – L’ IMPORTANZA DE LA
ORASSION.
Por el Grand Rabbino Moïse M. Levy.
Ultimamente
estando in kompaniya de djente si diskoutio souvri la importanza de la
lingua.
Los ounous
preferan el ingles, otros preferan el frances ou los ke avlan la lingua italiana
dizen ki es la mas kantante. Los ke
konossen el espagnol si vantan por ser la lingua la mas
doulsi.
A la dimanda
kualo penso ? Diche parami nou ay ouna lingua mas ermoza di ouna otra. La lingua es oun medio ke mos sierve a
kommounikar kon la djente. Dipende
di lou ki dizen de buenou ou di negro.
Pero, parami
la lingua la mas ermoza di todas las linguas es akeya ke mos ayouda en muestras
orassiones. Eya mos asserka de
Dio. Sea mizmo la lingua la mas
sempli ; es akeya ke sierve a el ombre a traduizir sous sentimientos
delantre la souverana maestad de Dio.
Eya reveya toda sou valor a mis ojos komo a mis sentimientos. Si, keridos ermanos, la mas ermoza de
todas las linguas, es akeya ke mos permette de avrir muestro korasson en la
orassion.
Porke la
lingua de la orassion es el akto souverano ke el esprito houmano deve
akomplir.
Parami, no
ay spektakolo mas esmoviente
ke la vista de oun ombre ke se inklina delantre de la Ehal Hakodech, en
orassion.
Konsiderando
ke Israël es depozitario i guardian infaïble de la revelassion divina, en estos
dias el rabbino distribouira a sou kommounidad e spesialmente a la mueva
generassion (garante de l’avenir
del Djoudaïsmo i dil puevlo di Israël en general), los trezoros de las verdades
selestes, di la divina maestad evokadas en la Thorah i lous Profetas, komo lo
izieron sentir lous iloustres poetas komo Yehouda Halevi, Chelomo Ibn Gevirol i
otros donde los poemas fueron introduizidos en muestras orassiones, koza ke
rinforsera muestra fey i konfiensa en Dio, muestro Kreador, komo Avraham Avinou,
mous dio el egzempio. En el momento el mas douro di las eproves ke
l’Eternelo lo aprovo, el dicho : “HACHEM YIRHE.” (EL DIO
PROVEERA).
En los momentos los mas penibles
de la vida, ay ke ambezar este
savio i maraviozo egzempio de Avraham Avinou, saver endourar i soffrir en trasformando la souffrienza en
orassion : en lougar de revoltarmos kontro los dissenes ineksplikavles i
insondavles de los planos de Dio.
Es inutile
di revoltarmos kontro Dio. Mi padre, komo mi eshuegro (alehem hachalom), kuando
si topavan soffriendo bacho el pezo de las diffikoltades i eproves de la vida,
dezian : “KAPARA DI AVONOT VEIRAHEM
HACHEM“, kejendo dezir : “SEAN MUESTRAS SOFFORIENSAS KOMO OUN SAKRIFISSIO A DIO
I EL TENGA PIADAD DE MOZOTROS“.
Ansi kuantos
de los proves Djoudios de la isla de Rodis, ke paressian impossible souportar
sous mizerias, se iyan a la Kehila,
por ekspozar sous sitouassion a l’Eternelo i al salir de la Kehila ,
ienos de fey i de konfiensa,
dizian : « EL DIO TERNA TAMBIEN KARGO DE MOZOTROS »,
ansi trasformavan sous penas in orassion i diziyan komo Avraham
avinou : « HACHEM YIRHE ».
En estos
dias los mas aousteros e solemnes del annio rekonossemos ke Dio es muestro
Kreador i Kreador de todo el moundo i ki todo dipende de El, di Sou buena
volontad.
El egzije de
mozotros Sous kreados el respekto de los kommandamientos divinous kon
rekonosensia.
Siendo la
orassion mous eleva asta Sou trono.
En estos dias de Roch Achana i Kippour, dechamos todos los problemas ke mos
tirannizan annio intero por asserkarmos de Dio por protejarmos bacho las alas de
la mizerikordia divina, porke El perdone muestros pekados i mous akorde Sou
bendission, Sou aioudo i la konsolassion a las doloris ke pezan en muestro
korasson, por aver mankado a muestros doveres verso El.
Ansi empessamos muestra
konfession en poubliko i alta bos : « HAAA…TANOU LE FANEHA RAAHEM
ALENOU… »
Io orassiono porke es ouna
grande onor para mi, porke topo ke la orassion es oun manadero de energiya donde
el ombre tiene menester. Ay oun
proverbio ke dize : « ONDE NON ENTRA EL SOL, ENTRA EL
MEDIKO », kijendo dizir ke por
estar bien, el kuerpo tiene menester
Ala tierra
bouyente por la fortaleza del sol, el rossio trae la freskoura bienfezente. De mizmo, muestra alma defayente es
fortifiyada por la orassion.
Entrar en
kontakto kon mi Dio, nou ay koza mas noble i mas santa.
Io estouve
en kontakto kon differentes reyes i differentes prezidentes de estados. Todo es nada en frente el kontakto i la
emossion ke siento, orassionando. No se detener mis
lagrimas i siertas vezis mis souyosous. Io orassiono non solo porke es ouna
grande onor para mi. Io orassiono
porke topo la fuersa de bevir i el rikonforto kuando mi siento estretcho ou
triste al sentir ouna koza dezagreable.
Al
asserkarsen lous dias solemnes de Roch Achana i di Kippour, io rogo al Dio de
avrir los korassones di mis keridos koreligionarios a las orassiones kon
devossion i fervor por ser agradessidos i meresser Sous paternelas bendissiones
i eskritos en livros de saloud, de vida, de pas i de amor. CHANA TOVA I TIZKOU LECHANIM
RABOT. Amen