La leyenda rakonta ke kuando Aleksander el Masedano konkero a la Tierra Santa, se avia komportado kon muncho rezervo verso los djudios i sus relijion. Kon la viktoria de este grande gerreador sovre la Persia, todos los payises ke eran basho la dominasion persana fueron subyugados al vensedor. Entre eyos, la Djudea ke avia apartenido a la Persia durante kuaji doz siglos. En el empesijo, los djudios no eran p rontos a violar sus sermon de fidelitad al sovereno persano. Ma kuando Aleksander se presento kon su armada mayestuosa delantre de Yerushalayim, los djudios se rendieron kuento ke era sin dingun provecho de aprovar la mas chika rezistensia. Ansi, enbiaron sus emisarios para ekspresar sus sumision al muevo sovereno. Asigun la leyenda, el Pretro Grande Yadua, akompaniado de munchos otros pretros, todos kon sus vistidos de seremonia, i suividos por los notables del payis, salieron de la sivdad, para resivir a Aleksander.
Kuando Aleksander los apersivio, abasho de su kavayo i se inklino kon respekto delantre del Pretro Grande ke estava en la kavesa de esta delegasion. A la demanda de uno de sus jenerales, por kualo se avia inklinado, el Monarko respondio:
"Kuando estava en Masedonia i pensava a konkistar la Asia, me sonyi de una persona ke paresia muncho a este Pretro.Esta persona me predigo ke mi tentativa se iva terminar kon el triomfo i kon la fama. Agora, viendo al Pretro Grande djudio, me akodri de mi suenyo i me inklini, no delantre del, ma, del Dio ke lo izo su Pretro.
La leyenda reporta ke Aleksander despues ke entro a Yerushalayim, vjito al Templo i ofrisio un olokosto al Dio ebreo.
En aneksando la Djudea a su teritorio, Aleksander Magno respekto el uzo ke avia egzistido durante la dominasion persana, i no suprimo la libertad de relijion i de administrasion interna de su puevlo.
Kon esta konkesta, todos los puevlos sumetidos al Estado grego empesaron a pozar una estatua de Aleksander en sus templos. Portanto, los djudios no puedian konformarsen a esto porke sus relijion prohibiya de adorar figuras. En esto, los djudios ekspresaron sus respekto al deredor masedoniano en metiendo el nombre Aleksander a sus ijos ke avian nasido durante este anio. Aleksander, muy satisfeto de esto, akordo a los djudios otros privilejios. Los djudios fueron eparniados de pagar los impuestos teritoriales durante el mismo anio de Shmita, kuando no se uza de kultivar la tierra, i dispenso a los soldados djudios de su armada de lavorar el dia de Shabat .
Aleksander unifio la Djudea kon la provinsia de la Siria del Sude i nomo a Andromako en Samaria, entanto ke su deredor. Los samaritanos en konflikto kon los ebreos se revoltaron kontra Andromako i lo mataron. En esto, Aleksander kastigo a los revoltados en egzilandolos de la Samaria, todo en regalando una partida de la Samaria a los ebreos.
Istorikamente los atadijos de Aleksader kon el puevlo djudio turo un muy kurto tiempo, i fueron limitados a la perioda de su kampania militara en Palestina. Portanto, kon la konkesta de la Tierra Santa por Aleksander en 322 AE, los djudios empesaron a familiarizarsen kon la kultura elena no solo en Palestina i la Siria, ma i en Aleksandria, ande se developo una signifikante komunitad djudia elenizada.
Esto fue probablamente a la baza del intereso sovre Aleksander, i munchas leyendas sovre su personaje fueron integrados al folklor djudio. El eskojo de Aleksander entanto ke un personaje leyendario, mas o menos favorable, parese ser un kontrasto kon el fakto ke Aleksander fue uno de los mas grandes konkestadores de la istoria.
Dos partikularidades kontribueron probablamente a la popularidad de Aleksander. Al kontrario de los otros konkestaderos, Aleksander se avia komportado de una manera umana i tolerante verso los puevlos ke avia asujetido. No era solo un jeni militario ke sus viktorias ekstraordinarias avian provokado la admirasion de todos, ma, era i un filozofo ke fue edukado personalmente por Aristo, por ken los djudios sintiyan un grande respekto.
Aunke estas leyendas fueron en sus orijnen gregas, durante sus proseso de integrasion al folklor djudio, estas leyendas akeraron un karakter diferente konformamente a la konsepsion didaktika del folklor djudio. La importansa akordada a la superioridad militara i a sus alkansos en la leyenda grega fue remplasada por la konsepsion de la vanidad de la gerra i del poder, en relatando en mismo tiempo la hohma de otros puevlos i sivilizasiones.
* * *
Abasho es reportada una de estas leyendas:
El Ojo
Despues ke avia konkerado el mundo, Aleksander se estava aboltando a su kaza en Masedonia. En su kamino arivo a un rio. Abasho de su kavayo, kito unos kuantos pishkados salados de su bolsa, i se metyo a lavarlos en la agua del rio. En esto, una koza kurioza afito: djusto kuando tokaron a la agua, los pishkados se arebivieron.
Entero enkantado de esto, Aleksander se echo a la agua i se metio i el a lavarse. Echo un grito de alegriya:
"Agora entendi ke la agua de este rio esta viniendo del Paradiso! Me va lavar las karas kon su agua i va segir a este rio. Por seguro ke me yevara al Paradiso."
Apenas ke eskapo de lavarse su kara, sus ojos empesaron a briyar komo estreas, rayos de luz empesaron a salir de su kara, i se incho de fuersas. Nunka antes no se avia sintido tan alegre. Pishin se aserko de las Puertas del Paradiso. Ma, las topo serradas.
"Avrivos, avrivos Puertas!" empeso a gritar. "Aleksander kere entrar!"
En esto una boz le respondio:
"Estas son las Puertas del Dio Bendicho. Solo deshan entrar a la djente piadosa."
Aleksander se rendiendo kuento ke las Puertas no se ivan avrir para ke lo deshen entrar, empeso a implorar:
"Dame a lo manko un siman, Puertas de los Sielos, para pueder provar ke estuve aki."
Ensupito, las Puertas del Paradiso se kalmaron i se avrieron por un punto. Un ojo umano se arezvalo verso Aleksander. Enkantado entero, Aleksander lo alevanto d'enbasho i lo metio a su bolsa. Despues, se metio de muevo en kamino por Masedonia.
Apenas ke arivo a su palasio, arekojo a todos los savios, les konto todo lo ke le avia afitado, i demando:
"Kualo es la signifikasion de esta koza estrenya ke resivi?"
Uno de los savios le respondio:
"Rey Alto, mete a este ojo en un pezo i aprova de pezarlo."
"Para kualo?" demando Aleksander. "Puedo dizirte de agora ke peza muy poko."
"Aprova lo ke te dishe!" respondio de muevo el savio. "En la otra tasa del pezo mete una moneda de oro, i ansi vamos a saver el kual de estos doz es mas pezgado."
Aleksander izo lo ke le fue demandado. I kon grande enkanto konstato ke el ojo esta muncho mas pezgado. Metio en la tasa una otra moneda de oro, i de muevo konstato ke el ojo esta muncho mas pezgado. En esto tomo un punyado yeno de monedas i ordeno ke estas monrdas, munchas djoyas valutozas sean metido en la tasa del pezgo. Ainda siempre el ojo estava pezando muncho mas de este todo trezoro.
En esto, el savio disho:
"Mismo si incharas todas las karosas atadas a todos los kavayos de todo tu reynado i los meteras en esta tasa, el ojo sera ainda mas pezgado."
"Komo esto lo pudes eksplikar?" demando el Rey. "Komo esto es posible?"
"Ambezate un konsejo de esto todo, ReyGrande," le respondio el savio. "Save ke el ojo umano nunka no se arta kon lo ke ve. No depende si esto es todo tu trezoro. El kere mas i mas."
"Tu eksplikasion no me konvinse," remarko Aleksander. "Dame la prova de esto."
"Muy bien," disho el savio. "Kita todo este trezoro de la tasa del pezgo, i mete a su lugar un tokado de polvo del ayre. Despues observe lo ke afitara."
Apenas ke Aleksander avia metido el tokado de polvo a la tasa del pezgo, el polvo abasho la tasa en provando ke era mas pezgado.
En esto, Aleksander se eksklamo:
"Agora entendi el senso de tus palavras. Todo tiempo ke la persona bive, su ojo kere mas i mas. Ma, en el momento ke se muere deviene polvo! I su ojo no es mas kapable de dezear."
Esto akodra un dicho:
"Ojo vazio, nunka se arta"
Gad Nassi