Durante mi lunga i passionnante karriera rabbinika de 54 annios en el Congo, tuve el plazer de enkontrar i resevir grandes figuras eklesias-tikas, sean katolikas, protestantes i musul-manas, ke me reservaron grande estima i sympathiya.
Mountchas veses resevi sus lettras demandandome de dar konferensias seguidas di debates, sean en los Grandes Seminarios de Theologiya Benedektino i Salesiano i sea del Rektor del Gran Seminario di Theologiya Protestante. Todo se passava in una atmosfera partikolarmente kordial. Mis interlo-koutores si posavan la kestion komo el puevlo djodio es un milagro indeniable.
Por seguro siertos de mis lektores konossen la istoria konsernando el Monarka de Prussia, Frederiko el Grande, ombre septiko ke non kreiya en Dio, ni en su religion; el era un grande amigo del selebre eskrivano Voltaire, ombre agnostiko enkreivle en el Dio asta los oessos.
Komo kada monarka, ke se respekta, el teniya un kapellano famoso predikador. La Reina i los miembros de la korte assistian a los servisios religiosos ansi ke a su predika elokuente. La mission de este prete, bien ke mouy honoravle, no li era fassil. Avlar de Dio, de la fey kristiana kuando saviya ke delantre de el non aviyan oïdos despuetos a akseptar la kriensa en los dogmos di la fey kristiana, evokada en los Evangelos, el prete si sentiya embarassado.
Un dia, Frederiko el Grande, mostrandole kerensia i respekto, le dize : “Reverendo, kero veramente konverserme de lo ke kreies e avlas en tus sermones. Dame un egsempio de un milagro, ma un vero milagro; onde non puedo, io diskoutir, ni eniegar, ni duvdar.» El kapelano fikso bien sus ojos en los del Monarka i dize: « Sire! El milagro es Israël.» Interlokado, Frederiko el Grande rasono un poko i dicho: «Tienes razon.» Repuesta de un ombre intelligente ki admette ke ay en el moundo un milagro bivo, ke imposa attension a todo el moundo ke razona.
Di fakto este milagro non bive guadrado. El es presente a todos los ojos in en todas las latitudes de las fasses del moundo. Su presencia sta in todo logar ; el parese dezir : “Tenech visto un milagro ? Miradme! «Mis interlokoutores me dizen: «Rabbi Levy, votre peuple constitue donc une énigme dans l’histoire universelle. Ses annales défient toutes les lois. Nulle nation au monde ne suscita autant de haine. Malgré la longue série de ses infortunes, loin de sombrer sous l’assaut des persécutions féroces qui l’ont assailli,le peuple d’Israël est en pleine croissance avec la création de l’état d’Israël. Païens, Chrétiens, Musulmans s’acharnèrent tour à tour, contre lui, résolus à le détruire».
1) En 1575, antes la era volgar, paressio el edikto de Paro ordinando al Puevlo egypsiano a solevantarse kontro los Djodios. Un monumento egypsiano ieva ainda oy la inskripsion en karakteres yeroglifikos: «La rassa de los Ebreos sera estinguida.»
2) En 588, antes la era volgar, la Judea fue okupada par Nebouhadnetzar, Rey de Babylonia. Despues de aver destruido el Beth Hamikdach, el Templo de Jerusalem, el ievo in egsilo i disperso el puevlo djodio en su immenso impero.
3) En 475, antes de la era volgar, el Rey di Persia, Ahachveroch akkordo el diretcho a Aman de massakrar todos los Djodios beviendo en las 127 provinsias de su immenso reinado.
4) En 200, antes de la era volgar, Antiochos Epiphanes okupo la Judea i perseguio kon violensa el puevlo djodio. En 175, Antiochos ovligo a los Djodios a adoptar el kulto pagano, metio a sako Yerushalaim i profano el Templo, installando el kulto di Zeus.Gracias a los Maccabeos, el Judaïsmo subivio vikto-riosamente al desastro nasional i mezmo, kosa ekstraordinaria, a la rovina del Templo di Yerushalaïm.
5) En 70, la Judea fue okupada por Titus. El segundo Templo de Yeruchalaïm fue destruido i el puevlo djodio arankado de su patria i mandado komo esklavos nel lungo egsilo.
6) En 1939, empesso la guerra. Hitler, de triste rekuerdo, dekreto la eksterminasion del puevlo djodio. Todos los estados direktamente o indirektamente fueron komplisses de los karnages de los Djodios en los kampos di eksterminasion en Polonia i en Allemania. Todos eyos serraron sus puertas porke l’edikto de Hitler sea akomplido.
Basta pensar ke sentenas de miles i miliones de bombas fueron versadas sovre l’Allemania por destruir todas las linias de kommunikasion, dengunas de estas bombas volontariamente o por iero tokaron la linia de los trenos ke konduisian los Djodios komo animales en estos kampos onde fumavan los ornos krematorios de la karne djodia.
Mis amigos archibiskopos i otros seminaristas ki assistian a estas konferensias, ekspremian sus regrettos de kuanto se passo mientres esta guerra 1939-1945. Eyos me dicheron: «Kon el reino del Pappa Jean XXIII, el esprito del Vaticano e del Kristiano va trokar.»
Dil impissijo di mi karriera, eyos mi aioudaron en mis diffikoltades a assigurar los korsos di Ebreo i de religion en sus eskolas, de ijos komo de ijas: el Collège St François de Sales i l’Institut Marie-José i akseptaron di konsiderar las notas de la religion djodiya, komo las notas del Katechismo, ki si davan a los elevos Kristianos.
Por testimoniar, una ves di mas, de sus fidel amistad, los Kapos Religiosos, Katholico, Protestante i Musulmano, en kollaborasion del Kuerpo de Professores de la Universidad organisaron la ceremonia de mi jubileo de 50 anios de mi karriera rabbinika en el Congo. Todos eyos por respekto, antes de entrar a la Synagoga, se kitaron «la di quatro» de sus pitch-adouras. Eyos organisaron una chorale de kantos i dansas. Todos estos inkuentros enrekessieron mi passionante i eg-saltanteKarriera rabbinika.
Kero tambien dezir aki ke io servi una mouy ermosa i aktiva kommunidad . Eya gozava de todo prestigio i onoris, era enviada por todas las kommunidades del Kongo. Io ero «fier» de eya. Malorosamente, fue en momento ke io me topava en Bruksellas, serka mis ijos, ke la katastrophe si abattio en el Kongo i provoko l’egsilo de toda la kommunidad. Disde el 29 julio 1991, data de mi partensia del Kongo, la synagoga no vido mas allegriya.
Auguro a todos mis korreligionarios del Congo, del Rwanda i del Burundi, en todo logar andi si topan, salud komplida i ki sus vidas se passen en la serennidad i la pas. Amen. Chana Tova.