Accueil - sefarad.org

Sufganyot de Hanukah

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

NES GADOL HAYA PO !

HANUKA MOS VIENE KOMO UNA NOVYA
VISTIDA DE BLANKO A MUESTRAS KAZAS ....

SUFGANYOT DE HANUKKAH

La resefta : ---------------

15 gramos de levadura (no seka)
Un kuarto de kupa de asukar
+ 1 kuchara de supa de asukar
+ 2 kucharas de komer de agua kayinte/tivya
Medya kupa de leche
180 gramos de manteka
Tres kupas i medya de arina
Un poko de sal
1 Guevo
+ El amariyo de 2 gueyvos batidos kon un limon rayado (solo el amariyo)
Dulse (Fragulas, mansanas, zirguelas etc.)

Se derrite en un boliziko la levadura, la kuchara de asukar i
la agua tivya.
Se desha en un lugar kayinte fina ke se aze el dopyo de la kuantitad.

Se buye la leche.Kon lumbre chika se le ajunta 120 gr de manteka (de los 180 gramos) i el kuarto de kupa de asukar.

Ke se derrita esto i abashar de la lumbre.

Kuando esta tivyo se le ajunta lo de el bol de lavadura.

En un bol grande se mleska la arina i la sal i se le aze un poziko
! Aryento del pozo echamos la leche kon lo de aryento. Adjuntamos los gueyvos kon el rayado del limon i lo lavoramos para azer una masa/dough no muy blanda....

Si se nesesita ajuntar mas arina. (Masa komo mushos de mansevos !) Esta masa kale ke se arepoze una hora en un lugar kayintiko ! Ke dingunos no token !

Lavora dospues la masa otra vez fina ke se aga enteramente homojena. Aze 3 pedasos. Avrela kon el palo. 0.5 cm.

Formar las sufganiot kon la kupa.
Meter el dulse en medyo i serrar los dos redondos.

Derritir el 60 gr. de manteka (ke mos aviya sovrado) i pintar kon una furcha los redondos kon esto.

Enmantekarlos ! (No embatakarlos !)

En un tefsin otra ves desharlos arepozar kon un handrajo
ensima (pujan !) Medya hora.

Agora kale friyirlos ! Dentro el azeyte muy kaynte !
Dospues lumbre mas dulse....Kuando yegan a una kolor
ermoza de dos partes se kitan i se les mete polvo de asukar !

Ayyyyyyyyyyyyyyyyy ke son mmmmmmmmm ! Asasinos !

Sufganiyot sin verguenza ! kale enforkarlos antes ke ayegen a salir afuera ! Enforkar el ke las invento !
Enforkar ken los kome ! Enforkarrrrrrrrrrrrr

Ke dishites ?

Sharope komo Sufganya

* Kerida Sharopika,
En lo ke vide la resefta de los sufganiyot,
pishin me dishe, ke lo va meldar i lo va azer.

Ampesi a meldar lo ke se mete aryentro.
Maya/levadura , arina, dulse, guevos etc etc. Una sola koza no topi lo ke es.

Agora yo ande ke tope un mansevo para mirarle komo son sus mushos ?

"Kulak memesi", ke es la tetika de la oreja, ya puedo saver. En lo ke era yo manseva i keriya azer unos biskotchos, asta ke topi el punto, teniya una mano en la oreja la otra en la masa. De sorte ke en lo ke ya eskapava de azer los biskotchos , la medya kara i los kaveyos ,me se inchiyan yena de arina. Agora dizeme tu te rogo, ayde ya topi al mansevo, kale ke tenga una mano en la masa i la otra en los mushos de el poveretiko ? Ah kerida, me isites riyir estas oras de la notchada. Asta agora no tengo oyido esta ekspresyon.

Kada diya mos ambezamos una koza mueva. Ke disheron muestros nonos ? La vieja kere bivir, para mas ver i oyir. HANUKA ALEGRE A TODOS .............

Eliz Gatenyo (Istanbul)

Una nota : Me ambezi tanbien ke los sufganiyot kale ke tengan marmelad o fruta o dulse aryentro.
Ma no deve verse de afuera. Kale ke tengan komouna tchika surprizika aryentro.
Me plazyo muncho esta idea...Ke dizish ?

--------------------------------------

Mi keridika Eliz,

La ekspresyon por la masa es de vedra"kulkak memesi" la tetika de la oreja.
Tiyenes muncha razon i la ekspresyon "mushos de mansevos!" es miya enteramente.
Porke keriya dizir un poko mas duro de la de la oreja ! Pensi i me vino al tino de dizir esto. La verdad es ke es la mizma dureza !
Agora ande lo topas al mansevo para tokarle el musho....hmmmmm ! I en esto tiyenes razon !
Kuando era chika i ke mano kon mano kon mi mamita asuviyamos el Yuksek kaldirim por ir a la Kula oiya madamas en las ventanas ke gritavan abasho :
" sutchi, yel yukari yel !" en negro turko kere dizir "Vendedor de leche, ven ven ariva !" o el ke vende yogurt, o legumes, o patatas o pitas/borekas ets... Pasava de todo por la kaye i las dammas en las ventanas los yamavan o (komo mi ayinda !) les echavan sestos kon kuedras i paras aryento por merkar kozas. Molhorozamente no pasan tanto komo al tiempo !
Simites (begaleh), frutas i domat, patatas i sevoyas. Este kadar. No mas...Guay guay ! Ke es fantastiko de merkar ansina ! Estava dizyendo ke los mansevos les traiyan todo lo ke keriyan fina sus puertas.
Alora ES FASIL ! Se solusyono el problem hanumika! Le tokas el musho avres la masa...Le tokas otra ves, echas arina, le tokas i vez.....Ande esta el difisil de esto ? Abasta avrir la ventana i gritar a la kaye : " Yel yukari yel ! " Maksimum le das una sufganiya en la mano i medya soriza. Entera no se kere por sedaka ! Lo toma gato por pato !
La sorprezo es una buena ideya kuando tienes envitados ! Me akodro en las istoryikas de mi chikes ke metiyan el aniyo en el gato i ken de las ijikas ke lo topavav se kazava kon el prens !

HANUKKAH ALEGRE KE PASESH MI KERIDA ELIZ !

Sharope kon el chapeyo alto de los gizandores !

- Copyright © sefarad.org - 1997 - 2018

Retour au site sefarad.org -