Accueil - sefarad.org

Los pendevishes i el grenier arriva

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

LOS PENDEVISHES  I EL GRENIER ARRIVA !
 


Ayayayyyyyy !    De ande saliyo esta palavra agora !
De un bavul yenno de polvo !  Ayi arriva en el grenier
de mi granmama !  Ande guadra sus viejas tualetas
kon dantelas, de tafta i de velours, fustas largas
"cloche"  de organza kon una flor echa de la mizma kolor !
 
Ke ay en el grenier ?   Mas ?
Una siya antika echa a la mano por el ermano de mi
granpapiko !  Ma no tiene un piye !!!!  Las letras d'amor
de mi padre i de mi mamita...  Viejas fotos, mas i mas !
Reseftas de komida en un grande defter kon reliure i
oro en los bodres... En fransez ! Una montanya de
notas de piano... Una vieja meza de salon entera lavorado
a la mano .. No es para komer... Para kualo serviya ?
Inchir lugar ?   Mis jugettes !  Ayyyyyyyyy... El perriko
roz, el kavayo de tavla en el kual asuviya para kunarme
a delantre i atras !  -  No le kedo ni kaveyos ni kola al
kavayo de mi chikes...  Ay un kanape ke era bordo
unos tiempos.. kon pishkules !  Yenno de polvo.. Viejo !
No se deke lo guadran !!!  Eskaleras para alimpyar las
almenaras del salon !  Bueno ke no les kaye ensima !
Mas bavules, validjas para ir en vakansas, parapluis
rotos, una vieja kuzinera i toda manera de pishkale !
 
i el biervo pendevish !

Yo me namoro por pendevishes.

Pendevishes son una lokura de la kozina sepharadi !
No konosko koza ke engodra mas muncho de esto !
Es kon pendevishes ke mi mamita me metyo en un hal
muy difisil de salvarse : Esto se yama aflakar !
En estos tiempos no era tan importante de ser
flaka. al kontraryo,  mi granmama diziya "dame
gudrura te dare ermozura !!!"  Agora las anoreksikas
s'estan azyendo modelos ... Ke tiempos luzyos eran !

Pendevishes !!!  Mi madre bendicha ! Es gudrura
pura de vaka, de la parte de las kostiyas! Esta
gudrura se aze pedasozi se friye kon las patatas.
(se puede echar tambien pedasoz grandes de sevoya)
Por seguro ke una grande partida se dezaze para
ser l'azete en la kuala se friyen las patatas MAAAAA
unos pedasikos chikos kedan ! Sofritikos i muy muy
savrozos ! estos son los pendevishes !

Agora endiya,  d'envezes en kuando, una ves al anyo,
sin dizir lo a dinguno, komo una ladrona, traygo un
paketiko chiko a kaza i me friyo patatikas avlando
kon mi mamita ke me oye de los sielos ! No le plaze
tanto ke aga yo pendevishes porke se metyo de akordo
kon mi ijo, musyu el doktor, i me dize ke es koza ke
mata la persona por modo del kolesterol i otras kozas
negras....ke me sale a mi ! No mos vamos a murir
ansina o ansina ?  A la buena ora seya....

Yo se una koza !
Me eskarinyo de estos pendevishes
ke komiyamos kuando yo era chika !

no oyitej nada ... bueno ?
 
Kon karinyoooooooz !

sharope blanko

- Copyright © sefarad.org - 1997 - 2017

Retour au site sefarad.org -