Accueil - sefarad.org

Saver unos trikes ke ayudan en la kozina

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

SAVER UNOS TRIKES KE AYUDAN EN LA KOZINA  :
 
-  Para kitar la golor del  PISHKADO
(frito, krudo, kocho) de la kozina uzamos
buyir  1 kupa de de agua kon  3 kucharas
de vinagre.
 
-  La golor del frito se puede kitar en metyendo
unas kuantas ramikas de PRISHIL en la azeyte
de friyir.
 
-  Antes de uzar por la primera vez el sarten/
la poele pour frire,  buyir un poko de VINAGRE
para ke no se apege lo ke vash a friyir.
 
-  Puedesh uzar las kashkaras de los LIMONES
ke eksprimitesh para alimpyar i azer briyar
los kuchiyos i los resipientes de metal.
Si sekash los limones al sol las puedrash uzar
para kitar las grasas i la tiya preta de los
resipientes suzyos.
 
-  Para pelar fasilamente las TOMATAS, kale
tremparlas en la agua buyido unos segundos i
azer kaminar ensima de eyas la parte ke
no korta del kuchiyo antes de mundarlas.
 
-  Para ke no vos keme los ojos en mundando
las  SEVOYAS,  vos konsejo de pelarlas i kortarlas
delantre de una ventana avyerta (o en el balkon)
o/i  en un resipyente yenno de agua
 
-  Si vos se korta la MAYONEZ kuando la estash
preparando ayuda a solver el problem de meter
2-3 gotas de vinagre al amariyo de un gueyvo
i meneyar bueno bueno kon azeyte de oliva.
Esto se inkorpora avagar avagar a la mayonez kortada.
 
-  Es bueno de deshar en mojo noche entera los
bakliyates komo LENTEJAS, GARVANSOS,
FASULYA SEKA ets.  i adjuntar un poko de Bikarbonat
kuando se meten a kozer.
 
-  Es posivle ke la sal korte la LECHE..  Por esto la sal
se deve adjuntar  (komo en la sos beshamel por
egzemplo)  dospues ke se eskapo de kozer...
 
-  Si vesh ke el KAFE esta humido en su resipyante,
le puedesh adjuntar un poko de azukar kristalizada.
 
-  Si mete unos kuantos granos de aroz para tomar
la humiditad de la SAL i para pueder uzar la salyera
kon mas fasilitad. 
 
- Ya savesh por seguro ke kuando se mete demasyado
SAL  en las komidas por yerro, se adjunta unas revanadas
kortadas de patatas ke travan la sal...
 
-  Si se mete un poko de  VINAGRE  kuando se buye la
patata (o kualker koza !)  el resipyente keda limpyo
i briyando i los legumes guadran sus ermozas kolores.
 
-  Para alimpyar artikolos de  KOVRE  kale uzar un
kanyamazo al kual echatesh gotas de vinagre.
 
-  Para alimpyar BOKALES de azeyte se inchen los bokales
kon agua kaynte kon soda i se meneya bueno bueno unos
5 minutos.  Dospues se le adjunta la MARKA DEL KAFE i
se meneya kon esto.  Verash ke los bokales seran limpyos
sin trasa de grasa...
 
-  Echar agua buyendo kon SODA  vos va avrir los evyes i
los lavabos tapados.
 
-  Para kitar la golor de la SEVOYA de las manos  uzarash
la patata kocha de antes, ke finyerash en vuestras manos
por unos 5 minutos.  No kedara mas golor de sevoya.
 
-  Meter  TEREBENTIN  en los almaryos i en los rafes de
la kuzina sera la fin de las ormigas i de los animalıtos
ke les plaze kaminar en muestros mupakes !!!
 
-  Meter una oja de DAFNA  en el kavanoz/el bokal
o el jarro ande guadrash la ARINA  para ke no se guzaneye.
 
-  Una kuchara de ARINA DE MAIS  en la omlet vos dara
una omlet godra i savroza.
 
-  Si tenesh demasyado PATATAS kale meter una mansana
en el sako i lo prezervarash en buen estado por 8 semanas.
 
-  Para rayar el KEZO mas fasil detenedlo unos 15 minutos
en el freezer.
 
-  Meter espesas aryento del POYO komo en la partida
eksteryor.  Se aze mas savrozo.   Frotar limon al eksteryor
i al enteryor del poyo para ke se aga krostilyente.
 
-  Las SEVOYAS se konservan mijor si las emburujash
en papeleras i las metesh abasho, en los kashones del
frijider.
 
-  Si frotash el LIMON en los dedos antes de mundar
sevoya i ajo, vuestras manos no van a goler
Espero ke vos serviran si dayinda no konosesh algunos
de estos trikes....

Al oyirmos en prontoooooooo.
 
 
Sharope blanco
 

- Copyright © sefarad.org - 1997 - 2017

Retour au site sefarad.org -