Accueil - sefarad.org

Popey i la energia de la spinaka

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

POPEYE I LA ENERGIA DE LA SPINAKA
 
Yenna de vitaminas i minerales ke kombaten
la kanserya i mos dan fuersa !
 
Una de las komidas las mas sanas ke los Judyos
uzan gizar en invyerno.
 
La spinaka es konosida por ser la mijor kura kontra
la anemiya, grasyas al fierro ke kontiene.
 
Bueno para la sangre, bueno para la digestyon, bueno para
peryer los kilos ke mos danyan.
 
Lo mas importante es ke la spinaka es un maraviyozo
regalo de la natura para kombatir munchos jeneros de kanser.
 
Es rekomendado por la salud de los ojos i amingua el riziko
de la dejenerasyon makular i de la retina.
 
Es un antioxidan i es bueno para las hazinuras kardyo-vaskulares.
La Europa konosyo esta vedrura en el siglo 11 por los Arabos ke
la trusheron de IRAN.
 
Se giza de munchas manieras. Yo adoro los ravos o los palikos de
spinaka. Agora se estan vendyendo en los super merkados sin las
ojas tambien.
 
- Les kito la kavesika i los lavo debasho de la fuente
de manera ke seyan limpyos limpyos ! 1 Kg de ravikos
vos daran komida por 4 - 5 personas.
 
- Meter los ravikos bien alimpyados en una grande kaldera.
 
- Adjuntar un kuarto de kupa de sumo de limon

(agora esto utilizando la sos agra de la agranada ke empeso
a ser vendida en los merkados i tiene muncho sukseso !)
 
- Lavar medya kupa de aroz i echarlo aryento de los ravikos.
 
- Adjuntar un poko manko de medya kupa de azeyte de oliva
 
- i medya kupa de agua + sal i un poko de pimyenta preta.
 
Meter a kozer a lumbre dulse.

La komida esta pronta kuando se travo la agua i los palikos
estan blandos.
------------------------------------
Yo buygo un poko las ojas de ispinaka
Les adjunto limon azeyte i sal
i tengo una salata muy sana !
O se aze una pure kon la sos bechamel tambien...
o se giza kon sos tomate, un poko de aroz i sevoya.
se puede servir al lado de la karne kocha.
O se kome kon yagourt kon ajo i pimyenta kolorada.
 
NO MANKESH DE KOMER LA SPINAKA PARA GUADRAR
VUESTRA SALUD I VUESTRA ENERGIYA !
 
karinyozzzzzzzzzzz
 
Sharope blanco

- Copyright © sefarad.org - 1997 - 2017

Retour au site sefarad.org -