Accueil - sefarad.org

El Sharope blanco en eskritora, en poeziya i en reseta !

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Sharope blanco

Para las dammas ke preferan hadras !
Balabustas Judiyas Tradisyonalas
Kon muncho hen i gusto....Alavadas
Kon komplimentos meresidos..
De la parte de vuestros envitados
Para ke tengan la avla dulse,
Ojos riendo i humor komplezente
De vedra ke yo dire kale ofrir sharope
! El Sharope blanco
A lo largo i a lo ancho !
Ensima de tavla de plata
Kon naperon blanko de dantela
Una bonbonyera muy shik yenna
Del dulse kolor de nieve
Kucharikas de plata siempre !
Kupas de krital elaboradas
Briyando, finas i ermozas...

Sharope blanco
12.11.2009

Sharope blanco
de Sharope blanco !

una soriza a todos para empesar.....
komo se aze el sharope blanko !
no es difisil !
i kale ensenyarlo a
las mansevas para ke este
dulse judyo kontinue de egzistir.
un tencere (kalderika)
de emaye o de teflon si posivle…
(mijor si no es de metal desnudo !)
buyir 2 kupas de azukar
i 2 kupas de agua kon
una kuchara de komida de
sumo de limon.
abashar lo del fuego kuando empesa a atarse...
(una gotika de este sharope
ensima de la laja....
si se tiene bien komo
un topiziko ya esta pronto !)
meter esta kalderika ariento
de otra kaldera mas grande
yenna de agua friya
i empesar a arremeyar kon
una kuchara (o otra koza) de tavla.
(el metal no !)
empesa a azerse blanko blanko
komo la nieve. alora se etcha arriento del
dulse medya kupa de agua
(mas o menos) de krema doble
(krem shantiyi o kaymak
puede ser) o nada !
un poko de naranja rayada
i ya esta pronto.....
Bon Appetit ...... mmmmm Succulent !
Sharope blanco

Sharope blanco
de Eliz Gategno

Yo me ambezi de mi esfuegra a azer
sharope blanko (o dulse blanko).
Emprimero kero dizir ke el materyel de la
kaldera es muy emportante.
No kale kaldera de aluminyum
(ke ya no ay mas agora) por ke el dulse se
aze preto, toma la kolor de el aluminyum.
No kale tanbien una kaldera de "acero" /acier
ke tiene dopio fondo godro, por ke el
"momentiko" de serrar la lumbre es muy muy
importante. En lo ke se serra la lumbre de
debasho de la kaldera de acero, lo de aryentro
kontinua a buyir por ke tiene el fondo ke esta
dainda muy kayente, i se fuye el karar.
Agora vos dare la resefta :
Tomash 3 kupas de agua i 3 kupas de asukar
aryentro de una kalderika de teflon.
La metesh a buyir .
I vash kontrolando si se empeso a atar.
En los kontroles vash a tomar kon una kutchara
de tavla una gota de este shurup i lo metesh
ensima de un chini. Kale ke se kede komo un
bultiko . Tomash este bultiko entre los dos dedos.
Kale avrir-serrar, avrir-serrar los dedos para ver
si se izo komo un iliko blanko.
ESTO ES EL PUNTO del sharope blanko.
En lo ke vesh este iliko blanko, kale echar
una kucharika de kafe de sumo de limon.
Ke de otras dos buyores i
amatash la lumbre de debasho i la deshash
tivyar. En lo ke ya se tivyo, ke ni esta yelado,
- ni te kema la mano, tomash la kutchara de
tavla, i empesash a aboltar presto-presto...
ma sin kedar ni un punto, fina ke vesh ke ya
se izo blanko.
Despues ke ya se izo el sharope,
puedesh ajustar coconut o kashkara de
portokal/orange rayada o vanilya o
pedasikos de pistachio.
Ma esto lo vash azer kon la mano,
komo ke estash finyendo una masa.
Parese muy kolay ma en vezes no reushe,
alora meto kuartos de portokal aryentro
de esto i se aze dulse de portokal.
En turko dizimos : "Ne chikarsa, bahtina"
Lo ke sale, a tu mazal ! - Reushita buena !

Eliz Gatenyo

- Copyright © sefarad.org - 1997 - 2017

Retour au site sefarad.org -