Accueil - sefarad.org
 
Coya Delevi

Un torno nostaljiko al Kuerbo de Oro

    MENU    

SEFARAD.org
[L'espace de Coya Delevi]
AIDEZ-nous
Page PRECEDENTE

UN TORNO NOSTALJÝKO al KUERNO de ORO

Coya Delevi

Kada empesijo de Primavera, me plaze azer un torno kon vaporiko en el Bosfor. Es komo ser testigo del amanesimiento de la natura. Los arvoles de “erguvan” kon sus kolores lila, ofresen una vista maraviyoza. Ma, oganyo desde kaji el empesijo de Avril ampesimos a ver diyas kayentes, no azyendo bushkar las kalores de Junyo. En rezume, no pude azer dayinda mi torno abitual kon vaporiko. Ma, esto no kere dizir ke no lo va azer! Estamos en medyo de Mayo i komo savemos Mayo es largo!...
Antes 2-3 semanas realizi un dezeo ke estuve atrazando.Me fui otruna vez a mi adolesensya, a los anyos 1948-49. Estavamos en la 8ena klasa de la St. Benoit (puede ser ke era la 7na?). Una etranya koensidensa, en las lisyones de Literaturas Franseza i Turka, simultaneamente lavorimos sovre la ovra del eskrivano fransez Pierre Loti. Komo se save, apenas ke se nombra este famozo romansiero, otomatikamente se evoka el livro “Aziyadé”, ke fue su primera ovra (1879).
Portanto, para la lisyon de fransez, me akodro muy bien, no era este livro ma “Le pecheur d’Islande” (El Peshkador de Izlanda” ke meldimos en su orijinal i kada una izo “Disertasyon”, una manera de kritika del livro. Aziyade lo meldi en turko akeya epoka muncho mas despues. Ý anyos pasando, en fransez. En el korso de los anyos tuve la okazyon de meldar otros lavoros de Loti en sus orijinal o trasladados. Si no me yerro, en los anyos 60 una amiga me dyo un livro en turko . “Ýstanbul ve Pierre Loti”, eskrito por Abdulhak Ţinasi Hisar.
Pierre Loti fue un grande observador, reusho a transmeter al lektor en un simple lenguaje, la rikeza vizual de lo ke enkontro en sus nombrozos viyajes o syendo un ofisye de la Marina. Despues de ser Kapitano, fue promotido al grado de Kolonel.Transmetyo tambien elementos de diversas kulturas ke konosyo myentres los viyajes al Oriente Medio i Oriente Leshano. Esto izo de Pierre Loti, el eskrivano el mas popular de su epoka. Fue achetado komo miembro de la “Académie Française”.
En el kuadro de sus viyajes, Loti estuvo en Estambol munchas vezes entre los anyos 1876-1913. Aprovechandose de su grande fakultad de observasyon i tambien influensado de la vida Otomana, eskrivyo dos romansos. “Le Roman d’un Spahi” i “La Turquie agonisante”. Reusho a krear una fuerte simpatiya resiproka kon el Puevlo Turko, de sorte ke en 1920 fue proklamado “Sivdadino Onoraryo de Estambol”. Se fondyo una asosyasyon al nombre de Pierre Loti. En desparte, se dyo su nombre a una kaleja importante de Divanyolu i a un “Café”, aryento de una guerta de Eyup, en el monte mirando a la “Corne d’Or”, al “Halic”… Este lugar es famozo i konosido komo “Pierre Loti Chay bahchesi (Guerta de te, Pierre Loti”.
Es en esta guerta ke estuve despues de anyos, anyos. Asigun lo aklari en el empesijo del teksto, deviya ser 1948-49 kuando vijiti esta guerta por primera vez. Era djustamente la perioda ke estavamos lavorando sovre los livros de Pierre Loti. En vezes me alavo! de tener buena memorya. Ma, agora devo achetar ke no me esto akodrando muy bien, no esto muy sigura si era kon la profesora de Turko o kon las de Fransez. (podriya ser una demuazel o una Sör?). Enfin, oy esto no es muy importante. Para mi fue komo un suenyo de realizar este dezeo nostaljiko, de azer otruna vez este paseo despues de un entervalo de kaji 65-66 anyos. A mi, un diya de Shabat me yevo un serkano kon oto. Fue un poko difisil de topar parking, tanta djente aviya. Ma topimos la shans de topar en la guerta una meza vaziya delantre. De sorte ke, pude admirar el panorama, las dos islas komo nadando en medyo del Haliç.
Remarki un grupo bastante grande de turistos espanyol. Ýzimos mizmo i konversasyon. Les demandi komo suvyeron arriva syendo ke otobuses grandes no suven. Mos ambezimos ke abasho en Eyup ay una estasyon de “funikuler” (ya lo vide despues), ke esta entrando asta la partida inferyor de la guerta. Tomimos un te , merkimos syertas bavajadas en tal ke rekuerdo i mos metimos al kamino, al trafik de Estambol, prometyendome de revenir otruna vez algun diya entre semana.

- Copyright © sefarad.org - 1997 - 2016

CONTACT

Retour au site sefarad.org -