La Shoa de los Selaniklis

    MENU    
Sefarad
[Edmond Cohen]
Help us
Retour

La Shoa de los Selaniklis

0y pensi de avlarvos de una desgrasya entre las mil desgrasyas de la shoa, ke fue la eksterminasyon de los djudyos de Selanik en 1943.

Para kontarvos esta terrivle istorya, lavori a partir del livro del Haham Michael Molho, intitulado In Memoriam. El livro konta sovre lo ke se paso en la Gresya entera, ama yo kyero avlar oy solo de Selanik, porke en vente minutos no puedo avlar de toda la Gresya. Otra vez puede ser vos avlaré de los otros djudyos de Gresya.

No tengo menester de ambezarvos ke, antes mismo de la ekspulsyon de los djudyos espanyoles, Selanik fue syempre una sivdad kon munchos djudyos. Por egzemplo, una de las epistolas de San Pavlo, en el primo siglo, esta eskrita a la entisyon de los djudyos selaniklis (épître aux Thessaloniciens) lo ke es la mijor prova ke de todo tyempo uvo munchos djudyos en Selanik.

Por siguro, la yegada de los djudyos espanyoles incho mas i mas la sivdad de djudyos, tanto ke, a la rovez de lo ke se paso para Estambol ande nunka los djudyos fueron la mayoriya de la povlasyon de la sivdad, en Selanik, al kontraryo, los djudyos formaron, entre 1550 i 1912, la mayoriya de la povlasyon. Eran mas o menos 55% de la povlasyon, los turkos 20% , los gregos 20%, i los Bulgaros 5%. Mismo los ke no eran djudyos se kedavan de lavorar diya de Shabath, i munchos turkos i gregos avlavan espanyol , ke era la lingua de la sivdad. Las kozas trokaron kuando los gregos tomaron la sivdad en 1912, i sovre todo despues del grande fuego de 1917, ke kemo sovre todo las kazas djudyas. Despues de ser 100.000 en 1912, abashan a 62.200 en 1928, a 52.350 en 1935 i a 56.000 en 1940, por modo de la gerra i de la vinida de famiyas. 46.000 djudyos fueron deportados.En 1947, kedaron 1.950 sovrebivyentes. Agora, ni se save ni se dize en Gresya ke Selanik fue durante siglos una sivdad djudiya.

Vamos a avlar oy de estos 46.000 desmazalados djudyos selaniklis asasinados por los Almanes.

En vedra, la gerra empesa kon los Italyanos. El 28 de oktovre 1940, los Italyanos atakan a la Gresya. 4.000 djudyos selaniklis azen parte de la armada grega, ke arrepusha a los Italyanos. Vyendo esto, los Almanes deklaran la gerra a la Gresya el 6 de avril 1941. El 8 de avril, la armada grega desha Selanik ke no puede defender. El 9 avril a la manyana, los almanes entran sin kombatir en Selanik. Los djudyos ya entendyeron ke las kozas se izyeron muy negras para eyos, mas ke para los otros. I, de fakto, a penas an yegado, los Almanes empesan a okupar las kazas djudiyas i mismo el ospital de Hirsch. Los 15 i 18 de avril 1941, los prinsipales kapos de los djudyos son aferrados por los Almanes. Los ke no son aferrados, es porke no estan en Selanik en este tyempo. A la fin de avril i al empesijo de mayo, los djudyos son ovligados de dar sus radyos, las livreriyas djudiyas son serradas i vendidas a aryanos, ets.

Saby Saltiel, uno de los kapos djudyos aferrados por los Almanes, es liberado i yamado por la Gestapo kapo de los djudyos. Los otros kapos son tambyen liberados.

Los djudyos sufren mil males, i durante el invyerno 1941-1942, los muertos, ke eran unos 15 por semana antes de la gerra, son agora, por el frio i la ambre, de 60 por diya. Ama yene se puede dizir ke, asta el mes de julyo 1942, la situasyon esta mas o menos repozada, mismo si ay unos djudyos fuziyados por los Almanes.

Todo va trokar en un diya, el shabath 11 de julyo 1942, ande todos los djudyos entre 18 i 45 anyos deven toparse a las ocho de la manyana, en la plasa de la Libertad. 9.000 ombres se ven en pie, sin derecho de menearse, de las 8 asta las dos de la mediudiya, de basho de un sol muy fuerte. El ke se menea esta ovligado de azer egzersisos de jimnastik, aharvado, insultado. Ay ke kaen , ay mismo ke mueren.

Muevo orden para el lunes 13 de julyo. 1.000 djudyos no vyenen. Los otros , en kuatro diyas son inskritos para lavorar komo syervos en varyos lugares. Malgrado los esfuersos de los kapos djudyos ke aprovavan de obtener de los Almanes kondisyones mas dulses para estos desmazalados, eran sin fuersa, hazinos, i munchos muryeron de kanseryo, de hazinura i de ambre.

Los Almanes azen saver a los kapos djudyos ke podran liberar los syervos kontra 3 milyardas i medyo de drakmas. Los djudyos obtyenen de bashar el presyo a dos milyardas i medio.

Es muy yuch, por siguro, de topar tantas paras, ama no ay otra solusyon, i los djudyos pagan la mayor parte del presyo.

Despues, los Almanes demandan a Saby Saltiel ande estava el gheto del tyempo de los turkos. No aviya, responde Saltiel.

En el invyerno 42-43, los Almanes arrovan los djudyos rikos el uno despues del otro. En este mismo tyempo, el simeteryo djudyo, en el kual aviya tombas de los primeros siglos, es destruido para sirvir de terreno a la Universidad. Las pyedras de las tombas ke no son derrokadas sirven para fraguar pisinas, ets.

El 11 desyembre 1942, los Almanes meten Koretz, el haham bashi, komo kapo de los djudyos en vez de Saby Saltiel.

El 6 de fevrero 1943, sej ombres de la SD (polisiya almana) vyenen en Selanik. Entre eyos, Dieter Wislicenny i Alois Brunner . Dos dias despues, el 8 de fevrero, yaman a Koretz, agora prezidente de los djudyos, i le ambezan ke agora los djudyos deven yevar la estreya amariya i bivir en un Ghetto. Kada botika djudiya deve tener una estreya tambyen, ets. Dingun djudyo tyene derecho de trokar de kaza sin otorizasyon, i si yene lo aze, sera fuziyado.

Por lo ke es del ghetto, los djudyos tyenen asta el 25 de marso para irse en dos zonas, una en la male de los Kampos, otra en el sentro de la sivdad. De tres a sej famiyas en el mismo apartamento. Los almanes dizen a Koretz ke los djudyos seran liberos en este ghetto administrado por los djudyos.

100.000 estreyas amariyas son kuzidas en presto. Kada uno deve tener dos estreyas, una sovre la djaketa, la otra sovre el palto.

Los almanes meten a una polisiya djudiya de 250 ombres al empesijo, kompozada sovre todo de militares djudyos de la armada grega.

Sözde para las statistikas, los almanes ovligan a los djudyos de deklarar todo lo ke tyenen komo paras, kazas, djoya, mobilya, ets.

Los mas sezudos ya entyenden ke esto es el empesijo de una deportasyon i ke kale fuir. I lo azen si lo pueden, para despues ir a eskonderse komo kazalinos.

Ama Koretz, el, no lo entyende, i a la rovez aze publikar sovre las paredes, el 5 marso 1943, ke « no kale tener espanto, ni kreer las rumores espantozas, ke son todas falsas. Kada uno deve tener konfiensa. »

Koretz kree lo ke le dize la polisiya almana, ke los djudyos van a ser kyetos i liberos en sus chika male. I obedese a todos los ordenes almanes i aze obedeser a los suyos.

Por siguro, agora ke savemos ke ya se aviya dechidado la eksterminasyon de todos los djudyos en la konferensya de Wansee desde enero 1942, agora ke savemos lo ke se pasava en Auschwitz desde 1942 , Koretz mos parese ser un lonso. Ama la haliz kulpa me parese ser la de los alyados : inglezes, amerikanos, russos, fransezes liberos. Eyos ya saviyan lo ke se pasava, aziyan emisyones de radyo para los ke eran okupados : deke ni una vez disheron la vedra ? Si se uvyera savido, de uno los djudyos uvyeran sido muncho mas akavidozos, i de dos esto siguro ke uvyera muncho menos denonsiasyones i muncho mas ayudo de los kristyanos.

Yo personalmente echo la kulpa muncho mas sovre los kapos alyados ke sovre un Koretz ke no saviya nada i ke tuvo la flakeza de kreer a los Almanes, i lo pago el mismo de su vida.

Entremyentres, los almanes enserran kon paredes altas de madera el Foburgo Hirsch, serka de la estasyon de trenos, i dinguno save la razon de estos lavoros.

Unas kinze famiyas djudiyas de Langada son en supito enserradas aya, sin derecho de salir . Kedan dos diyas sin komer, asta ke el konsilyo del Doktor Koretz sea otorizado a yevarlos un poko de sopa.

Los 13 i 15 de marso 1943, todos los byenes de los djudyos les son tomados por los Almanes, i lo ke keda deve irse a la komunidad djudiya. No ay mas rikos ni proves. Ay djente ke les keda solo su vestimyenta.

Los almanes kyeren rehenes (otages) i la komunitad yama a 104 ombres ke deven responder sovre sus vidas de la odedensya de todos.

La polisiya almana, dirijida por Wislicenny i Brunner, morava en una ermoza kaza en medyo del gheto, 42 kaye Velisariou, yena de todas las rikezas arrovadas a los djudyos, ande los almanes biviyan komo pashas, myentres ke los djudyos estavan muryendo al lado.

En supito vyene el haber ke todos los djudyos deven ser deportados. 300 vagones son prontos en la estasyon. Koretz korre ande los Almanes para ofreserles 50% de lo ke keda a los djudyos. Los almanes responden a Koretz ke Berlin no acheto la propozisyon. El alhad 14 de marso, la polisiya almana ordena a Koretz de kombidar los djudyos en el kal del foburgo Hirsch para anunsyarles ke van a ser deportados en Polonya, en Cracovya. Koretz les dize ke la komunidad de Cracovya les va resivir i ayudar.

La otra demanyana lunes 15 de marso, los djudyos del kampo Hirsch son arreunidos i se les da un papel sözde un chek en Zlotys, asigun se van en Polonya. Kada uno no deve yevar mas ke 20 kilos, i tyene ke suvir en vagones para beemot.

El primer treno parte kon 40 vagones, kada uno kon asta 80 personas, en todo 2.800 por treno. Las ventanas son serradas, no se puede respirar. Koretz obtyene ke para el sigundo treno, las puertas sean un poko avyertas, mismo si serradas por kadenas, para ke la djente pueda respirar un poko.

El mismo dia 15 de marso, el foburgo Aghia Paraskevi es vazyado en 20 minutos, ombres, mujeres, kriaturas, vyejos, hazinos, mujeres prenyadas, i yevados kon haftonas asta el kampo Hirsch para inchirlo de muevo.

El 17 de marso, sigundo treno. Los djudyos van a demandar a Koretz lo ke va afitar, i el les dize de tomar pasensya. La djente lo kyere aharvar i el se fuye, protejado por su polisiya djudiya.

Kada tres diyas, un treno se va kon serka de 3.000 djudyos. I un diya, en supito, los trenos se kedan. Ke se paso ? La organizasyon Todt disho ke teniya menester de 3.000 ovreros. Brunner lo dize a Koretz ke aprova de darle mas ovreros ke 3.000, diremos 15.000 , para salvarlos de la deportasyon. Es vedra ke mas de mil ombres son tomados para lavorar a fraguar estasyones i viyas ferradas. Era una vida terrivle, kon kaji nada para komer, haftonas, i mismo matansinas.

Komo eran sovre todo los bekyares (célibataires) ke eran tomados para estos lavoros en vez de ir en Cracovya, i ke los desmazalados djudyos pensavan ke era mijor de ir en Polonya, para no toparse bekyar i no ser tomados para los lavores, los djudyos empesaron a azer kazamyentos, asta syen por diya. Un diya, los almanes azen vinir la djente para mirar komo son fuziyados tres mansevikos ke se aviyan fuyido. Esto para ke la djente se espante de fuirse. Kualo azer ? La djente se apareja de topar vestimyenta kaente para la Polonya.

En el kampo Hirsch biven los djudyos guadrados por otros djudyos ke lavoran kon los Almanes, entre eyos Vital Hasson i su ayudante Leon Sion, yamado Topouz. Estos dos son dos brutas sadikas ke seran despues de la gerra, el primero, Hasson, enforkado, i el sigundo, Topouz, kondenado a prezo vida entera.

Savyendo ke el primo ministro de Gresya, Rhallis, vyene en Selanik, Koretz korre a verlo para demandarle ke intervenga verso los Almanes para ke keden las deportasyones. Ama Rhallis , si intervino, esto no troko nada, sino ke Koretz fue aferrado por los Almanes el tambyen.

El haham Haďm Habib fue yamado en su lugar, ama poko tyempo despues el tam

byen fue aferrado. Los trenos parten kada dos tres diyas, 5 en marso, 9 en avril, dos en mayo. Esto todo aze 42.830 personas. El primo de junyo, 820 djudyos son embiyados a Auschwitz eyos tambyen.

El 7 de agosto, 1800 sovrebivyentes de los ovreros bekyares ke ya konti, son yevados eyos tambyen, ya estan medyo muertos antes de partir.

En todo 46.091 djudyos fueron deportados de Selanik . En Gresya entera fueron unos 65.000 muertos.

Selanik, ke aviya sido una de las mas vyejas komunidades del mundo ; ke durante kuatro siglos aviya sido la kapitala de la djuderiya de los Balkanes, la Yerushalaďm de los Balkanes, Selanik era vazyada de sus djudyos.

La diferensya ke uvo entre Selanik i Varsoviya, es ke en Varsoviya, los djudyos saviyan lo ke se pasava en Treblinka i Auschwitz, ke era mas serka. Los djudyos de Varsoviya oyeron a sus kapos kuando les disheron ke no aviya esperansa ke asperar de los Almanes, i ke la sola koza ke kedava era de luchar , no para guadrarse de la muerte, ama para morir luchando i matando almanes.

Los djudyos de Selanik tuvyeron kapos ke no entendyeron ke todo lo ke diziyan los Almanes era mintira para endormeserlos. Por esto no uvo en Selanik la rebuelta ke uvo en Varsoviya.

Agora Selanik, ke se yama Thessaloniki, es une sivdad grega ande los Gregos ni saven mas ke uvo djudyos un tyempo en esta sivdad.

Mos keda a mozotros de nunka olvidarlos, i de azer i azer asta ke los Gregos lo sepan i lo digan a sus kriaturas.

- Copyright © 2001-2013 Moïse Rahmani -