El Pasaje del Tiempo

    MENU    
Sefarad
[Karen]
Help us
Retour
El Pasaje del Tiempo

Otrun anyo ya paso, otrun anyo ya se eskapo. Esto sigura ke todos vozotros estash pensando la mizma koza: el pasaje del tiempo se akselero. Yo me akodro kuando era chika, el tiempo no pasava kolay. Los diyas se alargavan i no se aziya de noche presto. Agora mi ijika, ke tiene 11 anyos me esta dizyendo: “Mama, komo de presto esta pasando el tiempo; no me esta kedando tiempo para azer nada. Asigun abolto la kara, ya pasaron las oras i ya es la ora de echar”. Es verdad. Komo dize mi madre: “Ya se aze de diya, ya se aze de noche”. Alora kualo kale pensar. Los pensadores de la “Edad Mueva” (New Age) komo se yama esta mueva eskola de pensamiento, dizen ke la Tierra esta tornando mas presto. No se si esto se provo sientifikamente ama lo ke esta muy klaro es ke muestra persepsion del pasaje del tiempo ya no es lo mizmo. Kon el desvelopamiento de la teknolojiya, todo mos se esta aziendo muy presto. Antes eskriviyamos letras a muestros amigos i resiviyamos letras de eyos. Esto tomava kaji un mez en indo i viniendo kon la posta. Agora ken esta tomando la pena de eskrivir letras! Dos biervos en forma de una chika letra, i ayi esta. Antes kada letra i letra era una ovra kompozada por la persona ke la eskriviya, a vezes semejantes a ovras literarias. Agora mizmo las plavaras ke se estan eskrivyendo en el internet estan emmachukadas por razones de azerlo mas kurto, mas presto. Estamos korriendo, ande, no se save. Ama vos digo, kada diya, en un momento, mos kalmaremos, mos asentaremos i tomaremos un reflo grande i largo i mos sintiremos ke estamos bivos, tomando plazer de la vida. Hanuka alegre i anyos buenos a todos los ke saven azer keyf.

- Copyright © 2001-2013 Moïse Rahmani -