Feliz muevo anyo 2009

    MENU    
Sefarad
[Karen]
Help us
Retour
FELIZ MUEVO ANYO 2009

Ya lo embiyimos el anyo 2008 a la eternidad i ya aresivimos al muevo anyo de 2009. Komo en kada anyo es de uzo de suetar a todos SANEDAD,
PROSPERIDAD I FELISIDAD. Yene komo de uzo en kada empesijo de anyo tomamos siertas desiziones. Al prinsipio del anyo, en las primeras oras kuando estamos beviendo, baylando i entrufandomos de komidas i dulsuryas, tomamos la desizion de empesar la dieta, siguro ke siempre despues de aver komido todo lo ke topimos akeya noche! Desidamos de mirarmos bueno, de no inyervarmos, de no tomar koloras bayat, de no azer un gameyo de un piojo, esto todo kuando estamos bien bevidos i espandidos en las kanapes verso la demanyana del primer diya del muevo anyo. Siempre tenemos unas oras de esvanesermos a imajinar kualo vamos azer si mos sale el grande loto. Todos espipitamos las fantasias ke tenemos en los korasones. Kon grandes sonrizas miramos los numeros ke ganaron i mos se kaye el gozo al pozo kuando vemos ke no ganimos nada! Kada anyo gastamos un monton de paras para merkar regalos a un monton de djente i los primeros diyas del anyo mos metemos a pensar komo se va pagar esto todo kuando la letra de la karta de kredito viene! Kada anyo mos sintimos ovligados de “reveyonar” i estar en pies asta la demanyana mizmo si estamos muertos por durmir i al diya sigiente todos demandan el uno al otro asta ke ora se estuvieron en pies, komo si ay una kompetision sekreta i ke kale azer rekor! Ma todo kon todo, kada anyo lo empesamos kon una sierta esperansa, komo si el anyo viejo se yevo en supito todos los problemas ke tenemos kon el i en el anyo muevo vamos a empesar de muevo. Es la esperansa ke mos aze aresivir al anyo muevo kon tanta enerjiya i alegriya. Es la esperansa ke nunka desha al ombre de dezesperarse del futuro. Vos sueto a todos La Buena Esperansa de todo modo de alegriya en el muevo anyo de 2009!

- Copyright © 2001-2013 Moïse Rahmani -