Un ombre de muy grande valor, Elie Perahya, ke tu alma repoze en Ganeden

    MENU    
Sefarad
[Karen]
Help us
Retour
UN OMBRE DE MUY GRANDE VALOR, ELIE PERAHYA, KE TU ALMA REPOZE EN GANEDEN

“Ay dos diyas en el anyo ke no me interesan: ayer i amanyana. Para mi, lo ke es importante es ‘oy’, espesialmente ‘este momento’. Lo pasado ya paso. El futuro no se save. En pralelo kon mi karakter miro de no tomar en konsiderasyon lo negativo. Lo ke afito afito, se eskapo. No ay duda ke pasi momentos difisiles en mi vida, ama en el momento ke se eskaparon no tuvieron dinguna importansia los rekuerdos negros. Yo no topo dingun sensio de akodrarse kontinualmente de las negatividades sosyales ni de kesharse o de siempre azer de estas negatividades el sujeto del diya. Tengo difikultades a entender a las personas ke lo azen i a vezes no los entiendo del todo.
Agora tengo 92 anyos. Kuando miro al pasado veyo rekuerdos ke son dulses i amargos. Mi mujer Klara me fue un apoyo enorme durante mi vida entera kon su modo de pensamiento ke se superpone sovre el miyo i su filozofiya de vida ke koinside a la miya. Eya me ayudo en todo modo de aktividad sosyal ke ize. Grasias al Dyo, esto puediendo dainda meldar, eskrivir i ser produktivo en mi komunidad en partajando mis memorias i eksperiensas.”
Estas eran las palavras ke aviya dicho muestro kerido Elie Perahya al Sr. Naim Güleryüz, kuando lo aviya intervyuvado para muestro proyekto de istoria oral, Centropa en el anyo 2005.
No es kada diya ke mos nase ombres komo Elie Perahya, ombre de grande saviduriya, un verdadero “djentleman”, un filozofo, en kurto, un ombre de grande valor. Tuve la grande shans de averlo konosido desde mi chikez porke mis padres i Elie i Klara eran amigos i siempre kuando su nombre pasava en una konversasion, era kon alavasiones al lado.
Su saviduriya no teniya kavo. Su kaza entera es yena de livros i siempre tuve el dezeo de inchir mi kaza komo lo izo el desde su manseves, kon livros valorozos de donde la persona se ambeza no solo informasiones ma tambien se mete en el kamino ke la yeva a un estado de saviduriya ke no se puede alkansar sin meldar i pensar sovre lo ke se meldo.
Elie Perahya no era solo un ombre ke saviya muncho. El era un djentleman. Su manera de avlar, su manera de komportarse kon la djente, de kual estado en la vida ke seyan, mostrava un nivel de noblesa ke no munchos alkansan en sus vida. El era djusto i para el la djustisya teniya grande importansa. Elie era un ombre ke dediko su vida entera a su komunidad. Lavoro mas de 35 anyos en diversos departamentos de muestra komunidad i en los dalkavos 20 anyos devino un pilar para el renasimiento i preservasion del Judeo-Espanyol. Sus ideas eran siempre de grande valor i mos dava konsejos asta sus dalkavos diyas. Si biviya ivamos a empesar un proyekto muevo kon el. Durante su vida entera Elie arekojo miles de pedasos de los livros ke meldo, palavras ke lo emosionaron, ideas ke lo influensaron i pensamientos ke topo valorozos. Esto todo lo tiene eskrito en defteres kon las datas i los datos de livros de ande tomo las palavras. Lo ke ivamos azer kon el era de eskojer las mas ermozas de estas palavras i de eskrivir sus eksperiensas sovre lo ke kerian dizir. No alkansimos a azer este proyekto i de verdad ke me esta embarasando en la alma porke esto sigura ke iva ser una ovra maestra si puediyamos azerlo.
Elie tambien fue un ombre mazalozo. Tuvo una mujer ke lo amo de korason su vida entera. El amor entre Elie i Klara en este dor ande la amistad se izo demode, fue siempre para mozotros komo una flama ke sirvyo de egzempio. Por esto penso ke la de Elie fue una vida bien bivida. Lo ke bushka una persona en su vida es ser amado. En esto Elie yego al buto mas importante de una vida kon Klara, la mujer ideal i la bondad personifiada.
Kerido Elie, siempre vas a tener un lugar espesial en muestro korason. Estate siguro ke vamos a kontinuar tu buen lavoro i ke vamos a eskapar todo lo ke empesimos kon ti. Tu lo vas a ver del Ganeden ande estaras i te vas a gustar. Tuvimos la grande shans de konoserte i yo, por mi parte, me siento komo si pedri a mi padre una sigunda vez. Estate en paz i ke tu alma repoze en Ganeden. Amen!

- Copyright © 2001-2013 Moïse Rahmani -