Da Grasias a la Vida, Moiz

    MENU    
Sefarad
[Karen]
Help us
Retour
“Da Grasias a la Vida, Moiz” (Moiz Hayata ªükret)

Komo kada anyo muestro klub, Dostluk Yurdu, kreo una mueva pyesa de teatro ke se yama “Da Grasias a la Vida, Moiz”. Una komedia de primera klasa, la audiensa se esta olvidando los dertes de sus vidas durante las dos oras de la piesa. Kon el stres ke ay en muestras vidas oy en diya no esta fasil de riyir ni mizmo de sonreir muncho, i de verdad ke pasar dos oras en riyendo a karakas mos esta dando un bonus i un antrakt de la vida ke tenemos.
El klub Dostluk Yurdu se fundio en 1966 i siempre tuvo una tradision muy fuerte de krear teatros. En muestro tiempo, en los anyos ’70, fue para mozotros i una eskola ande mos ambezimos el arte de la shena i tambien fue un lugar ande kada individuo pudo adelantre renderse kuento de sus talentos i despues realizar su potensial. Mozotros, la jenerasyon aktivos en los anyos 1976-1992, izimos todas muestras aktividades en la sala ke teniyamos en Osmanbey, un kat de bodrum ke tomava maksimum 150 personas. Teniyamos una shena chikitika i un lugar para trokarmos aun mas chikitiko ama el plazer ke tomavamos de azer aktividades ayi no se puede deskrivir fasilmente. Es ayi i en akeyos anyos ke se sembraron las semiyas de todas las aktividades teatralas ke estamos viendo oy.
Las komedias bilenges, (Judeo-Espanyol i Turko), empesaron kon la famoza piesa “Fikso”, ande kuatro de muestros amigos, Izzet Bana, Jojo Eskenazi, Hayati Motola i Izzet Sarfati se vistieron de mujeres i izieron una parodia de los diyas de fikso ande se ivan muestras madres para djugar kartas i pasar el tiempo. La asistensia tanto se riyiyan ke a vezes se kayiyan de sus siyas! Kon esto empeso la saga de estos treatros. La pyesa muzikal “Kula ‘930” sigio el “Fikso” i tomo su lugar en la istoria kultural de muestra komunidad komo la pyesa ke se djugo lo mas i ke tuvo el sukseso el mas fenomenal en los anales de muestra istoria teatral. En el anyo 1976 se djugo 75 vezes, un rekor en akel tiempo, en Estambol, despues se djugo en Izmir i en Israel. En 1986, selebro su 10en aniversaryo en djugando otras 25 vezes en Estambol, i despues en Israel. En el anyo 2001, selebro su 25en aniversaryo en djugando en grandes shenas otras 20 vezes en Estambol i en Israel. Kuando se empeso en 1976, el kadro era de 15 personas. En 2001, el kadro devino de 100 personas!
La pyesa “Kula ‘930” tuvo este sukseso porke teniya siertos elementos ke mi amigo Selim Hubeº dize ke es nesesario para ke una pyesa reushka en muestra komunidad: los karakteres son djudios, ay komedia, ay muzika i ay un karakter ke refleta el djudio simple, de la klasa media, ke empeso su vida bastante temprano, sin pueder meldar muncho, ke kazo i aijo i ke esta esforsandose para adaptarse a la vida moderna ke se esta trokando a pasos jeantes. En este karakter munchos de los miembros de muestra komunidad se ven a si mizmos, i si no, lo konosen muy bueno.
Este es el karakter de MOIZ, ke kreimos en la pyesa “Salah ªabati” en el anyo 1991. Moiz, djugado por el aktor fenomenal Jojo Eskenazi. La mirada solo de Jojo Eskenazi ya abasta para ke la djente se meta a riyir. Komo me disho un diya una amiga miya: “este ombre abasta ke diga tomates para ke la djente se riyan!”
La seriya de las pyesas de MOIZ empeso en el anyo 1992 kon la pyesa “Moiz in Broadway” i kontinuo kon “Las Listas de Moiz”, “Moiz en Ganeden”, “Moiz en Miluim”, “Moiz en Yerushalayim”, “Moiz en el Kongo”, “www.moiz.com.tr”, “Este Echo se Eskapa Aki, Moiz” i “Moiz Hibernatus”. Este anyo, “Da Grasias al Dyo, Moiz” es la diezena pyesa de la seriya.
Este anyo la pyesa fue eskrita por un grupo de eskritores: Selim Hubeº, Jojo Eskenazi, Rozet Hubeº, Fani Bonofiyel, Beti Duvenyas, Eti Anahmiyas i Tuna Eskenazi. Fue dirijida por Rozet Hubeº i su asistente Eti Anahmiyas. Fue djugado por Jojo Eskenazi (Moiz), Fani Bonofiyel (Kleret-Floret), Beti Duvenyas (Tant Kamelya), Moris Benºabat Levi (Josef), ªirley Tavaºi (Nadya), Cenk Rofe/Lemi Filozof (Emir), Deniz Karmona (Deniz), Lili Doenyas (Lili), Fredi Levi (avokato).
Moiz desidando ke ya abasto lo ke lavoro 35 anyos se retiro i esta en pensia, en kaza. Siguro ke kuando ay ombre en kaza es una desgrasia. La esta kitando loka a su mujer ke no save kualo azer kon este ombre ke le esta aziendo la kaza ula i le esta komiendo la kavesa el diya entero. A Moiz, ke agora no tiene nada ke azer se le dio kon kursos i ya no kedo kurso ke no se fue i komo se esta ambezando lo ke mos olvidimos mozotros la mujer esta saliendo mas loka.
Para los ke biven en Estambol, es una grande okazyon de ver esta pyesa ke les va alegrar el korason i para los ke biven en Israel, kale ke asperen ke las organizasyones topen paras para azerlos traer a Israel i kuando vash a ver la pyesa ya me vash a nombrar...

- Copyright © 2001-2013 Moïse Rahmani -