Accueil - sefarad.org

Chika entrevista kon Sami Kohen

    MENU    
Sefarad
[Klara]
Help us
Retour
Chika entrevista kon Sami Kohen
Editoryalisto en la Kotidyano Milliyet

Desde largos anyos meldmos kon grande interes los artikolos de Sami Kohen en la rubrika “Politika Eksteryor” de la gazeta Milliyet, uno de los mas grandes kotidyanos de Turkia...“Asumir la responsabilidad de un semejante lavoro” egzije una grande konosensya de la aktualidad kontinualmente renovada i sovre todo un esprito muy agudo de investigasyon, analiz i deduksyon. El moz da ansi kontinualmente una vizyon kaji total de la situasyon sosyo-politika del mundo kon sus konsekuensas pozitivas komo negativas sovre muestro payis.

En sus analizis, Sami Kohen estudya los faktores ke aparejan o ke son suseptibles de aparejar kualkyer evento futuro i en mizmo tyempo lo ke seran las reperkusyones sovre su entorno serkano komo leshano.

Oy en dia, la globalizasyon kon su rapidez de komunikasyon i de informasyon de todo lo ke se pasa, a ke distansya jeografika ke sea, anchea ainda mas el kampo de la persepsyon humana...Lavoro difisil, duro mizmo, ma se puede supozar muy interesante en su varyedad .Ansi pensi demandar a Sami Kohen de responder a unas kuantas kestyones konsernando su lavoro..

----------------------------------------------------------------------------------- Kestyon) Kerido amigo te rengrasyo de akordarme esta entrevista , es la segunda vez ke respondes a las preguntas del Amaneser (la primera vez hue kon Karen Sarhon); ansi vo mirar de formular kestyones diferentes afin de dar a muestros lektores lo mas posivle de informasyones sovre tu lavoro.

Si no me yero te espesyalizates en la politika mundyal... Komo lo dishe en mi chika introduksyon, en desparte de las varyas informasyones ke mos prezentas, bushkas espesyalmente a estudyar el impakto ke kada evento mundyal puede tener sovre los intereses de muestro payis.

Penso ke esta rubrika es una de las mas interesantes porke djustamente kada akontesimyento es analizado no solo en sus solas limites lokales, ma sovre todo en el konteksto jeneral del momente i en sus reperkusyones posivles sovre el futuro. Ansi, mas ke un lavoro de simple informasyon, tus eskritas son un esforso permanente de analizis , i ken dize analizis supoza refleksyon. Es ke mos puedes avlar a este sujeto?

(repuesta) Por empesar te rengrasyo por tus palavras tan elojyozas. Si, ay 60 anyos ke tura mi karera de editoryalisto i devo dezir ke me syento muy konsernado por los eventos mundyales i por la politika eksteryor de Turkia. Durante largos anyos tuve la okazyon i el kudyo de segir numerozosakontesimyentos mundyales de grande importansa: gerras, golpes de estado, rebueltas, asembleas historikas al nivel universal ets... Mi prinsipyo fue syempre de prezentar mis komentaryos de una manera absolutamente imparsyal i objektiva i de azer mis analizis en tomando en konsiderasyon la perpektiva la mas ancha posivle ..

Segun mi, para pueder realmente komentar los kavzos de una manera absolutamente djusta kale byen konoser el sujeto i sovre todo guadrarmos de todo modo de prejuisyo.Ma malorozamente ay envezes editoryalistos ke komentan varyos temas sovre los kualos no tyenen una konosensya sufizante.Artikolos de este djenero pueden transmeter informasyones yeradas i falsar la opinyon publika.

Esto dicho, no ay dubyo ke kualkyer gazetero es libre de dar su punto de vista en sus artikolos i mizmo de adoptar una atitud ferme, ma en sus analizes el deve apoyarse sovre informasyones sanas . Personalmente so muy estrikto sovre este punto en mis komentaryos faktuales.

(kestyon) Desde la fin de la segunda gerra mundyal, semos testigos de una akselerasyon de mas a mas fuerte del trokamyento de la facha del mundo,ansi ke de la aparisyon de una mueva mentalidad, de una mueva manera de bivir i de una mueva vizyon del mundo ...Eske este trokamyento psikolojiko del ombre de muestra epoka puede influensar la governansa de un payis? Es ke los dirijentes toman en konsiderasyon este punto en sus programa de lavoro?

(repuesta) Es verdad ke munchas kozas trokaron despues de la segunda gerra mundyal, la evolusyon teknolojika i ekonomika modifiko la estruktura sosyal de los grupos humanos. Oy en dia ,en las demokrasias, la opinyon publika tyene grande influensa sovre la politika i ansi sovre la governansa del payis. Los “Konsilyos siviles” (NGO) i las “Asosyasyones de refleksyon” (think-tank)son munchas vezes bastante influentes sovre los dirijentes. En las demokrasias, no es posivle ke eyos no tomen en konsiderasyon la opinyon del puevlo i de las institusyones ke lo reprezentan.Ma por seguro en los governos totalitaryos la situasyon es diferente, eyos no se syenten konsernados por las aspirasyones del puevlo, i mizmo no ezitan a oprimir los ke tyenen la ozadia de kritikar sus desizyones.

A este sujeto, devo adjuntar ke desde un syerto tyempo mizmo en los governos otoritaryos, munchos sitizanos empesaron a azer oyir sus boz. Es ansi ke despues la undisyon del komunizmo, los payizes de la Evropa del Este entraron en un sistema de governansa normal. De mezmo en la Amerika Latina ke bivia entre 1960 – 1980 debasho un sistema diktatoryal, la situasyon empeso a trokar desde el anyo 1990, lo ke se ve tambyen en el Sud-Este de la Asia.

Malorozamente ahuera la Turkia i Israel, no ay munchos payizes en el Oriente-Medyo ke son governados segun los konseptos demokratikos oksidentales. Todavia los ultimos movimyentos de kontestasyon ke se ve estos ultimos tyempos en Iran, mostran ke ayi tambyen la boz del puevlo empeso a azerse oir.En rezumen en muestra epoka ande las distansyas jeografikas se estan de dia en dia enchikesyendo i la komunikasyon desvelopandose entre los puevlos, muevas linyas de governansa paresen espuntar.

(kestyon) En muestro entorno , sentimos kontinualmente un estado de anksyedad. Ande va el mundo?

(repuesta) Esta anksyedad no es un problema propyo a la situasyon aktual. En el pasado leshano komo serkano las personas ya konosyeron semejantes espantos; ansi probablemente la inkyetud de oy no sera la ultima. Devemos syempre tener en tino ke no bivimos en un mundo ideal. Uvo syempre antagonizmos internasyonales, krizas, konfliktos i oy esta kontinuando, ainda en el siglo pasado uvo dos grandes gerras al nivel kaji mundyal i munchos konfliktos lokales entre payizes vezinos. Tenemos ainda bivo en la memorya el rekuerdo de la grande depresyon ekonomika de 1930 ke fue muncho mas huerte ke la ke konosimos el anyo pasado. Oy se esta bivyendo luchas diferentes, de una dimensyon mueva, luchas kontra la terror, kombates asimetrikos, kombates de frontyera ets.. Kual ke sea el motivo, las personas kontinualmente akosadas por la inkyetud de lo ke sera el dia a venir, no biven en un ambiente de estabilidad ni de serenidad...Ma , en konkluzyon, es ke no es las personas eyas mizmas ke metyeron el mundo en este estado?

(kestyon) Por seguro bivimos en un siglo ande, partikularmente en los payizes oksidentales, egziste la libertad de refleksyon i de ekspresyon, lo ke realsa la dinyidad de kada sitizano... ma munchas vezes enkontramos en varyos artikolos de diaryos, komo tambyen en varyas emisyones tele-vizuales , novedades ke no koresponden egzaktamente a la realidad , en syertas sirkunstansyas se persive mizmo “omisyones voluntaryas de algunos detalyos” lo ke falsa la komprensyon de un kualkyer fakto. Es ke esto es tolerado por la deontolojia de la Prensa?

, (repuesta) Malorozamente, mizmo en las Demokrasias no se puede impedir enteramente la difuzyon de novedades ke no koresponden a la verdad. Ay munchas personas ke voluntaryamente o involuntaryamente vyolan el konsepto de la libertad de ekspresyon. Esto es un sujeto sovre el kual lavoro partikularmente en el kuadro de la “International Press Institut (IPI). Tuve la okazyon de partisipar a munchos simpozyumes ke tenian komo tema prinsipal “la libertad de ekspresyon i la responsabilidad de la Prensa”.

Es muy difisil de luchar kontra novedades falsas o yeradas i kontra varyos prejuisyos. Kombatir la dezenformasyon unikamente kon preskripsyones judisyales es kaji imposivle i mizmo muy peligrozo, porke esto puede avrir la puerta a una restriksyon de la libertad de la Prensa.

En las demokrasias, este problema puede ser rezolvido solo libremente en el seno mizmo de los diaryos, grasyas a la voluntad personal i al senso de la responsabilidad de los djornalistos, lo ke naturalmente se desvelopa kon la edukasyon i el renforsamyento de las valores morales. (kestyon) Es ke (segun tu propya eksperyensa) la Prensa tyene la influensa ke le atribuen sovre la opiyon publika? Es ke en un payis demokratiko “eya” puede un poko djugar el rolo de kontra-pezo a la otoridad de un governo?

(repuesta) Por seguro ke en las demokrasias la Prensa tyene la kapasidad de influensar i dirijir la Opinyon publika i mizmo envezes eya djuga el rolo de kontra-pezo a la otoridad del governo . Grasyas a la Prensa, varyos abuzos de konfiansa perpetrados por algunos dirijentes o grandes administradores salen a luz, entonses los ke se topan komprometidos en este djenero de eskandalos demisyonan i akontese mizmo ke, en syertos kavzos, la Djustisya intervenga...Esto todo es uno de los importantes rolos ke la Prensa asume en una demokrasia, lo ke es muy provechozo para el puevlo, ma ke no es posivle en los payizes ke mankan de libertad i ande la Prensa es sometida a la voluntad governomental

(kestyon) Ke son tus previzyones por la dekada 2010 – 2020 ? Es ke ay esperansa (si no de una verdadera armonia mundyal) a lo menos de un estado de no-belijeransya?

(repuesta) Devo ser endevino i tener delantre de mi una bola de kristal para pueder responder a esta kestyon ...Komo lo dishe poko antes, no bivimos en un mundo ideal, en kada dekada akontesen eventos negativos, gerras, pletos, dezastres meteorolojikos, terremotos, diluvyos , krizas ekonomikas i mizmo en algunos lugares (espesyalmente en la Afrika) ambrera i epidemias ets...Por seguro al prinsipyo de kada muevo anyo las personas manifestan sus dezeo de ver akonteser faktos pozitivos. Kualo ke diga ? Ýnþallah la mueva dekada sera mas klemente, kon mankos kombates, mankas krizas , mas amistad i mas serenidad.

Ma kuando mos akodramos de ande provyenen la mas parte de estos akontesimyentos negativos “kreer ke eyos no se van mas repetar” sera una prova de indjenuidad (saflik).Mira el estado del mundo... en kada lugar ay una rekrudesensya de nasyonalizmo i de fanatizmo... entre los payizes pujan los pletos i las polemikas ansi ke los sentimyentos de inimistad i odyo.

De otra parte vemos una intensifikasyon de la kalor del klima universal, lo ke endjendra problemas seryozos, el presipisyo entre los rikos i los proves se esta engradesyendo i devinyendo de mas a mas profundo ...Komo puede aver una mejoria tanto ke esto kontinua, tanto ke las personas no azen un esforso para remedyar a esta situasyon?

(kestyon) Es ke en un futuro serkano ay posibilidad ke la prensa elektronika (numerika) remplase kompletamente los diaryos i revistas sovre papel?

(Repuesta) No...i no es porke lavoro en la Prensa eskrita, ke yo do esta repuesta . Es verdad ke la prensa i las komunikasyones elektronikas se espandyeron muncho i mizmo pasaron delantre la prensa eskrita, lo ke puede konstituir una amenaza para el futuro de las gazetas. Todos i yo tambyen ke lavoramos en la prensa eskrita vemos klaramente sus avantajes, de los kualos mos aprovechamos tambyen. Esto va kontinuar ansi i mizmo munchos diaryos i revistas van puede ser dezapareser....La prensa eskrita va probavlemente enchikeserse, ma su prezensya i su influensa van kontinuar....Sera lo ke sera, ay i avra syempre munchas personas por las kualas “ asentarsen en sus poltronas i meldar las ultimas novedades o los varyos komentaryos sovre la situasyon en una pajina de papel” reprezenta un plaze partikular.

-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-

- Copyright © sefarad.org - , 1997 - 2017

Retour au Site sefarad.org

Loading