Accueil - sefarad.org

Dr. Prof. Moise Bahar : Un Ombre de syensya, un ombre profundamente humano

    MENU    
Sefarad
[Klara]
Help us
Retour
Dr. Prof. Moise Bahar : Un Ombre de syensya, un ombre profundamente humano

Azer el elojyo de las kualidades profesyonales i syentifikas de Moise Bahar sera komo kerer avrir una puerta ke ya esta avyerta.Todo afirma la valor de su karrera: su reputasyon profesyonal al nivel nasyonal i mizmo ahuera de Turkiya ansi ke su “Curriculum Vitae” elkual es tanto riko ke es kaji imposivle de rezumirlo.

Su situasyon profesyonal aktual es: 1 Profesor de Anastezia i Kudyos Intensivos en la Fakultad de Medikeria de Cerrahpaþa .2 Direktor del Departamento Jeneral de Kudyos Intensivos en el Hospital Amerikano de Istambul

En desparte de su briyante situasyon profesyonal , todo en su “manera de ser” atesta la valor de su potensyal personal riko en humanizmo: su avyertura a sus proksimos , su ponderasyon natural al servisyo de un esprito inkontestavle de analizis, ansi ke la klaridad de su razonamyento i la agudeza de su mirada syentifika ke van mas leshos ke lo ke es vizivle, i enfin, lo ke es tambyen muy importante, su komprensyon afektiva enverso sus pasyentes.

Es la razon por lakuala, en esta chika eskrita, no kero solo azerlo avlar del ombre de syensya ke el es , ma de la suma de humanizmo ke ay en el, i de la proksimidad afektiva ke el save krear kon kuala persona ke sea.

Kero tambyen azerlo avlar de su lucha insesante, kon o sin esperansa, para venser la dolor i la muerte.

------------------------------------------------------------------------------------------------------------- Kestyon Profesor Dr Bahar, komo lo dishe en mi chika introduksyon no es solo al Ombre de Syensya ke yo kero formular mis kestyones, tu reushita profesyonal ya konfirma tu valor syentifika, i nombrozos komentatores muncho mas kompetentes ke mi ya lo izyeron. Oy kero avlar del “humano” ke se topa detras del ombre de syensya. Paralelmente al profundo lavoro de refleksyon ke kontyene tu manera de pensar, tuve munchas vezes la okazyon de ser testigo de la suma de komprensyon i piadad enverso “los otros” ke ay en ti.

Agora empesaremos el interrogatoryo: Despues de aver kumplido tus estudyos eskolaryos, kualo es lo ke te pusho a eskojer komo karrera profesyonal ”la Medikeria” ramo de los estudyos universitaryos ke nesesita el koefisyente de puntos el mas alto?

Repuesta Despues de aver kumplido mis estudyos eskolaryos en 1964, mi ideal era de ir estudyar la “literatura” en Fransya , ma era tambyen el anyo de la inogurasyon en Turkia del sistema sentral de un konkorso prealable,afin de ser admetido en la esfera universitarya.

Partisipi al konkorso i sovre un kontenjente de 500 estudyantes ke se avian prezentado para ser resividos a la fakultad de Medikeria , fui klasado 50en . Entonses sovre la insistensya de mi famiya i partikularmente de mi madre, ize mi inskripsyon en esta fakultad.

Kestyon Tu “Curriculum vitae” muy largo, mostra tu enkaminamyento kontinual en el kampo syentifiko... kualo motivo este dinamizmo kaji permanente?

Repuesta Penso ke el ambiente ande me topava djugo un grande rolo. Era un buen elevo en el liseo, ma solamente en los ramos ke me interesavan realmente. Kuando entri a la universidad, al empesijo, no me senti muy entuzyasto por la “Anestezyolojia ni por la espesyalizasyon en los Kudyos intensivos”, lakuala era un ramo relativamente muevo de la medikeria, en Turkia komo en el mundo. Ma, avia al interyor de esta syensya, munchos espasyos a profundisar, por los kualos me senti muy konsernado, partikularmente “la Syensya Neurolojika”. I kuando empesi a ir mas al fundo de mis estudyos, me apersivi ke era el primer en el espasyo de de la “Neuroanestezia i Neuro Ýntensivos kudyos” ; mi motivasyon gradualmente se intensifiko, i me enfoki ainda mas en mi aktividad universitarya.

Entre las realizasyones ke pude kumplir, las ke me prokuraron las ma grandes satisfaksyones fueron de institusyonalizar el medyo ande lavorava i de estableser muevos servisyos de “kudyos intensivos”. Mizmo oy en dia una semejante aktividad me incheria de alegria.

Kestyon En tu kualidad de Shefe del servisyo de reanimasyon del Hospital Amerikano de muestra sivdad, penso ke sos munchas vezes testigo de kavzos ke se prezentan komo irremedyavlemente dezesperados a primera vista. En semejantes kavzos es ke pensas ke kale intervenir kuala sea la situasyon? Es ke para ti, “ luchar para mentener una persona en vida, mizmo si eya esta en un estado vizivlemente irrekuperavle” es una kondisyon “sine qua non” de la Etika Medikal?

Repuesta No es posivle de pueder dar una repuesta kategorika a esta kestyon.(Komo ya lo saven todos ,en el paviyon de los “kudyos intensivos” se topan jeneralmente personas en estado de grande risko vital. Muestro objetivo es de azerlas retornar a la vida normal .En el korso de esta intensa aktividad , aparesen envezes indisyos ke mostran ke la muerte es inevitavle. Entonses eksplikamos la situasyon a los serkanos del pasyente, algunos de entre eyos mos dizen de interrumpir los kudyos. Alora empesa el problema etiko . La lojika konfirma probablemente la egzaktitud de esta desizyon ma esto puede krear una situasyon kontrarya a las leyes de la Juridiksyon Turka.

Aunke en algunos payizes estranjeros , en syertos kavzos de flagrante sertitud kel pasyente es irrekuperavle, “kortar los kudyos intensivos medikales” es konforme a la ley, se diskute syempre de esta kestyon del punto de vista de la” Etika” .

Kestyon Una kestyon muy indiskreta: “ ke resyentes , tu, grande kombatante por la vida, kuando in ekstremis entyendes ke no ay mas nada a azer ? i tambyen kualo resyentes kuando malgrado la kaji absensya de esperansa ke prezentava al prinsipyo un kavzo, parvyenes kon tu ekipo a salvar el moribundo?

Repuesta Mis refleksyones aktuales son diferentes de las ke tenia munchos anyos antes. Kon la progresyon de mi eksperyensa, mis esforsos se konsentraron de mas a mas a aplikar el tratamyento medikal ke tyene lo manko posivle de risko de yero, afin de asegurar la supervivyensa de los pasyentes. Ma en algunas sirkunstansyas muy graves no es posivle de no tomar en konsiderasyon la realidad. Oy en dia no me revolto komo en mi manseves i aksepto ke la muerte es una egzijensya de la Natura.

Esto dicho, en algunas sirkunstansyas, semejantes kavzos son la konsekuensa de un tratamyento medikal mal echo en otros hospitales o de diagnostikos muy tardivos i kuando inevitavlemente, malgrado todos muestros esforsos , no se puede obtener ningun rezultado pozitivo , mi tristeza es muy grande. En mi kualidad de profesor me syento ovligado de repetar a los mansevos ke la sola solusyon es “estudyar...estudyar...kontinualmente estudyar...Es tambyen lo ke syempre repeto en los korsos ke tengo el plazer de dirijir en multiples lugares de la Turkia.

Kestyon En una de tus konferansyas, tyenes avlado de la importansa del faktor psikolojiko en el kombate de un pasyente kontra la muerte. Es ke mos puedes avlar sovre este sujeto?.

Repuesta Si es verdad. Esto no es solamente mi observasyon personal ma igualmente la opinyon de munchos de mis kolegas. En periodo de grave desrepozo, las personas ke son fuertemente atadas a la vida pueden, grasyas a esta estruktura psikolojika, venser mas fasilmente las difikultades i de una manera kaji imprevizivle eyas profitan del tratamyento medikal ke les es aplikado..

Kestyon Pasaremos a otro sujeto. No se si es una koensidensya , o puede ser un fenomeno psikolojiko kreado por el kontakto kaji permanente kon la sufriensa, ay kon grande frekuensa en la profesyon medikal , una sensivilidad espesyal i una grande atraksyon verso sujetos artistikos i literaryos. Es ke se trata solo de koinsidensya?

Repuesta Envezes la formasyon profesyonal puede meter en evidensya munchos donos i kompetensyas. En los grupos ke lavoran de una manera intensiva en la Medikeria , esta probabilidad es proporsyonalmente ainda mas alta. Yo no tengo un kualkyer talento artistiko, por kontra eskrivo bueno i tengo la esperansa de valorizar este dono a la epoka de mi jubilasyon.

Kestyon Prof. Dr Moise Bahar , tu kerida mujer “Emel” me tyene dicho un dia ke tuvites difikultades en tus estudyos eskolaryos al nivel de la primera klasa del liseo, lo ke es muy koryente a un syerto periodo de la adolesensya . Te rogo de embiar un mensaje a este sujeto a la manseves.

Repuesta Remarki ke munchos de mis amigos de klasa ke terminaron la eskola de una manera relativamente briyante no pudyeron reushir en sus vida profesyomal.

Durante mis konversasyones kon mis propyos ijos i kon munchos otros mansevos, les digo ke no fui personalmente un elevo partikularment performante, dobli mizmo la primera klasa del liseo; avia munchas otras kozas ke kaptavan mi atensyon. En este periodo, kuando parvenia a reushir kualkyer echo sin ninguna relasyon kon la eskola , me apresurava detras de un muevo i esto me prokurava muncho plazer.

Esto, asta ke empesi mis estudyos de medikeria, kuando me apersivi ke avia tantas i tantas kozas a ambezar, me arresti de okuparme de kualkyer otra koza . En el espasyo de la Medikeria immedyatamente despues de aver ambezado un sujeto , ya espunta un segundo ke no konosemos i esto ainda kontinua.

En ke profesyon ke sea, ay este ovligo de syempre kontinuar a ambezar . En desparte del apoyo i de la armonia familyal , el kamino de la felisidad pasa por el esforso de syempre ambezar i syempre produzir.

Mersi Profesor, mersi Moise Bahar

-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-_-

- Copyright © sefarad.org - , 1997 - 2017

Retour au Site sefarad.org

Loading