El nes del pan

    MENU    
Sefarad
[Vii avlaremos]
Help us
Retour

El nes del pan

Al tiempo las personas eran a la buena parte 1 i se kreiían en el nes 2 , ma pensavan ke kuando un nes ke akontesió viene deskuvierto, se desparese.
Kuando yo era chika mi mamá me kontava una konseja, ke uzava kontarle la nona suya:
“Avía una mujer muy prove ke tenía una grande famiya de darle djoap. Esta mujer fue un día a kitar pan de la kasha, para aprontar a komer para la famiya, i vido ke la kasha está yena de pan. Esto le vino muy kuriozo, porké ya savía ke no pudía aver en la kasha este karar de pan, i pishín pensó ke le akontesió un nes. Ma no avló kon dinguno.
Ansí kontinuó unas kuantas vezes. Kada vez ke eya iva a kitar pan de la kasha, la topava yena de pan, asta ke la famiya metió tino ke todo el tiempo avía muncho pan en kaza.
Eyos empesaron a demandar i a peskuzar, ma la mujer, ke ya savía ke si iva a deskuvrir el sekreto del pan, el pan de iva a despareser, no savía kualo responderles, i kada vez les dizía otra koza. Ma eyos no se kreiían, i a la fin, tanto le izieron, ke una vez no pudo mas guadrar el sekreto i les kontó la verdá.
Les disho: “Kada vez ke vo a kitar pan de la kasha, la kasha está yena de pan! Es un nes!”
I akontesió lo ke la mujer ya savía. Después de akel día, kuando fue a kitar pan para aprontar a komer, la kasha estava vazía!
Ay dizientes ke si eya no deskuvría el sekreto, el nes iva a kontinuar a repetarse por siempre.

Kontado por Lea Basson – 1985
Notado i redaktado por Matilda Koén-Sarano

1° a la buena parte: naívo en senso pozitivo
2° nes: (en ebreo): mirákolo

- Copyright © 2001-2009 Moïse Rahmani -
Google
sefarad.org