El nombre de Saragoza

    MENU    
Sefarad
[Vii avlaremos]
Help us
Retour

Matilda Koén-Sarano

La sivdad de Saragoza se yamava en prinsipio Salduba. Después los romanos la yamaron Cesar Augusta, i después de eyos los árabos la yamaron Sarkosta. Sovre el nombre Saragoza ay una lejenda ke dize ansí: Avía un rey en Aragón ke kería muncho bien a los djudiós, i de tanto ke les kería bien, ke se kazó kon una mujer djudía oriunda de Salonik, ke se yamava Sara.
En Saragoza avía un uzo ke el día del kumpleanyo del rey todas las minorías pasavan delantre de él en un desfile, yevando los símbolos de sus puevlos. Entre eyos desfilavan los djudiós también, yevando los Sefarim 1 entre sus brasos.
Esto afitava kada anyo, asta ke un día vino un rabino muevo en la komunitá i disho: "Mirá, en yevando los Sefarim por las kayes, ay sekaná 2 ke la Ley muestra venga profanada. Yevaremos las kachas vazías, deshando las pergamenas en el kal 3 ."
I ansí fue echo. Ma esto era un sekreto ke savían sólo los djudiós.
Un día vino un djudió ke se konvertió, i fue se lo kontó al rey. Le disho: "Sinyor rey, ansina i ansina... los djudiós te están aziendo un afronto muy grande..."
El rey se ofensó muy muncho. Yamó a sus konsejeros i les demandó:
"Kualo vamos azer en este kavzo?"
Le disheron los konsejeros: "Sinyor rey, aspera al día de tu kumpleanyo, i kuando van a pasar delantre de ti los djudiós, les vas a dizir ke avran las kachas de los Sefarim. Si las vas a topar vazías, komo te disho este ombre, vas a mandar la komunitá entera a la muerte."
"Bueno!" disho el rey.
"Ma mira," le disheron eyos, "ke tu mujer es djudía. Kuando eya lo va vinir a saver, va ir a avizar a su puevlo. Para ke no pueda azerlo, ensérrala de agora en sus kamaretas!"
Ansí ke Sara fue enserrada en sus kamaretas, i el puevlo no la vido mas.
La noche antes del desfile el rabino de Saragoza se sonyó un esuenyo muy kuriozo.
Una boz le estava diziendo: "Alevanta! Alevanta presto! Va, mete atrás las pergamenas adientro de las kachas de los Sefarim ke van a desfilar amanyana!"

En prinsipio el rabino no dio pezgo a esto, ma kuando la boz tornó a repetarse otras dos vezes, él se alevantó de la kama, fue al kal i metió atrás las pergamenas en las kachas de los Sefarim, sin dizir nada a dinguno.
A la demanyana de después están todos asperando ke va pasar el desfile: el rey, los konsejeros, el traidor, el puevlo... Sólo Sara no está. Al kavo de todos, pasaron los rabinos djudiós kon los Sefarim entre sus brasos.
Se alevantó el rey de su siya i disho: "Avrí las kachas, ke kero meldar un verso de la Ley vuestra."
Los djudiós estavan un espanto!... porké ya savían ke las kachas estavan vazías. Ma no pudían azer nada. Tenían de avrirlas!
Kuando el rey se aserkó i eyos avrieron las kachas, él vido ke las pergamenas estavan adientro.
Entonses el rey, loko de la alegría, korrió a las kamaretas de la mujer, diziendo: "Sara, goza tu libertad! Sara, goza tu libertad!"
Sara salió afuera, i el puevlo ke sintió: "Sara goza", dechizó de vista de yamar la sivdad Saragoza.
El traidor fue enkolgado, i los djudiós izieron una fiesta grande ke se yamó "el Purim 4 de Saragoza", ke kedó asta muestros días en algunas famiyas sefaradías.
(Yerushaláyim 1992, inédito).

1.Sefarim : Los rolos de la Ley
2 sekaná (idem: sakaná): períkolo

3 kal (idem: kaal: públiko): sinagoga
4 Purim (en ebreo): suertes. Fiesta djudía: En los días 14 i 15 del mes de Adar los djudiós fiestan la salvasión el puevlo entero kondenado a la eksterminasión total por Hamán, ministro del Imperio Persiano. El Purim de Saragoza se fiestava un mes i medio antes de Purim.

- Copyright © 2001-2009 Moïse Rahmani -
Google
sefarad.org