La kantiga del korasón

    MENU    
Sefarad
[Vii avlaremos]
Help us
Retour

La kantiga del korasón

Después de una pauza de un anyo, finalmente el Festiladino está tornando esta noche sovre la shena. Todos mozotros, los organizadores, los autores de las kantigas i el públiko lo estamos asperando kon alegría.Todos los ke estuvieron prezentes por kuatro vezes en esta nochada spesial, yena de kolores i kantes, está asperando el Festiladino kon grande empasiensia. En estos dos anyos fueron echos grandes esforsos de parte de los organizadores para renovar la kompetisión. Los autores en todo el mundo estuvieron kompozando kantigas, kon la esperansa de poderlas mandar al Festiladino. En efekto apenas fue publikado ke el Festiladino se estava renovando, arivaron a la kompetisión kaje 50 muy ermozas kantigas muevas de Espanya, Italia, Gresia, Turkía, Estados Unidos, Canada, Argentina, Mexico, Brazil i, naturalmente de Israel. En las kantigas ke arivaron este anyo notimos una puja en el livel de las palavras i la múzika, i la partisipasión de autores de fama mondial. A parte de esto apuntamos kon muncho plazer ke vinieron a kantar esta noche sovre esta shena kantantes del estranjero también. Eyos konfirman kon sus partisipasión el karakter enternasional del Festiladino, i el enteresamiento ke están demonstrando siempre mas autores en Israel i al estranjero. Esto demonstra ke el entereso jeneral sovre el ladino está pujando i se está difundiendo en el mundo, grasias al Festiladino también. En los sujetos tratados este anyo vemos ke el amor tiene un lugar predominante i munchos aspektos: puede ser el primer amor, el deskarinyo de amor, el amor djoven o el de la maturidad. Otro sujeto, de no minor emportansa ke se nota en las kantigas, es la Espanya i el amor por eya. En las otras kantigas topamos la alavasión al Dio i un buen pranso de shabat. Esta noche tendremos el plazer de ver i sintir kantantes ke ya konosemos i otros ke vamos a oyir por la primera vez, ma no ay duda ke todos son de muy alto livel, i este Festiladino, komo los otros, va azer deskuvrir estreyas muevas en el kampo del kanto en ladino. Además el programa artístiko intermedio mos prezentará, este anyo mas de siempre, ermozas i ezmovientes sorprezas.

Kero rengrasiar de todo mi korasón a los organizadores de este evenimiento, i antes de todos a Mony Moreno Armoza, Eli Matitiahu i Ziva Almagor, ke se empenyaron por dos anyos para la reushita del Festiladino 2008. Además rengrasio a todos los artistas ke prezentaron sus kantigas. Muestra rekonosensia va a los ke sus kantigas suvieron o no suvieron a la final en la mizma manera. Grasias a los maraviyozos kantantes ke vamos oyir esta noche, grasias al maestro de orkestra Rony Weiss i al aranjador Sergey Abir, ke mos akompanyan por el treser anyo, i grasias a la Orkestra Sinfónika Yerushaláyim de la Radio de Israel. No mos ulvidaremos de rengrasiar al rejisor Shuki Wagner, i a todos los ke kontribuyeron en varias maneras a la reushita de esta nochada. Grasias también al Teatrón Yerushaláyim i a la Televizión Israelí, ke mos permeten de divulgar el Festiladino en todo el mundo.

A todos felisitasiones i reushita buena!

Matilda Koén-Sarano

- Copyright © 2001-2009 Moïse Rahmani -
Google
sefarad.org