Pintores djudiós : Amedeo Modigliani

    MENU    
Sefarad
[Vii avlaremos]
Help us
Retour

Pintores djudiós

Amedeo Modigliani (Livorno, 1884 – París, 1920)
De Wikipedia

Pintor i eskultor italiano, ke nasió en Livorno en una famiya djudía. Kresió en provedá, i tenía problemas de salú, después de un atake de tifus ke tuvo a 14 anyos, al kual segieron antes atakes de puntada i dos anyos después la tuberkulozis. Demonstró imediatamente una grande pasión i un grande talento por el desén. A la edá de 14 anyos empesó a estudiar pintura en Livorno kon el pintor Guglielmo Micheli, ande el kual konosió al grande pintor Giovanni Fattori. En el 1902 se enskrivió a la "Scuola Libera del Nudo" en Firenze, i un anyo después se fue a Venezia i frekuentó el "Istituto per le Belle Arti di Venezia". Es en Venezia ke Modigliani provó el hashísh, pasando el tiempo en los kartiés mas bashos de la sivdad. En el 1906 se transferó a París, i moró en Montmartre, en una komuna por artistas sin dinero. En prinsipio fue enfluensado por la pintura de Toulouse-Lautrec, asta ke Paul Cézanna trokó sus ideas i él dezvilupó un estil suyo úniko, ke se veye en sus famozos retratos i en los kuerpos dezmudos. Después Modigliani se asosió a Chaim Soutine i Maurice Utrillo, ke fue su mijor amigo. En el 1909 él boltó a Livorno, hazino i debilitado por su vida korrumpida, ma no kedó muncho ayá i tornó a París, ande alkiló un estudio en Montparnasse, ande empesó a okuparse de skultura. De este periodo akodrermos los platos kon las bokas i las narizes tuertas i las gargantas largas. Ma muy presto tuvo de deshar la skultura a kavza de los polvos, ke ésta produsía, i ke peoreavan su malatía. Entre sus famozos retratos topamos los de Chaim Soutine, Pablo Picasso, Max Jacob, Juan Gris, Jean Cocteau i otros. En su vida vendió munchos kuadros por pokos frankos, i el dinero se iva en alcol i drogas. Tuvo una sola muestra en el 1917 en París, ma el shefe de la polisía, eskandalizado por sus kuadros de mujeres dezmudas, izo serrar la muestra después de pokas oras.
Después de varias relasiones pasajeras, en el 1916 Modigliani empesó una relasión kon Jeanne Hébuterne, antes su model, i después su kompanya, ke el 1918 tuvo una ijika, i kuando el pintor murió en 1920, se suisidó, echándose de la ventana kon la kriatura ke estava asperando.
Amedeo Modigiani es konsiderado uno de los mas grandes pintores del siglo XX i sus ovras se topan en los mas grandes muzeos del mundo.

- Copyright © 2001-2009 Moïse Rahmani -
Google
sefarad.org