Pintores djudiós : Julius Mordecai Pincas

    MENU    
Sefarad
[Vii avlaremos]
Help us
Retour

Pintores djudiós

Julius Mordecai Pincas,
konosido komo
Jules Pascin (Pasken) (Vidín, Bulgaría, 1885 – París, 1930)

De Wikipedia

Jules Pascin (Pasken) nasió en Bulgaría en una famiya sefaradía de parte de padre i serbo-italiana de parte de madre. El izo estudios artístikos antes en Viena i en Mónako, i en el 1905 adoptó el pseudónimo, kon el kual es konosido komo pintor. Kon este nombre empesó a kontribuir kon sus desenes en el magazín satíriko "Simplicissimus" en Mónako. En el 1905 arivó a París i empesó a azer parte de la grande migrasión de artistas a esta sivdad. En el 1907 Pascin (Pasken) enkontró la pintora Hermine Lionette Cardan David, i eyos bivieron endjuntos asta ke en el 1914, él se fue a la Amérika. En el mizmo anyo eya se reunió kon él en Amérika. El bivió ayá del 1914 al 1920, i se kazó kon Hermine. Los dos pintaron en New York City, en Miami, en New Orleans i en Cuba. Pascin tomó la sivdadanía amerikana, ma en Fransia era el simbol de la komunitá artístika de Montparnasse. Pascin (Pasken) izo también una vijita en Bulgaría en el 1923/1924 durante un tiempo indefinido. El kreó sienes de akuarelas i de eskisas, plus desenes i karikaturas, ke vendía a varios jurnales i magazines. El estudió la arte del desén en la Akademia Colarossi, i komo Toulouse-Lautrec antes de él, desinó sus amigos, ombres i mujeres, El kería azerse un pintor emportante, ma pasava periodos de onda depresión, en duda sovre su talento. Sus desenes se vendían bien, ma él gastava de vista el dinero, organizando pikniks de enverano a la oriya de la Marna, para un grande grupo de amigos. Pascin (Pasken) sufría de depresión i alkolizmo, i se suisidó en una manera teatral, kortándose las venas i enkolgándose en su estudio en Montmartre. Sovre la paré eskrivió kon su sangre un saludo a su último amor, Cecile (Lucy) Vidil Krohg, a la kuala deshó en su testamento la metá de sus bienes. Mientres la otra metá la deshó a su mujer Hermine David. El día de su funeral todas las galerías de arte de París estuvieron serradas.

- Copyright © 2001-2009 Moïse Rahmani -
Google
sefarad.org