Pintores djudiós : Camille Pissarro

    MENU    
Sefarad
[Vii avlaremos]
Help us
Retour

Pintores djudiós

Camille Pissarro
(Santo Tomás, 1830 – París, 1903)
De Wikipedia

Camille Pissarro fue un pintor impresionista, el menos impresionista de todos. Ma komo dekano del Impresionizmo tuvo un rolo muy emportante komo gía artístika.
Antes de estableserse en Fransia él fue a Caracas, akompanyado de su maestro, el pintor danés Fritz Melbye, i se dedikó kompletamente a la pintura. Pero tuvo de tornar a Santo Tomás para ayudar en el komercho de sus djenitores.
En el 1855 se transferó a París, onde estudió en la Eskola de Beyas Artes i en la Akademia de Jules Suisse. Estudió kon el paizajista fransés Camille Corot i se izo amigo de Monet, Cézanne i Guillaumin. Pissarro i Monet se enkontraron en Londra, ande izieron estudios de edifisios envueltos en las nievlas. Tornando en Fransia él partisipó al movimiento impresionista, i fue el úniko ke partisipó a las ochos ekspozisiones del grupo (1874-1886).
Durante la Gerra Franko-prusiana (1870-1871) tornó a bivir en Inglitierra, ande estudió arte inglés, sovre todo en los paizajes de William Turner. En los anyos `80 produizió shenas de ríos i paizajes de kampanya franseza, i shenas de kalejas de París, komo "La kaye Saint-Honoré después de mediodía", kon el efekto de la luvia.
Después de un periodo neoimpresionista, tornó al lirizmo i al esplendor kromátiko del impresionizmo. Son famozas sus shenas de Montmartre. En el 1895 su malatía de ojos peoreó i lo uvligó a pintar paizajes de la ventana de su kaza: Avenida de la Opera, Jardino de las Tullerías, Efekto de nyeve.
Sus ovras, ke espasian en todos los djéneros, se topan en kaje todos los muzeos de arte moderna en el mundo. Komo profesor tuvo por elevos a Paul Gauguin, a Paul Cézanne, a su ijo Lucien Pissarro, i a la pintora amerikana Mary Cassatt.

- Copyright © 2001-2009 Moïse Rahmani -
Google
sefarad.org