Sientistas sefaradís : Kalmi Baruh

    MENU    
Sefarad
[Vii avlaremos]
Help us
Retour
Sientistas sefaradís

Kalmi Baruh
(Sarayevo, Yugoslavia 1896 – Bergen Belsen, 1945 )
De Wikipedia

Kalmi Baruh nasió en Sarayevo en el 1896 en una de las mas antikas famiyas sefaradías de Bosnia. El era un envestigador en el kampo de la lingua djudeo-espanyola, un pionier en los studios sefaradís i ispánikos en la pasada Yugoslavia. El eskapó la eskola elementar en la sivdad de Vishegrad i tomó su bakaleorado en el liseo de Sarayevo. Su P.H.D. sovre "The Sound System of the Judeo-Spanish in Bosnia" le fue otorgado en la Universidad de Viena. El ambezó en el primer gimnasio en Sarayevo i fue el solo estudiante de la Peninsula Balkánika ke resivió del Governo espanyol la posibilitá de azer el post-doktorado en el Sentro para Estudios istórikos en Madrid (1928-1929). Por muncho tiempo él kolaboró kon algunos magazines yugoslavos i evropeos en el kampo de la linguístika i de la liteatura, komo la "Revista de filología española" (Madrid). El kolaboró kon el Instituto de Estudios Balkánikos, la Universidad de Belgrado i la Real Akademia Espanyola. Izo traduksiones del espanyol al serbo, publikó estudios linguístikos komparativos, livros de eskola i ovras sientífikas sovre revistas filolójikas, sovre todo en linguas románikas. El arrekojó, notó i envestigó formas linguístikas djudeo-espanyolas i romanses através la Bosnia, Prístina i Skopya. El era uno de los pilares de la revista progresiva "Pregled". El kooperó kon el Prof. Ernesto Gimenez Caballero, el Dr. Ivo Andric, Isadora Sekulich, Dr. Moric Levi, Laura Papo (Bohoreta) i otros. Baruh avlava 10 linguas, entre eyas el Sebo-Croato, el ladino, el espanyol, el fransés i el almán. Durante los anyos `30 fue uno de los mas eminentes intelektuales yugoslavos, orientados a la siendra. Baruh dava una atansión spesial a los elevos de nivel sosial prove, a la toleransia inter-relijioza i kombatía kontra el antisemitizmo. El murió en el 1945 en el kampo de konsentrasión nazista de Bergen Belsen.
En el 1971 los Profesores Samuel Armistead i Joseph Silverman de la Universidad de Pennsylvania en Philadelphia traduizieron al inglés las romansas espanyolas de los djudiós de Bosnia, arrekojidas por Baruh, i las korredaron de sus lavoro sientífiko.

- Copyright © 2001-2009 Moïse Rahmani -
Google
sefarad.org