Sientistas sefaradís : Aarón Valero

    MENU    
Sefarad
[Vii avlaremos]
Help us
Retour

Sientistas sefaradís

Aarón Valero
(Yerushaláyim, 1913 - 2000)
De Wikipedia - Internet

Aarón Valero nasió en Yerushaláyim en el 1913 en una destingida famiya sefaradía, ke se avía establesido en Palestina al prinsipio del 1800 de parte de padre, i en el 1400 de parte de madre. Su tarapapú, Jacob Valero, fondó la primera banka en Palestina. Aarón Valero fue médiko i edukator israelí, ke ayudó a fondar ospitales i eskolas medikales, publikó emportantes ensayos medikales i kontribuyó grandemente al adelantamiento de la edukasión medikal en Israel en la sigunda metad del siglo XX. El estudió en la Gymnasia Ivrit en Yerushaláyim, i resivió un M.B.Ch.B. en la Universidad de Birmingham en Inglitierra. Tornado a Yerushaláyim, se dio volontario a lavorar en el Ospital Hadasa en el 1939. Del 1941 al 1946, durante la Sigunda Gerra Mondial sirvió komo volontario en el "Medical Corp" de la armada británika, i arivó al grado de major. En el 1946 se unió al ekipo del ospital britániko de Haifa, ke mas tadre se transformó en el ospital Rambam, del kual él fue el fondador. En el 1948-1949, durante la Gerra de Endipendensia él sirvió komo doktor de rejimento en el fronte del Nord. En el 1956 se izo shefe del Departamento de Medisina Interna en el ospital Poriya. El fue el primer a rekonoser i a deskrivir el eklatamiento de la peste bubónika en Palestina. Al prinsipio de los anyos `60 el doktor Valero deskuvrió el potensial de la enerjía kondjunta entre el personal klíniko en el Ospital Rambam de Haifa i los enjenieres en el Instituto de Teknolojía del Tehnión de Haifa mizma. El organizó i reunió ekipos de las dos institusiones, ke enkavesó. Esta kooperasión spesial jeneró el Biomedical Engineering Department del Tehnión, i dio komo primer produkto un kondjenyo kapache de enrejistrar las pulsasiones arteriales, i los eventos mekánikos del korasón, sin tener kontakto kon la kasha toráchika. Este kondjenyo fue deskripto por la primera vez en el "American Journal of Cardiology" en el 1967.
Su primer livro "Clinical E.C.G." fue publikado por la Kaza Editora del Tehnión, i su sigundo livro "Beside Detection" fue publikado en el 1980. En el 1980 se izo dekano de la Edukasión Medikal de la Fakultad de Medisina del Tehnión. Del 1980 al 1986 fue i shefe del Departamento de Medisina Interna en el Ospital de Naariya. Aarón Valero ensenyó a numerozas jenerasiones de estudiantes israelís i médikos rezidentes. El murió en el 2000. En el 2002 fue fondado el Fondo Aarón Valero por el adelantamiento de la edukasión medikal por la famiya Valero en memoria del Doktor Aarón Valero.

- Copyright © 2001-2009 Moïse Rahmani -
Google
sefarad.org