Sientistas sefaradís : Rita Levi-Montalcini

    MENU    
Sefarad
[Vii avlaremos]
Help us
Retour

Sientistas sefaradís

Rita Levi-Montalcini
(Torino, Italia, 1909) De Wikipedia - Internet

Rita Levi-Montalcini nasió en Torino en una famiya djudía sefaradía, i endjuntos a su djemela Paola era la mas djoven de 4 kriaturas. Su padre, Adamo Levi era un enjenier muy dotado, i era matemátiko también. Su madre, Adele Montalcini era una pintora yena de talento. Rita Levi-Montalcini fue en el 1930 a estudiar medisina en la eskola medikal de Torino, debasho de Giuseppe Levi, se graduó en el 1936 i lavoró komo asistente de Levi asta el 1938. Ma su karriera akdémika fue enterrumpida por el "Manifesto de la Razza", i su konsekuente entroduksión de las leyes ke impedían a los djudiós las karrieras akadémikas i profesionales. Durante la Sigunda Gerra Mondial, eya izo eksperimentos en un laboratorio montado en su kaza, estudiando el inyervo del kresimiento en embriones de poyos. Su primer laboratorio de djenétika estava en su kamareta de echar. En el 1943 su famiya se transferó a Firenze, i ayá eya se formó un laboratorio suyo. Ayá eya estuvo en kontakto kon algunos keridos amigos, i korajozos partizanos del "Partito d`Azione". Kuando los almanes desharon Firenze, eya fue asinyada a un kampo de refujiados de gerra, ke vinieron del nord a Firenze, i partisipó a sus sufriensas i al períkolo kotidiano de muerte, siendo ke estavan afektos de malatías enfektivas i del tifo abdominal. En el 1945 su famiya tornó a Torino. En el septembre del 1946 eya akseptó la envitasión de lavorar en la Universidad de Washigton en St. Louis, debasho la supervizión del profesor Viktor Hamburger. Aún ke la envitasión era para un solo semestre, eya kedó ayá por 30 anyos. Es ayá ke eya izo su mas emportante deskuvierta en el 1952, de la izolasión del inyervo NGF, observando un muy rápido kresimiento de los inyervos de las sélulas de siertos tishidos kanserozos. En el 1958 eya se izo profesora, i en el 1962 establesió una envestigasión en Roma, divizando el resto de su tiempo entre Roma i St. Luois. Del 1961 al 1969 eya dirijó el " Centro di Ricerca di Neurobiologia" en Roma, i del 1969 al 1978 el Laboratorio de Biolojía Selular. En el 1968 eya fue la diezena mujer elekta a la Nasional Akademia de las Siensias de Estados Unidos. En el 1983 resivió kon su kolega Stanley Cohen el Premio Louisa Gross Horwitz de la Columbia University. I en el 1986 endjuntos a su kolega Stanley Cohen resivió el Premio Nobel en fiziolojía i medisina por su deskuvierta del inyervo faktor de kresimiento (NGF). En el 1987 resivió la "National Medal of Sience", ke es la mas alta onor en el mundo sientífiko en Amerika. Eya es oy la mas ansiana biviente de los laureatos del Premio Nobel. En el 2001 eya fue nominada senator a vida por el Prezidente de la Republika Italiana Carlo Azeglio Ciampi, ande no le mankaron polémikas de la ekstrema derecha, por su apoyo a la siedra, por su edad i por sus oríjines djudías. En el 2008 resivió el PHD ad honorem por la Universidad Complutense de Madrid en Espanya.

- Copyright © 2001-2009 Moïse Rahmani -
Google
sefarad.org