Sólo tú, Yerushaláyim

    MENU    
Sefarad
[Vii avlaremos]
Help us
Retour
Sólo tú, Yerushaláyim

Debasho de tu sielo
Sereno i amante
Siento mi korasón avrirse
Kada vez de muevo, Yerushaláyim.


D’amor puro, kayente
Me incho yo entera
Por kada tu piedra i árvol,
Kada tu kaleja, Yerushaláyim.


Tu ayre me emburuja,
Me yeva adelantre
Asta a la fin de mis días,
A pasos livianos, Yerushaláyim.


Tu sol me konsola,
Tu ayre me kura
De los sielos grizos i tristes
De mi nasimiento,
Yerushaláyim.

Matilda Koén-Sarano,Yerushaláyim, 5.5.1994

- Copyright © 2001-2009 Moïse Rahmani -
Google
sefarad.org