Rodes

    MENU    
Sefarad
[Vii avlaremos]
Help us
Retour
Rodes) Matilda Koén-Sarano – Yerushaláyim, 2010

Rodes,
Mito de mi chikés,
Para mí no eras un lugar verdadero,
Eras un esuenyo.
Bivías en los kuentos de mi padre:
Nochadas de Séder en famiya,
Kriaturas alegres,
Soldados italianos amigos,
Korsas en bisikleta kon kayidas memorable,
La fuente de agua fría,
La Kaye Ancha i la mar,
El kolié de korales de nona Alegra.
Un paradizo de sielo azul.
I un día
Me topí ayá i vidi
Un paradizo de sielo azul,
La Kaye Ancha i la mar,
Ma agora no ay mas famiyas,
No ay mas kriaturas alegres,
No se siente mas avlar ladino,
Kedó sólo el Kal sin yahides,
Ay sólo tombas blankas,
Sólo nombres eskritos sovre la piedra,
Para no ulvidar nunka
Ke no eras un esuenyo,
Ke avía akí una ermoza vida,
Ke eras un lugar verdadero.

- Copyright © 2001-2009 Moïse Rahmani -
Google
sefarad.org