Viaje en treno

    MENU    
Sefarad
[Vii avlaremos]
Help us
Retour
Viaje en treno

Aharon Cohen >

Un kavzo ke afitó: Yo estava viajando en treno de Firenze a Milano, de retorno a kaza (en el 1958), i estava asentado kon unos kuantos soldados, i al lado de mí estava asentado un papás militar, ke tiene la tarea de dirijir la vida relijioza de los soldados italianos. Los soldados, del minuto ke el treno se metió en movimiento, se puede dizir kaje sin pauza, empesaron a burlarsen del papás kon palavras ofensivas i shakás pezgadas. "Mirá kuanto es godro! El kome el día entero a muestro kuento. Eyos no azen nada! Pekado por sus tiempo…"
Eyos disheron esto todo en su prezensia, para ke los sintiera i se araviara, i él por todo el kamino se estuvo inyervando. No sé porké no se alevantó i trokó el kompartamento. El se kedó en su lugar i no se meneó, yeno de ravia, sin reajir, i eyos kontinuaron i kontinuaron… Izieron pauzas i echaron de muevo kontra de él pinchadas de todos los djéneros i kontaron i konsejikas suzias, para ke él reajera, ma no afitó nada.
Ensupitó dechizí de mesklarme, porké vidi esta shena, kedándome kayado, ma tuvi piadá de él, porké esto me paresió exajerado. Dishi en italiano: "Amigos, lo ke estásh aziendo no es djusto. Si tenésh keshas o alguna koza de dizir, dizilda no en prezensia de este papás. Porké devésh ofensarlo? Ande está vuestra edukasión? Ke palavras son estas? Yo estó siguro ke estásh exajerando. Vozotros siguramente no lo konosésh, no sintitesh nada sovre él i no avlatesh nunka kon él. Puede ser ke vos akodrásh de otro papás… I por esto todos son ansina?"
En kurto, el grupo de soldados sesó sus burlas, me sintió a mí i se kalmó avagar avagar, i ansí arivimos a la fin del viaje, i en lugar de avlar del papás, avlimos de otras kozas, avlimos de futbol i de kantigas italianas. Ansí pasimos el tiempo. Se puede dizir ke los enfluensí, i a lo manko en la última ora del viaje eyos sesaron de molestarlo.
El papás se kalmó avagar avagar i kuando arivimos a Milano vino i me disho: "Ekskúzame, sinyor, te puedo dizir unas kuantas palavras? Yo te kero rengrasiar! Tú me ayudates muncho!" I me disho: "Dime, a ke eglisia apartienes?" Le dishi: "No apartengo a dinguna eglisia. Yo sé djidió. Vini de Israel i rogo en la sinagoga sigún le relijión djudía."
El se kedó estoriado, porké entendió a ke punto arivó, tanto ke un djidió tuvo de salvarlo.
A la fin me disho: "Mozotros, los kristianos, te pedrimos!"
Mos dimos las manos i mos despartimos…
Kontado por AHARON COHEN – 1985

- Copyright © 2001-2009 Moïse Rahmani -
Google
sefarad.org