La orasión en la Sinagoga de Rodes

    MENU    
Sefarad
[Vii avlaremos]
Help us
Retour
La orasión en la Sinagoga de Rodes

Alfredo Sarano

De munchos anyos la Italia governava las Izlas Italianas del Egeo. Fueron echos lavoros notables de konstruksión, para azer sovresalir los kastiyos i las murayas fraguadas por los "Cavalieri" i para mijorear la red de las kalejas. El komersio se estava dezvelopando. La situasión finansiaria de los abitantes de las Izlas i sus livel de vida estavan en kontinua puja.
Mi padre (Moshé Enriquez Sarano), pensó ke era un dover ke en las sinagogas, después de tantos anyos ke la Italia estava okupando las Izlas, fuera restaurado el uzo de dizir una orasión para bendizir al shefe del Estado en el kual bivían los djudiós. El Día de Kipur de un sierto anyo, en el momento ke estavan para meter a sus lugar los Sefarim en el Arón Akodesh, mi padre rogó el Rabino de asperar un minuto, avrió el livro de tefillot ke tinía debasho del braso, i empesó el "Anotén teshuá la-Melahim", demandando al Dio bienestar i prosperidad para Vittorio Emanuele III i sus ministros.
A la fin de la orasión, los yahides del Kal, surprendidos por la emproviza intervensión de mi padre, respondieron en pokos "Amén". El día de después el jurnal "Il Messagero di Rodi" publikó un artíkolo, en el kual fue data la notisia del evenimiento. Del shabat después en todas las sinagogas de Rodes se empesó, sin interrumpsión, a resitar el "Anotén teshuá la-Melahim".
Los dirijentes de la Komunitá de Rodes se abstuvieron de azer resitar esta orasión, un poko por ulvido, i un poko por prudensia, por miedo ke la Turkía, tornando eventualmente en posesión de las Izlas, pudiera tomar duros provedimientos kontra de eyos.
La paz ke fue firmada mas tadre kon el tratado de Lausanne del 1923 entre la Italia i la Turkía, metió definitivamente el korasón en paz a los dirijentes de la Komunitá djudía de Rodes.
(Del livro "Tre paesi e una vita" de Alfredo Sarano, inédito)
(Traduksión del italiano de Matilda Koén-Sarano – 2011)

- Copyright © 2001-2009 Moïse Rahmani -
Google
sefarad.org