Los fijones de Salonik

    MENU    
Sefarad
[Vii avlaremos]
Help us
Retour
Los fijones de Salonik

Un buen djidió se fue a Salonik por echo i arivó tadre de viernes, poko antes de shabat. La primera koza ke izo es bushkar un kal.
Topó el kal i izo en tiempo a entrar apenas estava entrando el shabat. Se asentó en un lugar vazío, al lado de un ombre.
Le disho el ombre: "Sos muevo en el kal? De ande vienes?"
Le disho él: "Vini a Salonik por echo i ariví agora...”
Le disho el ombre: "Tienes ande pasar el shabat? Ande vas a komer esta noche?" Le disho él: "No sé..."
Le disho el ombre: "Mira, yo se uno de los parnasim de este kal. Ven a mi kaza…"
El djidió lo rengrasió muncho i se fue kon él.
Arivaron a una kaza muy rika i ermoza. La meza estava puesta para shabat, i el patrón de kaza izo el kidúsh, izieron amusí i se aprontaron a komer.
La mujer de kaza trusho la supa i la skudió en los platos.
El musafir gostó la supa i se tresalió: ke supa! Fijones kon karne de poyo i arroz.
El buen djidió komió un plato, dos i tres platos de supa. Disho: "A, ke buena komida! Nunka no tengo komido una komida tan buena!"
"Estos son los fijones de Salonik!" le disho el patrón de kaza.
Pasó una semana, el djidió izo su echo i se topó en otro kartié de la sivdá.
Tadre de viernes bushkó un kal i fue ayá a la tefillá de shabat. I ayá, komo es tradisión sefaradía, fue envitado por uno de los yahides, ke lo yevó a komer a su kaza, ke a él le paresió bastante modesta.
Kuando arivo la ora de komer, la patrona de kaza trusho la supa i la skudió en los platos, diziendo: "Estos son los fijones de Salonik."
El djidió gostó…, ma la supa estava aguadía kon algunos fijones ke stavan nadando adientro. El, akodrandose de la komida ke avía komido la semana pasada, disho: "Madam, me parese ke esta komida se aze i kon arroz i karne de poyo…" Le disho el patrón de kaza: "De ande saves kualo se mete en la supa de fijones?"
Le disho él: "Porké la semana pasada la komí en otra kaza de Salonik, i estava yena de todo lo bueno…"
"A!" le dihso el patrón de kaza, "Ay dos sortes de fijones. Akeyos eran los fijones de los rikos. Estos son los fijones de los proves!"

Kontado por MATILDA KOEN-SARANO – 2010

del livro "Kuentos de todos los tiempos" de Matilda Koén-Sarano, Yerushaláyim, en preparasión)

- Copyright © 2001-2009 Moïse Rahmani -
Google
sefarad.org