Moshiko s`ambeza a vender

    MENU    
Sefarad
[Vii avlaremos]
Help us
Retour
Moshiko s`ambeza a vender

Moshiko se empiegó ande el bakal komo dishiplo. Un día, poko tiempo después, le disho el bakal: "Yo estó saliendo. Si viene alguno, véndele tú lo ke kere."
"Bueno!" le disho Moshiko.
El bakal se fue, entró una mujer, le demandó a Moshiko: "Tienes pan fransés?"
Moshiko bushkó, bushkó, no topó pan fransés. "No tenemos" le disho a la mujer.
La mujer se fue.
Tornó el bakal, le demandó a Moshiko: "Vendites alguna koza?"
"No!" le disho Moshiko, "Vino una mujer i me demandó pan fransés. Bushkí, ma no topí. La mujer se fue sin merkar nada."
"A!" le disho el bakal, "Ansí no se vende! Te ambezaré yo. Kalía ke le disheras: - Pan fransés no tenemos, ma tenemos pan blanko i preto, panizikos, pitas i biskuchadas…"
"Ya entendí!" disho Moshiko.
Al día el bakal salió de muevo.
Entró una mujer, le demandó a Moshiko: "Tienes papel de tualet?"
Moshiko bushkó i no topó, ma se akodró de lo ke le disho el patrón el día de antes, i le disho a la mujer: "Papel de tualet no tenemos, madam, ma tenemos papel para enkachar, papel gomado, papel de aluminio, papel de zimpará… Si keres…"

Kontado por MATILDA KOEN-SARANO – 1995

(del livro "Kuentos de todos los tiempos" de Matilda Koén-Sarano, Yerushaláyim, en preparasión)

- Copyright © 2001-2009 Moïse Rahmani -
Google
sefarad.org