BLOG - sefarad.org

Un manadero de informasion sovre el pazado djudio

    MENU    
Sefarad
[MatildaRahel]
Help us
Retour
Un manadero de informasion sovre el pazado djudio.
Matilde Gini de Barnatán

Una manera de konosimiento detaliado de la presencia de los djudios en la Peninsula es traversa los tekstos i kronikas ke mos ofresen ancha i serioza información kon los manaderos de las Sinagogas i Djuderias de Espanya.
Documentos valutozos del disaparesido Prof. José Luis Lacave, aparese delantre de muestros ojos komo un mapa de Espanya kon un ancho karar de Sinagogas en todo el territorio.
Topamos ansimezmo, munchos datos istórikos reveladores del la emportancia y karar de los kartiers djudios en diversas épokas, i mizmamente es posible konoser aspektos pokos vizivles i deskonosidos, komo por enshemplo kualo fue el destino de esas kazas de orasion dempues ke los djudios marcharon de Espanya.
La istoria de los djudíos, sus avatares, las konsekuensias de sus traslado i destino keda reflektado en los dokumentos i testimonianzas de investigadores en sus kronika.
Dekretos y normativas ofresen lus a sujeto de las eksperiensias i los munchos fenómenos ke nasieron en la sosiedad espanyola derivados de las konsekuensias de la ekspulsión , y las duras medidas de kontrol ke se mantuvieron enmientres siglos en esta istoria de koeksistensia y distansiamientos.
Veamos por enshemplo, algunos destinos de las Sinagogas ke kedaron en la Península:v El 7 de djulio de 1415 Benedicto XIII dava odren de konvertir en eklisa la Sinagoga de Calatayud, por demanda de su fondador Don Jucé Abencabra, ke agora konverso kristiano, trokada su identidad i nombre i alkunya avia devenido en Martín de la Cabra.
Siertas bezes los sinyores feudales eran responsables de muncho sufrimiento enverso los djudios.
I por sitar un enshemplo en el año 1442 , la famiya Díaz de Cadórniga cavsó muncha sufriensa a los djudíos de Orense, arrivando al punto de la destruision de la Sinagoga , i yevándose todos los objetos de kulto de esta Sinagoga.v Malgrado esto, topamos ke kedó rekodros de ese pazado en munchos lugares i sivdades espanyolas ke dan información a sujeto del esplendor y el kulto del pazado djudio
Aktualmente es pozivle admirar los ermosos Rimonim de la Katedral de Palma de Mallorca, ke se topan mizmamente en la entrada de su Katedral, i son de un magnifiko kolor rosho; Es ansi ke estos objetos mos avlan elokuentemente del pazado.
A sujeto de los djudíos de Salamanca y su brilyante Aljama, el Rey Fernando II avia ofresido igualdad de trato a los vizinos djudios kon los kristianos, ma malorozamente esta situasión trokó por entero en tiempos i influensia de Fray Vicente Ferrer, un presonaje duro i influyente ke arrivó a rehushir kon un grande karar de konversiones de los djudios al kristianizmo.
Veamos agora siertas sinagogas ke devinieron eklisas dempués de la ekspulsión , ansi ke lugares konsagrados a los djudíos, devinieron los más dispares o kuriozos destinos.
La Sinagoga de Placencia, en Cáceres se trokó en La Eklisa de Santa Isabel.
En Cáceres, el osario y lugares de enterramyento de djudios fue vendido por la moneda de 400 reales al deán Diego de Xerez.
Se topa la maximala informasión en los markos de los lugares de kulto, kon ancha i diversa referensia al pazado djudío, en munchos puntos i sivdades.
Veamos siertos detalios diversos ke avlan de la vieja tradición i kulto:
Aze poko, en el anyo 1966 en la lokalidad de Espluga de Francolí, aparesió un seyo de markar panes ázimos, ke tenia en el sentro un pásaro akompanyado de una estreya deDavid i kuatro ases de espigas…a manera de orla se melda el teksto de Éxodo: "Durante siete días comerás pan ázimo..." Este modo de seyo apartiene a la famiya Panadés, de Espluga, ma es pozivle de verlo en el “Muzeo de la Vida Rural” de esta povlasión i ansimezmo se topa una kopia en el Muzeo Sefardí de Toledo.(Del livro :Sinagogas y Juderías Españolas. - (José Luis Lacave- Pág 46)
Muchas bezes las duras presiones evandjelizadoras y la persekusion, uvligo a los djudíos a escoger kaminos difisiles para su livertad…
El destakado investigador José Luis Lacave, mensiona un dokumento istórico de Toribio del Campillo :"Carta del Infante Don Alfonso " en la cual dize ke por mor de livrarsen de la konversión forzada, un ancho karar de djudíos tomaron la decisión de deskolgarsen la nochada kon kuedras por las murallas de la sivdad i ansi fuyeron..." (Ibidem, Lacave, Pág. 115)
Rekodros i gueyas del pazado i sus tradision ke guadraron por en kudiado los djudíos se pedrieron en el naufrajio de la ekspulzión, ma aparesen súpitamente en la testimonianza menos asperada.Vemos más datos en manaderos bizarros:
En el Archivo Kapitular de la Katedral de Taranzona se guadran pedasos de Kódises Evreos , Biblias y Tekstos Rabínicos. En Protokolos, se topan dos Sédulas en eskritura Aljamiada Evrea (Ibidem, Lacave, Pág. 122.)
Las ataduras de lus i de solombra de una vieja presencia ofrese ancha informasion sovre el pazado , Y en este mizmo manadero del alavado Prof. Lacave, se topa iyne un Proseso de Inquizisión que es pozible konsultar en la Eklisa San Antón.(Sinagoga de Hijar-Iglesia de San Antón – (Ibidem, Lacave,pág. 141)

Algunos datos seovre la prezensia de los Djudios de Toledo en el pazado

Si dezeamos konoser informasión a sujeto de una de las prezensias mas destakadas en el pazado Espanyol, una dea es, sin duvda la de los djudios toledanos ; i kale el menester de la bushkedad de la serioza testimonianza de una de las mas grandes investigadoras de este siglo, Dña. Pilar León Tello, onde topamos un valutozo i endjundiozo lavoro ke le apartiene: “ESTUDIO HISTÓRICO Y COLECCIÓN DOCUMENTAL” ke esta afamada akademika ofrese.
En dos anchos tekstos puvlikados por el CSIC :Konsejo Superior de Investigasiones Shientifikas de Madrid del anyo 1979, esta dokumentasión mos permete aserkarnos al rigor dokumental de la istoria de los djudios toledanos; bizarra dokumentasión de la kuala eskojemos algunos enshemplos.

Rabi Asher ben Yehiel

La atirante presonalidad de Rabi Aser Ben Yehiel, nasido en Colonia arrivó a Espanya en serka del anyo1303 kon sus ocho kriaturas, en siendo onorado i arresivido por el grande rabino Salomón Ibn Adret, de aristokratika famiya katalana ke prinsipió a azerle konoser las kostumbres de los djudios espanyoles; Su destakada presonalidad ofrese la figura de uno de los grandes i afamados savios djudios, i aresentado en Barcelona, fue nomado Rab Mayor de las Aljamas Toledanas. Apartenía a la eskola franko-djermana i fue fondador de uan Yeshivá para estudios de La Torá i El Talmud, onde munchos dishiplos resivieron sus ensenyanzas, i unotros eran vemidos de diversos paizes komo de Francia, Almania i asta Rusia.
Uno de sus mas briyantes dishiplos era Rabí Isaac Ben Israelí, afamado autor de la ovra de astronomía”Yesod Olam”
La actuación de Rabí Aser en kavsos djuridikos difíciles, atiro un grande karar de consultas prezentadas por djueses o comunidades; i ansimezmo La Responsa Rabinika, una dokumentación valutoza entre los rabíes, ofrese informasión por mor de konoser la vida de los djudios espanyoles en esos tiempos, i la dedikasion i emportansia de este personaje. Su Responsa fue uzada komo baza para el Turim de su ijo, Rabí Jacob ; i mas tadre para el “Bet Iosef” de Rabí Iosef Caro.
Entremedio de muchas testimonianzas del destino de Sinagogas, tierras, vinyas, kazas i todo modo de bienes ke devieron abandonar los djudios , meldamos dokumentasión vinien del Archivo de los Dukes de Frías ( es dizir en los ultimos dias del arrondjamiento de los djudios de Espanya ) un kuriozo dokumento kon data del 21 i 22 de djulio de 1492 de dos djudios de una afamada famiya ke, antes de marchar de Espanya deshan todo lo kenían. Es ansi ke Don Samuel Abenxuxen i su ijo Abraham, deshan todos sus bienes ke tenían en la localidad de Huete a su sinyor el markés de Villena. Azen dono de munchas kazas en diversos lugares, bienes, muebles e raíses, rentas de pan i de vino, lana, ganados, dineros de oro i plata, o moneda amonedada… ;en una informasión i karar de bienes de kuaji tres ojas por entero, ke es kuaji impozible de kreer…
I todo este karar de donos signado delantre de munchos testigos prezentes endjuntos a la legal i serioza intervención de un eskrivano…
Este es un chiko pedaso de muestra istoria en Sefarad, del pazado ke poko se konose i ke kuaji no es posible de imajinar, si no es ke lo meldamos en tekstos detaliados i seriozos de investigasion.


sefarad.org

- Copyright © sefarad.org - 1997 - 2017

CONTACT

Retour au site sefarad.org -