BLOG - sefarad.org

Unas chikas notas sovre el kapitolo de los tribunales del Santo Oficio

    MENU    
Sefarad
[MatildaRahel]
Help us
Retour
A SUJETO DE LA INKIZISON EN AMERIKA:UNOTRA FERIDA DE LA ISTORIA

UNAS CHIKAS NOTAS SOVRE EL KAPITOLO DE LOS TRIBUNALES DEL SANTO OFICIO

Del livro inédito: Estragos de la Inquisición en España y en América Matilde Gini deBarnatán

No es mi intereso el investigar por mor de dar a konoser unos kapitolos dolorozos kon una intensión yelada sovre esta temátika.
Es la deskuverta de unos Archivos los ke me yevan, por kontra, a akompanyar en la eskura soledad de la prizión a presonas ulvidadas de la djustisia i la dignidad umana.

La istoria del Santo Oficio i las Aktuasiones de sus rigurozos Tribunales i prosedimyentos en las sosiedades onde rijeron, es de una dimension difísil de mezurar .v En muestros tiempos kale el estudio i diversidad de sus konsekuensia onde merita la analiza detaliada de la investigasión en los markos de munchas dishiplinas i kriterios de istoriadores, antropólogos, sosiólogos, estudiosos del derecho i la relijion i mas, en un konteksto unifikado.

Ancha i de grande ondura es la istoria de los djudios en su lunga permanensia en Espanya i malgrado la diversa i fruchiguoza bibliografía i konosensia de la lus i la solombra ke arrodearon la su presencia en Sefarad, kedan ainda kapitolos eskuros, malkonosidos i ulvidados de la trajedia de una dimension doloroza i lunga en el tiempo i las jeografías, kuaji impozible de reskatar i esklareser por entero.
Malgrado esto es el menester de azer todo modo de esforzo intelektual kon el buto de arrivar a rehushir en yenando avagar avagar ,el disenyo de ese kapitolo, los kaminos, las duras leyes, los echos, nomvres, situasiones, o el karar de presonas i famiyas enteras undidas en la indjustisia, la tortura i la muerte; todo en medio del silensio i el sekreto de sus vida.
Esto se paso en Espanya kuando se fraguaron duras leyes ke se enfortesieron i se impozaron fraguando en akeya sosiedad la deskonfiansa entre ermanos, ensenyando a bivir kon ansia i amargura, embasho una estruktura de persekusión i kastigo.
Kuando la Inquizisión impozó ideas i organizasión prinsipiando a aktuar, no todos se toparon de akodro, dunke komo es lojiko en medio de desiziones internas i eksternas de tal karar en los reynos de Espanya, avian los ke no kijeron esto, destakando el kavso de los aragoneses, ke selozos de sus fueros i livertades se opuzieron anchamente a ke el Santo Oficio entrara a aktuar entre el puevlo espanyol.

No dezeamos en este chiko artikolo sentrarnos en una deskripsión i desvelopamiento del akonteser i partikolaridades o fenómenos ke kon los siglos i en diversas sosiedades nasieron al seno de las famiyas i del mundo de los konversos, djudios muevos, kriptodjudios i mas. Muestro intereso es desvelar messo los manaderos dokumentales siertas testimonianzas ke permetan una rekonstruksion istórica de algunas famiyas en Amérika, onde funsionaron kon grande rigor los Tribunales de Inkizisión.

INSTALASION DE LOS TRES TRIBUNALES DEL SANTO OFICIO

En Lima, México y Cartagena de Indias se instalaron los Tribunales Inkizitoriales de Amérika, por dezisión del monarka espanyol Felipe II.
La analiza de dokumentasión archivístika intenta messo estudio de kavsos individuales arrivar a la rekonstruksión del período de las Aktuasiones de los Tribunales del Santo Oficio instalados en Amérika por mor del kontrol y kastigo i en persekusion de las presonas ke fuyian i dezeavan entrar en tierras de Amérika, mizmo ke en esos tiempos no se permitía su entrada a ekstranjeros.

El Santo Oficio aktuaba en tierras amerikanas kon mezmo rijo ke en Evropa: djuisios sin derecho a defenderse, tortura, konfiskasión de moneda, famiyas destruidas i siempre el miedo i el sar en kada kaza, en kada pensamiento, kon la amenasa de ser malsinados por los kriados o los mezmos vizinos.
Los autos de fe de Lima, México i Cartagena de Indias, los ekstensos prosesos y la persekusión sistemátika reflektan uno de los períodos mas eskuros i peor konosidos de la istoriografía amerikana.

DESKUVERTA DEL ARCHIVO DE SIMANCAS

Es en finalisando el siglo XIX ke el istoriador y polígrafo chileno José Toribio Medina arrivó sin bushkarlo a la deskuverta de los Archivos Sekretos ke se guadravan en el Castillo de Simancas en Espanya, reveladores del ancho korpus de las Aktuasiones del Santo Oficio desvelopadas en Amérika .
Es de agradeser su esforzo i trezlado presonal al reskate de estos valutozos fondos puvlikados messo lo kualo arrivamos a la konosensia de uno de los primos manaderos dokumentales mas emportantes en la istoria de la inkizisión ispanoamerikana.
La istoriografía puvlikada por Medina es sin duvda el mas ancho manadero de informasión ke desvela desde el prinsipio los kaminos de la entrada de la Inquizisión en América, ansi ke el ancho konteksto detaliado de su desvelopamiento.
En la mezma se ofrese datos sovre las fraguas de los tribunales, nombramientos, arrivos de los primeros funsionarios, sekretarios i inkizidores, ke ilustran kon el ancho karar de emportantes dokumentos, memoriales, notisias, ódrenes y testimonianzas ke se kompozan i kompletan kon el korpus de letras embiadas entre los funsionarios i la Kurona.
Esta koleksión dokumental permete konoser kronolójikamente el desvelopamiento de las situasiones ke se bivían, ansi ke la aktividad repreziva de una institusión ke la su prezensia impozava en kada povlasión un ancho impakto sosial i emosional.
La grande dokumentasión reproduse kon fieldad los mezmos Legajos, Relasiones de Autos de fe, Causas y Dokumentos que tokan a las Aktuasiones i ke se guadraron kon kudiado deviniendo ansi los fondos de un manadero valutozo ke permete la rekonstruksion i dezisiones ke se tomavan siguiendo las instruksión i prosedimyento de sus uzo, ansi ke aparese el bugeto de un grande karar de presonas kon los djuisios, prosesos i penas ke les impozava la persekusión inkizitorial.

DIFIKULTADES EN LAS DJENEALOJÍAS

Dokumentos inéditos en la koleksion de Toribio Medina, ansi ke unotra ancha dokumentasión se topan ainda dispersos en Archivos y Bibliotekas, asperando la analiza del estudiozo de esta temátika.
La indagasión djenealójika al igual ke la de archivos familiales no siempre se topa fasilmente en la investigasión, en siendo un valutozo i bushkado manadero.
La mas ancha difikultad de los fondos de Amérika se topa en la konfusión djenealógica: presonas con mezmo nomvre y alkunya, famiyas ke azen uso de las alkunyas paternel o maternel i siertas kon unotras muevas; kavsos konkretos en los kualos los yerros vdjenealógikos o falsos bushkavan fuyir de la persekusión i kastigo del Santo Oficio kontra djudios, konversos, kristianos-muevos, portuguezes i unotras viktimas.
En disparte de esto es emportante destakar ke de siertos archivos destruydos, sakeados i inkompletos disparesieron orijinales de autos de fe en Lima, en siendo los fondos más kompletos los prosedentes del Archivo General de La Nación en México.
Lo más bizarro en el fenómeno kriptodjudío es la aktitud komun i semejante entre los perseguidos ke en diversos kontinentes, sivdades i sosiedades se aunaron messo amistades i ataduras diversas, seyan familiales, komersiales o endogámikas, en aziendo uzo de sus sekretos kódigos i de una estruktura semejante, ke los funsionarios inquizitoriales konosían i perseguían, messo sus seguimiento i kontrol desvelopado en el ancho periodo de sus rolo.

¿DE KE FELIPE SEGUNDO EMBIÓ A SUS LESHANOS DOMENIOS LOS TRIBUNALES DEL SANTO OFISIO ?

ANTESEDENTES ISTORIKOS SOVRE ESTE REY

El intereso del monarka Felipe Segundo de enviar a sus leshanos domenios de Amérika los temidos Tribunales del Santo Ofisio, es la klave para entender mijor la mentalidad de este rey i las situasiones ke arrodeavan al monarka ansi ke los faktores negativos ke influensiaron ondamente la sosiedad de su époka.
Para mijor entendimiento de siertos aspektos de su presonalidad interesa la analiza de su figura i su tiempo.
A las tensiones eksternas i internas que arrodeavan el personaje se aunan munchos faktores ke markaron poderozamente akeya sosiedad.
Entre eyos no es el mas chiko el desvelopamiento de una relijiosidad egsajerada en tiempos de este rey, endjuntos al rijo de la Inkizisión enkistada en un lungo período dientro del konteksto de una sosiedad viziblemente dispartida i amenasada.
El kavso es ke avian ondas tensiones polítikas desatadas a kavsa de las guerras, ke yevaron a gravísimos provlemas ekonómikos ke komplikaron ainda mas la vida, i aunado esto a una klima de peligrosas intrigas.
Konsekuensias de este panorama, un grande número de Causas y Prosesos se desvelopan en kontra de personajes afamados, onde pujan las duras persecuciones, eskuresiendo el odren djeneral de la sosiedad. Por dar alguno de estos enshemplos, sitamos los prosesos en kontra el sekretario Antonio Pérez i el del Arzobispo Carranza, ansi ke unotros personajes influyentes i de pezgo ke ofrese un panorama de grande konfusión.
Es kuando prinspian los rijos de los Estatutos de Limpieza de Sangre, ke anunsian el orijin de munchos males vinién de las semiya de amargura y odio, i esto se inskrive en una klara división al seno del puevlo espanyol.
La analiza global de los siglos XVI y XVII esklarese a sujeto de los trokamientos de aktitud i djuisios kuando a estos males se auna la kreasion de literaturas antidjudías i deskriptivas del odio i el despresio.
Momento en ke se fraguan leyendas ke alimentan el sentimiento antidjudío en la sosiedad espanyola.
Ansimezmo es pozible mezurar agora la intoleransia enverso los djudíos i los konversos de orijin djudío, un fenómeno ke se topa reflektado kon maestría en el endjundioso estudio sovre los tristemente sélebres “Estatutos de Limpieza de Sangre” ke ofrese la ovra del Profesor Albert Sicroff , en una investigasión ke deviene la mijor gia por mor de konoser esta eskura pájina de la istoria.

LA DEZISIÓN DE FELIPE SEGUNDO

Interesa konoser ke un emportante karar de presonas ke venían fuyendo del Santo Oficio desde diversos paizes rehusheron a topar refujio en tierra ispanoamerikana, malgrado ke era defendido esta entrada si mankavan los sertifikados o “Lisensias” ke ansi lo demandavan dunke no se permitía la entrada de dingún estranjero;
Ma lo bizarro de estas leyes es ke avia kavsos onde esto no se kumplió.
Este modo de rijo de las leyes del rey Felipe Segundo i la kavsa por la kuala tomo una tala dezision es la repuesta al grande karar de la entrada de djudios i konversos ke venian fuyendo de la persekusión inkizitorial, i en este senzo se endivina ke de siguro el rey kijo kontrolar estas entradas messo la instalasión de los Tres Tribunales de Inquizisión en sus muevos i leshanos territorios de Amérika Ispana.
Siertamente, una dezisión real ke es destakada por el autor Marcel Bataillon en el prólogo de una de las ovras sovre Inkizisión en Amérika de José Toribio Medina :

"La Inquisición no vino a América a vigilar la pureza de la fé de los neófitos indios, pues algunas iniciativas intempestivas de Zumárraga contra caciques secretamente fieles a la religión de sus padres habían llevado a la conclusión de que peor era meneallo. La razón de ser de la Inquisición en el Nuevo Mundo fué, con el permanente peligro del judaísmo, el riesgo de que se enfriase o degradase la religión tradicional entre los pobladores españoles o europeos desgarrados de la vieja cristiandad." ( I )

LA TRAJEDIA DE LA FAMIYA CARVAJAL

LUIS DE CARVAJAL EL MOZO: UNO DE LOS PRIMEROS

MISTIKOS MEKSIKANOS

UNA ADPTASION LÍVRA I TRADUISION DEL KAPITOLO DEL LIVRO “LA FAMIYA CARVAJAL” DE TOMÁS MORO

Komo segnalimos, una de las koleksiones mas valutozas i kompletas para konoser la Inkizisión en Amérika se topa en la koleksión de Dokumentos del Archivo Djeneral de la Nasión en Méksiko.
Esta dokumentasión permete la rekonstruksión detaliada de la duvle-vida de munchos djudios secretos. Un sub-mundo de malsines, secretos i intrigas aparese reflektado en la testimonianza de Causas i Prosesos.

Una de las mas dolorozas trajedias es el ke bivio la famiya Carvajal en medio de una eksistensia atormentada de estos personajes.
Arrivaron a la Nueva España kon Don Luis de Carvajal el viejo en rolo de kavesa de famiya; nomado en funsiones de gobernador y pasifikador de un ancho territorio. Soltando éste i su suvrino Fray Gaspar, toda la famiya praktikava en sekreto el djudaizmo.
La figura ke gravita poderosamente kon grande fuersa es la de Don Luis de Carvajal el mozo ke era suvrino de Luis de Carvajal el viejo,i devino en uno de los primeros místikos mekskanos.

Akseder a su otobiografia es konoser su ondo amor djudaiko i su relijiosidad i ancha konosensia de las Sagradas Eskituras.
Arrodeados de pobresa y difikultades sufren ansimezmo la amenasa kontinuada muy en serka, kon el peligro de la vijilancia de los funsionarios inkizitoriales ; i por esto la famiya tenia el esfuenyo de arresentarse en Italia, onde entonses era pozible bivir i y yevar aviertamente una vida djudía.
En esta situasión, se desveloparon intrigas en kontra del governador, arrivando las primeras denunsias; i en el mez de Mayo de 1589 los funsionarios inkizitoriales aprezaron a Don Luis de Carvajal el mozo, a su madre i a sus ermanas.
En la soledad de la eskura prizión, los ayunos, orasiones i fervor, akompaniavan su melankolía.

Una demanyana, mirando por un burako de la puerta de la prizión , vido que su madre era yevada a la kámara del tormento, i sin poder moverse, blanko de sar, pudo oír "akel día de la mas grande tristura i amargura ke todos, las dolorozísimas kejas de su amada madre kuando era atormentada, sin tener otro kamino que enkomendarla a Jehová." (2)
Los presos enserrados en las priziones sekretas, sin rehushir a dinguna komunikasión eksterior, sometidos a una kontinuada vijilansia i konfiskados sus bienes, deskonosían de onde, i vinien de ken i ken eran las denunsias, ansí ke deskonosían kualos eran los kargos i kuanto tiempo asperararían detenidos.
Asigún su uzo i sistema en los mekanismos del Santo Oficio, se enbió un espión para akompanyar al reo, kon el buto de ganarse su konfiansa .(3)
El bien ensenyado espión :Luis Díaz, rehushó a despertar la konfiansa de Luis de Carvajal o Jospeh Lumbroso, komo agora yamarse, i es ansi ke en medio de sus konversasiones i confidencias kon el ke kreía su amigo, Luis le trasmitía la Ley i práktikas de la tradisión djudía a este akompanyante,i ansi topava sierto senzo a su dura eksistensia.
I es ansina ke Luis se konfió peligrosamente i kontava comprometiendo en sus konfidensias a un gran karar de djudíos sekretos meksikanos,
I mismamente le confesó ke avía eskrito su autobiografía i diciéndole onde la avia guadrado eskondida, sintiéndose seguro ke Díaz podía rehushir a topar la manera de hacerla yegar a sus ermanos ke moravan en Italia.
Tadre entendió Luis ke su grande konfiansa avía komprometido seriozamente a él, a su famiya i a las djentes ke avía nomado kon tala imprudensia; munchos de los kualos les avía ensenyambezado él propio las orasones, práktikas, mandamientos y Leyes de la tradisión djudía, ke mizmo avía rehushido a munchas knversiones.
El kontenido de la autobiografía de Luis, ke el espión entregó a los inquizidores, fue importante akusazion para él en su segundo proseso, i kon esto la informasión rehushi kon el aprezamiento de un grande karar de kcriptodjudíos meksikanos.

Kuando las sospechas de deslealtad devinieron en dura realidad, Luis arrogava al falso amigo ke se apiadara
I ke las denunsias kayeran sltanto a él, ma no sovre su madre i ermanas, onde la setensia segura sería la muerte en el fuego de la oguera; ma esto no kaminó , ansi komo inútil fue arogar por todas las presonas que avia komprometido.
Luis de Carvajal no podía kreerse la trampa i el enganyo a su inosensia, demandándose kon lágrimas en los ojos: "¿Dónde tenía yo mi juicio, cuando os descubrí mi pecho...?" (4)
Kon dezespero en el ensierro de la prizión klamaba ke el pezgo de su alma era insuportavle al aver dicho a Díaz ken i ken guardavan la Ley del Dio, i kijo en una okazión kitarse la vida arrojándose desde los altos delo kurtijo interno de la prizión, dezisión ke no rehushó, ma dempues disho toparse kon arrepentimiento del pekado de dezear kitarse la vida.

LOS ESFUEÑOS DEL MÍSTIKO

Kosensiándose Luis de su próksimo fin, se enkomienda al Dió de Israel i deskrive : "Uno de los mayores y mas peligroso captiverio que gente de nuestra nación a padezido..." i da fin kon estas palavras :
"Por lo cual humillo mi corazón . Adoro y glorifico a su Santísimo Nombre y confieso que es bueno y máximo y que es eterna su misericordia , la cual me valga y a todo Israel. Amen." (5)

Toda esta semejante aktitud aparese travrse su proseso : los inkizidores no se engañan kuando dempués de una kontroversia relijiosa , el prosesado deklara ke si konsintió en ke vinieran los teólogos no era por dudar de su fé, : "dunke más kree en eya ke en ser ombre, ma kon el buto de konfundirlos y konvertirlos..."
Malgrado el peligro en ke se topa,a grava ainda más su situasión al entregar a los inkizidores un manuskrito kon su testamento, i la deskripsión detaliada de mandamientos i leyes onde se baza su fé.
Agora nada detiene al kreyente que dize estas palavras :

"que creía en la Ley de Moisés y que en ella quería morir y que en testimonio de esta verdad, viniese el fuego y dichoso de él ; pues permitía Dios llevarle para sí por este camino..."

Las viziones i sueños místikos de Don Luis de Carvajal se reflectan en los mesajes ke kijo embiar a su madre i ermanas, kon la intensión de ofreser konsolasción i akavidarlas del fín serkano ke les asperava.
A su ermana Dña. Leonor eskrive estas palavras :

"Angel mío, albricias, que mejor viaje es el del Paraíso que el de Castilla, bienaventurado el pan que comiste y el agua que bebiste, y la tierra que pisaste, y el vientre en que anduvimos, que de aquí a poco hemos de ir a profesar la religión sacra de los ángeles. ¡Oh, que ricos jardines, músicas y fiestas nos esperan! Lindos torneos se han de hacer en el cielo cuando Adonay nos corone para su firme fé. ¡Quién pudiera contaros todo lo que el Señor me ha mostrado.!"(6)

MUERTE EN LA HOGUERA

El fin arrivó en la data del 9 de Disiemvre de 1596, en uno de los más solennes Auto-de-fe de la Plaza Mayor onde se alevantó el tavlado, los doseles de velour preto, las armas del Santo Oficio, las almohadas, tapetes, la blanka seda i los brodados de seda i oro en medio de la plaza ke bullía de djentes prezentes para ver la ceremonia; una lunga prosesión de sesenta i ocho reos. Entre eyos la famiya Carvajal, todos eyos kondenados a muerte en la oguera : Dña. Francisca, sus ijas Isabel Rodríguez de Andrade, Dña. Catalina de León i de La Cueva, Dña. Leonor de Carvajal, i Don Luis de Carvajal el mozo o Joseph Lumbroso, amordasado. (7)

NOTAS BIBLIOGRÁFICAS

1) BATAILLON Marcel – Prólogo a la obra : Historia del Tribunal de la Inquisición en Lima 1589 -1820 – J.T.Medina - Edición : Fondo Histórico y Bibliográfico J. T.Medina- Santiago de Chile – Año 1956 Página IX.

2) TORO Alfonso- La Familia Carvajal – Volumen II – Año 1944 – Editorial Patria S.A - México D.F.
Estudio Histórico sobre la Inquisición y la Nueva España en el siglo XVI, basado en documentos originales y en su mayor gran parte inéditos, que se conservan en el Archivo General de la Nacíon de la Ciudad de México.
APÉNDICE - Autobiografía de Luis de Carvajal el Joven que se encuentra escrita de su puño y letra en un librillo, escrita con letra microscopica, con una cubierta de cuero que corre agregada a su segundo proceso.- Colección Riva Palacio del Archivo de Inquisición - Tomo 14 - Archivo General de la Nación- Pág 315.

3) TORO Alfonso – La Familia Carvajal – Apéndice Documental - Pág 315 Autobiografía de Don Luis de Carvajal el Mozo.

4) TORO Alfonso – Autobiografía - Ibidem

5) EYMERIC Nicolau – Manual de Inquisidores – Capítulo III - Interrogatorio del reo - Pág. 39 – (Señalamos Métodos de que se valían los inquisidores)
Traduisido al djudeoespanyol : "La setiema treta del inquizidor será tener ganado algún amigo del reo, o unotra presona de su konfiansa, por mor de avlar kon el frekuentemente topándose solos, i ansi deskuvrir su sekreto…"

6) La Familia Carvajal- Estudio histórico sobre los judíos y la Inquisición de la Nueva España en el siglo XVI, basado en documentos originales y en su mayor parte inéditos , que se conservan en el Archivo General de la nación de la ciudad de México.- ALFONSO TORO- México – Volumen II – Año 1944 – Editoria Patria S.A. Méxio D.F.

7) Ludovicus Páramo


sefarad.org

- Copyright © sefarad.org - 1997 - 2017

CONTACT

Retour au site sefarad.org -