BLOG - sefarad.org

Asender la luz, kitando la eskuridad.

    MENU    
Sefarad
[MatildaRahel]
Help us
Retour
ASENDER LA LUS, KITANDO LA ESKURIDAD

EL TEMOR Y EL MIEDO SE PUEDEN AZER DISPARESER ASIGÚN RABI NAJMAN DE BRESLOV

El Rabí Najman de Breslov, ke komo savesh es un grande maestro mos ambeza munchas lisiones de espiritualidad para engrandeser muestra alma, nasido en Ucrania en 1772 i ke murió en 1880, era nieto del gran Baal Shem Tob, kreador del jasidismo.
Rabi Najman de Breslov en su saviduría mos amostra ke munchas vezes el miedo ke sintimos delantre algunas kozas no tyene dingún senzo, esto es ke la mayoría de las kozas ke mos dan miedo en realidad no pueden kavsarnos dingún malidanyo.
Tambyén mos dize Rabi Najman ke esto no lo podemos ver kon klaridad enmientres mos topemos kon vida, asigún Rabi Najman es dempués de esta vida ke vemos esto i vemos la verdad por entero, es ansí ke la presona va a komprender ke todos sus miedos ansí ke munchas duvdas no tinen senzo ni baza.
Esto kere dizir ke munchas vezes sintimos miedos o preokupasiones ke no deverían eksisitir ni soltanto pensar en eyas.
Rabi Najman mos dize ke igual akontese kon los dezeos o tentasiones , ma él mos dize ke soltanto dempués de murir una presona puede ver esto kon klaridad.
Mos avla Rabi Najman de algo aínda más ondo i profundo en dizien ke no es la presona la ke siente miedo sino algo dientro de eya.
Kere dizir ke uno puede komprender kon klaridad ke akeya koza no puede azerle malidanyo ma malgrado esto no puede deshar de sintir miedo, eso es dunke algo dientro de esa presona es responsavle de ese miedo.
Ay muncha djente ke siente miedos a alguna koza o en siertos momentos espesiales sin dinguna djustifikasión ma en siendo ke eyos mezmos se dan en kuento de esto no pueden deshar de sintir miedo delantre de esta koza o momento.
Mos dize Rabi Najman si gritamos detrás de una presona esta siente miedo antes de saver kuala es la kavsa, es dizir ke puede sintir miedo sin ke esto entre en su mente konsiente.
Ma el miedo no se topa en la mente konsiente i es ansí ke no tyene porke ser rasional, dunke el miedo nase de algo más ke se topa dientro de la persona.
Si pensamos en esto mos daremos en kuenta ke munchas vezes tenemos miedos i dempués al tiempo vemos ke no devían de eksistir.
La konfiensa en el Dió es unotro kamino asigún la kabalá i la sabiduría kabalístika , ke la emuná fé kompleta mos alesha de munchos miedos onde traverso la orasión i la meditasión, elevando los pensamientos podemos deshar de sintir miedos, ke no topan dinguna djustifikasión.
Rabi Najman mos dize ke lo mezmo akontese kon el dezeo, uno puede komprender ke su dezeo no es más ke lokura ma malgardo esto el dezeo kontinúa kon todas sus fuerzas, una bez más no es la presona la ke dezea , sino ese algo dientro de uno ke kontinúa keriéndolo.
Dize Rabi Najman ke si mos ambezamos a komprendermos, de este modo podemos vermos líveros de todos los dezeos i miedos, soltanto deves komprender ke algo más dientro de uno es responsavle de ese dezeo o miedo, i si komprendemos esto se puede superar todo.
Kada uno i uno tiene su lívero alvedrío, se puede ejersitar la mente i de este modo poko a poko no dar importansia a lo ke dientro de ti te aze tener miedos.
Komo todo kon veluntad se reushe i kon la práktika del día en día, ma tamyién es de ancha importansia reushir en la Emuná o fé kompleta en el Dió ke es ken mos kreó i mos ama en saviendo soltanto Él ke es mijor para kada presona.-

Baruj ha Shem!

Viviana Rajel Barnatán


sefarad.org

- Copyright © sefarad.org - 1997 - 2018

CONTACT

Retour au site sefarad.org -