El viaje del Foro LadinoKomunita en Argentina

    MENU    
Sefarad
[Rosy]
Help us
Retour
El viaje del Foro LadinoKomunita en Argentina

Amigos, savesh ke los miembros del foro LadinoKomunita van a azer un viaje para enkontrarese de muevo i a verse la kara.

Esta ves el pais onde se van enkontrar es Ardjentina.

I me akodro ke el anyo pasado se enkontraron en Turkiya, i en 2007, en Israel onde me adjunte kon eyos ! Era el mes de Marso, djusto kuando se pario mi inyeta kerida Carmelle Razafinjato ijika de mi bohor Daniel i de su spoza Limor ke moran en Kfar Saba.

Ke ermozura de ve a la kara de todos los miembros del foro ke se eskriven kada diya en la tela de todas partes del mundo : de Turkya, Fransia , Amerika del sur i del norte, de Sefarad, de Australia, de Inglaterra…Kien se podia imajinar esto en el tiempo de mis parientes ? i todos, eskrivimos en muestra lingua : Djudeo-Spanyol ? Brava la tela !

Por el viaje de Ardjentina ke va tener lugar en Oktobre o Novembre de este anyo, ayinda no se save, sara un enkuontro de emosyon, de amistad de risas, bayles i memoryas de los enkuentros pasados, aunke no mos olvidaremos nunka de muestra kerida Betty Saul ke mos arrelumbro el enkuentro de « Leche i de Miel » en el Mar de Sal. Ke este en Gan Eden.

Komitesh peshkado i limon ?

Salud i vida larga a todos.

Rosutchia

- Copyright © 2001-2013 Moïse Rahmani -