A la autor del libro : "La Vallée des Justes" Danielle Baudot-Laksine, i por su ovras

    MENU    
Sefarad
[Rosy]
Help us
Retour

A LA AUTOR DEL LIBRO : "LA VALLÉE DES JUSTES" DANIELLE BAUDOT LAKSINE, I POR SUS OVRAS.

 

 


Vos vo kontar la seremonia del  4 de Noviembre de este anyo ke tuvo lugar en el Konsulato Jeneral de Italia a Nisa onde fue konferida al grado de « Cavaliere del’ Ordine della Stella della Solidarieta Italiana OSSI* la Sinyora Danielle Baudot Laksine. Este onor Danielle Baudot Laksine lo meritio por el lavoro de munchos anyos ke ize en el valye  i el kazaliko de la Vesubie en las montanyas entre Nice i la frontyera italyana.

La konosemos a Daniel por sus retchetas de kozina ke eskrivio en el N° 69 de Detchembre 2007 de Los Muestros, por modo ke su inyeto Lucas nunka se olvide de su Nonna.

 

I en el Numero 72  de Los Muestros, de Septembre 2008,  Jacqueline Amar izo una prezentasyon muy buena del ultimo livro ke eskrivio Danielle : « La Vallée des Justes ». Es el terser livro suyo ke se trata  del sujeto de los Djudyos ajenos i franseses ke fueron « asinyados a rezidensya » o « rezidentes ovligados» en Saint Martin Vesubie, sin poder salir a fuera de este kazaliko de montanyas, debacho la sorvelyansa i se puede dezir « « proteksyon » de los soldados italianos ke okuparon esta rejyon de Fransia despues de su desfetcha de mayo de 1940.

 

En este kazaliko moravan  solamente mil djente, numerozos proves, lavorando duro piedra la tierra o alevantando rebanyos. Y en  primavera d’el anyo 1943, se dublo la poblasion del kazaliko kon todos estos ajenos ke trucheron arrekojidos en Nice por medio de autobuses. Los kazalinos no savian afilo ke es un Djudio ! Avia kriaturas, mujeres prontas de parir, aedados, mansevos, i ombres, kuyos mayoria ni no savian  avlar el franses.

 

Avlando kon los unos i los otros de los kazalinos ke se akodraron le ke paso en Septembre de 1943, le kontaron a Danielle komo, fuyendo por las  montanyas sienes de los Djudios trataron de pasar en Italia, los proves, ma no tenieron mazal porke los Alemanes avian okupado las dos partes de las Alpes. Los ke no podian suvir estas altas montanyas kon el frio, kargados kon kriaturas i  validjas, vestidos livyanos, livyanos, se kedaron en el kazaliko, arreventandose la fyel. Los kazalinos, de korason bueno, koprendiendo el terrible goral ke les esperarian si le apanyaran a los Djudios, les eskondieron, kien en una kabina estretcha, o en un rinkon debacho de una eskalera, kien en un chirvane ielado i oskuro, kien lyevandolos en una pastoria de las behemas en la montanya i kada dia, truchiendo un poko de komida, el poko ke tenian menester para eyos i sus famiya, en este tyempo de guerra, lo espartieron kon los Djudios ke estavan eskondidos en medio de eyos, kon espanto en la tripa. Porke kuando los Alemanes topavandjente eskondida, les fuzilyaron  a toda la famiya, grandes i tchikos sin  piadad.

 

Asi komo metieron sus vida en sekana para ayudar a los Djudios, i grasias al lavoro de Danielle, Yad Vashem les dio a estas famiyas o su desendientes, la medalya de los djustos ente las nasyones. A esta okazion, en 2005, grasias a Danielle ke los topo, an venido de todas partes del mundo los ke fueron salvados en akeyos tiempos, para atestiguar i regrasyar.

 

En este livro  Danielle konta komo se komportaron los soldados Italianos en  funksyon en esta parte de Fransia, kon umanidad i simpatia enverso de los  kazalinos komo enverso de  los rezidentes ajenos. Los carabinieros de la IVe Armata afilu tomavan debacho de suz alas la chika keila i  la skola ke se avia organizada por  los Djudios en una sala grande. Estos soldados i sus ofisier buenos refuzaron de meter en ovra las leyes rasiales.

 

Danielle resivio el testimonyo ekstraordinario ke le envyo el Professor LURAGHI  ke podrash leer aki debasho en Franses (P.S.1). De mizmo, toparan una letra de agradesimiento de la LICRA de Roma en Italiano (PS.2).

 

Ansina, grasias a este lavoro, las otoridades italianas la izieron onor a Danielle apuntando la medalya « de Cavaliere della Stella della Solidarieta Italiana » al altor de su korason, komo se lo merese.

 

Danielle Baudot Laksin no termino sus buchkidas; otros livros van a ser eskritos kon fotografias vyejas, ama valorozas sovre esta epoka negra de skuridad, de amargura, d’espanto, de ambre i frio, de matansas, de papeles falsos, de todos modos de  eskapasion i, orozamente, de ayudo, manos i  korasones aviertos, bokas serradas, ermozura de amor umano ke trucho SALVASION. Las kriaturas i los mansevos ke tuvieron salvasion i ke aguera viven en tierras amerikanas, o en Evropa o en tyerra de Israel, se akodran de Saint Martin Vesubie con muncha rekonosensya, i konfiente, traen a  Danielle i  su marido André detras de su camera de filmos, sus testimonyos,

 

Munchos anyos buenos i saludozos ke tengan.

 

Rosy Hemmo

 

- Copyright © 2001-2013 Moïse Rahmani -