Viaje en tierra de Sefarad.

    MENU    
Sefarad
[Rosy]
Help us
Retour

Viaje en tierra de Sefarad.

 

Todos los anyos, los myembros del foro de la tela (Internet) basho la apelasion LadinoKomunita i su fundadora, Rachel Bortnik Amato kien la alavamos todos, organizan un enkuentro afin de « vermos la kara ». En este grupo mos eskrivimos todos en Djudeo-Espanyol, ke sea en kual parte del mundo onde moramos.

 

El primero fue en Erets Israel, en el anyo 2006 onde mos adjuntimos al grupo de Djudios sefaradis israelianos « de Letche i de Miel », el segundo en Turkia, el siguente en Ardjentina i este anyo, oktubre 2010, fue en Espanya.

 

Para darvos una ideya de la organizasyon ke se devia de azer, para arrekojer 42 personas viniyendo de paises leshanos komo America del Norte, Brazil, Evropa, Turkiya, Israel, y todos djudeo-espanyol avlantes o a lo menos ke lo oyeron en sus kazas de chikes palavras de los papus i vavas.

 

Todos kon alegria grande de vermos la kara, porke basta eskrivirmos en el foro no es komo vermos i diskutir de frente i vivos, verda ?

 

Primer diya en Madrid, mos enkontramos todos para senar endjuntos en el restorante del hotel. Mos izo sorpreza Matilda Barnatan, la otora del livro maraviyozo de poezias sefardies contemporaneas « La ija i la madre komo la unya i la karne ». Matilda, nasida en Rhodes, esta animando una emision djudiya sefardi en Espanya. Mos resito kon una pasiyon fuerte dos de sus ermozos poemas. Tambyen, David Hazzan de Denver, mos alegro en tanyendo su armonika. La sena, kasher, era perfecta.

 

Matilda mos eskrivio despues ke es difisil de dizir kon biervos lo ke sentimos al toparmos de vandas de aki i de aya del mundo por entero ke tenemos en este foro de amistad.

Supito al levantarmos en la manyana mos lyevaron kon la otobus asta Toleda.

 

Todo fue muy byen organizado por el profesional turistiko, Jose Galves ke es tambien miembro de LadinoKomunita i de Tarbut Sefarad este sityo en kastelyano es http :www.tarbutsefarad.com. i lo pueden meldar todo lo ke a sido kargado i ver tambien las fotos.

En Toledo, tuvimos un paseo muy largo de pie por la sivdad i la djuderia. Vijitamos a las dos viejas sinagogas a la kuales los diyeron nombres kristianos : Santa Maria la Blanca i El Transito.

 

Mos espliko el Sr Samuel de Coso Roman kien mos izo sorpreza de venir adelantre de mozotros, ke el bive en Toledo, es de Tarbut Sefarad, i es un « ben-anus », ke en este kal se konose por la de Samuel Halevi.

 

Este Sr. Roman se esta preparando a azer aliya serkamente kon su famiya. Kon azlaha ke sea ! Ke topadura grande fue ! Disho a Rachel ke iva estar en Israel en estando mozotros aki, ma abolto de Israel para venir a enkontrarmos ! Despues de komer medyodia, el es ke mos giyo, kon toda su saviduria de la istoria djudiya de Toledo.

 

Vos estan imaginando kualo es kaminar kon un grupo de 42 personas, Mashalla, es un poko difisil sobre todo ke ay personas ke tenian menester de eksplikasyones en unas de las tres linguas : espanyol, ingles, franses, (ivrit) !

 

Toledo es una sivdad muy interesante, fraguada en una bukla del riyo Tago.

La Djuderiya esta vaziya de los Djudyos, y esto es estretchura de korason. Delantre de una senya, entre kalejikas estrechikas, empesimos a kantar, komo un grito o un modo de Kadish, « Evenu Shalom Aleihem ! » i tambien : « Avram Avinu, padre kerido… »

Y poko a poko, kaminando debasho de las muralyias, ayegamos a muestro otel Hesperia Toledo, justo en frente de las arenas de torrear. Al entrar en este otel, senti komo une golpe en mi korason porke la tyerra de la resepsyon estava kuviera de piedrikas redondas de la mar, negras i blankas, desinando un magen david, komo las ke kovran las tyerras en Rhodes, ke sea en las kalejas, alyentro de los kales o de las kazas. Mi madra Bouli Hugnou , ke este en GanEder, me kontava ke la tyerra de la kaza de su chikes, en la kozina, estava tapada kon estas piedrikas negras i blankas.

 

En la sena de noche se adjuntaron a mozotros la mujer i el ijo del Sr. Roman i mos regalaron a kada uno un ermozo asoplador.

 

Otro viaje, en la manyana por la manyana, en otobus mos lyevaron asta Segovia, muy antigua sivdad, kon su akueducto del tyempo de los Romanos, sus numerozas puertas de muralyas, iglezias, sanktuarios, konventos, alkazar, i tambyen vestigos del tyempo de la konkista por los Moros (Arabos).

 

Mos enamorimos de la sivdad i del pranso, komo reyes, en el sovresaliente restorante Fogo Sefarad, situado en la kaza ke era de Rebi Meir, el yerno de Abraham Seneor, antes la ekspulsion negra. Tengo ke dizir ke estsuvimos en estas kalejikas de la djuderya kon estretchura de korason porke el giyador mos kontava ke los poveretos Djudyos por estas mizmas kalejikas, vestidos de infamya, se ivan kaminando, kantando tehilim, atados, asta la plasa lugar onde les esperava el kemadero. I porke los kemaron ? porke no keriyan ni konversyon, ni renyegamento de la muestra fey, rogando solamento al D.io Santo ke es Uno, dando kavod a la Torah.

 

Kazas de muy onrables Djudyos del siglo quinze ke izyeron muncho par alevantar a las koronas de Castiya, de Leon, de Catalunia, de Andalus i de toda tierra de Sefarad, apoyando sus gerras, se trokaron en « muzeos de los Djudyos ». Lo ke eskrivo yo aki son impresiones personales miyos.

 

Ya era viernes, i devemos de tornar pishin en Madrid porke mos esperava la keila djudiya para Kabalat Shabat en el kal onde se iziyeron las orasyones, komo

en todas las keilas del mundo. Un savyo de la universita mos izo un komentaryo muy interesante sobre la parasha de la semana en el tema : « pekado i kastigo ».

Despues, el Rabino mos ofresyo la beraha del kidoush i de las halot. El grupo se esparizyo, los ke kerian tornar a pie al otel, se fueron kaminando, los otros, tomando el metro, i otros kien save onde fueron....tyempo libre.

 

En la manyana por la manyana, por otobus, otra vijita de la sivdad kual grandura mos impresyono muncho aunke fue basho una luvya tamam ! Pishin vimos las arenas, los muzeos del Prado, i el de la Reyna Sofia, parkos, jardines, fraguas…. Mos kedamos en una plasa larga, kuadrada, onde se izieron prosesyones basha la mirada de los reyes. Es paresida a la plasa des Vosges en Paris. I kon luvya muy fuerte, kaminamos detras del giador, uno atras del otro por las kalejikas de este bario popular. Un grito mos izo tornar la kaveza : dos ombres se ivan corryendo en la otra parte de la kaleja, i a muestra amiga Elyette de Niza la robaron su bolsa ke estava eskondida en su sako de espalda. No le digo en ke hal estava la povretika ! papeles, paras, bilyete de avyon, todo dezaparesido ! I kuantas oras teniya menester de pasar kon la policia, el consulato, el oficio de Iberia, en este dia de Shabbat !

 

Despues del pranso, kada uno fue a mirar lo ke le plazio en los muzeos.

 

A mi me plazyo muncho el « Gernika » de Picasso en el muzeo de arte moderno, mostrando ke la gerra es la kavza de dolores, manzias i muerte para los ombres, kriaturas i afilu bestias.

Esta mizma noche, devia you despedirme del grupo para tornar a Nice i al kazaliko Chateauneuf onde moro. Los otros, grupo de Franceses de Aki Estamos, tornaron a Paris, el diya de alhat.

 

Ama todos los otros han kontinuado sus vijita de Sefarad realizando el « tour sefardi » por las sivdades en las kuales huvieran importantes djuderias en epoka medieval, komo : Sevilla, Cordoba, Jaén, Granada, Barcelona, Girona i Besalù.

 

Todos eskrivieron ke fue un viaje inolvidable para rekordar sus vida entera de tanta maraviya ke viyeron.

 

Les sueto ke lo haran tambien vozotros i para sentir komo se avla entre mozotros esta lingua ke era Spanyol de los siglos quinze i pasados i ver la sorpreza en las karas de la djente « espanyoles » de agora !

 

Karinyozamente, i saludozos ke estesh

 

Rosy Hemmo

- Copyright © 2001-2013 Moïse Rahmani -