Muy oroza soy yo de poder eskrivir unas kozikas en este rinkoniko

    MENU    
Sefarad
[Rosy]
Help us
Retour

Muy oroza soy yo de poder eskrivir unas kozikas en este rinkoniko de Los Muestros, i lo agradesko muy muncho a Moise Rahmani por este onor ke me aze.

Para empesar no vos vo avlar de mi o de mi vida, ke es parasha muy lunga, aguera ke soy una nonna, bendicho el Sinyor del mundo, ama podresh leer este muy interesante raporto ke izo Dora Niyego de Estambol en el foro LadinoKomunita de la tela, el 24 de Novembre 2008 :

Limmud En Estambol
Komo maraviyozo es de partisipar a un Limmud. En Estambol, este anyo izimos el kuatren Limmud. Este anyo partisipo un milion i dozyentas personas. Estava una koza inkreivle. Uvo enterlokutores/avladores de munchas partes del mundo i diferentes sujetos. Mozotros siete mujeres i un ombre avlimos de las tradisyones viejas de Estanbol, de muestra erensia rika. Komo es en judeo espanyol dishimos no va vinir dingunos a oyermos. Ma no mos kreyimos los ojos, el salon se incho i munchos kedaron en pies. Esto esta amostrando ke el entereso al judeo espanyol esta pujando de diya en diya. Komo dize muestra kerida amiga Rashel Bortnick, no vamos a deshar esta lingua murir.
El programa estava tanto yeno ke no puedimos asistir a todas las konferansias. Vos dare unos kuantos egzemplios de los sujetos ke aviya: Struma, Si Da Vinci teniya Laptop, Eske Shakespeare era antisemit u no, Ken es Judyo, La Edukasion Judiya, Una Ekspozision Sefaradi, La umor judiya, Kon Obama komo van a ser las relasiones en el mundo, Las hazinuras eretikas en los judios i munchos otros sujetos. Ma mas del sujeto, el enterlokutor es emportante en una konferansia. Los salones de los enterlokutores enteresantes estavan yenos fin al tavan.
Esto tan entuziastika de partisipar i avlar en una eksperiensia komo el Limmud ke puedo avlar i eskrivir fina demanyana.
Oguramos ke kada anyo el Limmud en Estanbol seyga tanto reushido."

Suetos kavos buenos.
be azlaha
Kon Karinyo

Rozuchia

- Copyright © 2001-2013 Moïse Rahmani -