BLOG - sefarad.org

Haim Vitali Sadacca

El Amor De Un Viejo

    MENU    

SEFARAD.org

INDEX - Haim Vitali Sadacca
[POEZIAS]
PRECEDENTE Page

AIDEZ-nous

" El Amor De Un Viejo"

Asentado en una taverna kon su vino,
Pasava komo filmo su vida por el tino,
Sus kaveyos blankos,desgustoso ,kaje ido,
Miradas fiksas komo rebivir un olvido.

****

Pensava a eya,al sol de sus primaveras,
Se alegrava kon sus memoryas verdaderas.
Kreyiya ke su sangre pasava por sus venas,
El komo antes las sentiya... de lumbre yenas.

****

Mirava en basho komo bushkar sus patadas,
Viya ke sus alegrias eran amatadas.
En sus ojos siempre la linda fizyonomia,
El dia desganoso,la noche ensomnia.

****

Era un timido,no puedia avlarle,
Teniya espanto d'algun danyo de kavzarle.
El sekreto en l'alma lo tuvo munchos anyos,
Sin pueder amar otra mujer,le kavzo danyos.

****

Kon suspiro travo dos sorvos de su bevyenta,
Sus ojos lagrimozos mostravan su bivienta.
Este grande amor en ke korason kaviya?
Esto el lo supo i el Dyo solo lo saviya.

****

La kandela antes ke este por eskaparse
La flama mas s'engrandese ,serka d'amatarse....

Haim Vitali Sadacca
Montreal

- Copyright © sefarad.org - 1997 - 2017

CONTACT

Retour au site sefarad.org -