BLOG - sefarad.org

Haim Vitali Sadacca

Siertas pensadas

    MENU    

SEFARAD.org

INDEX - Haim Vitali Sadacca
[POEZIAS]
PRECEDENTE Page

AIDEZ-nous

"SIERTAS PENSADAS"

No estes tanto siguro de ti i de tu rikeza,
No se save un dia komo puedra ser tu meza,
No mires a tener borraches por tu buena fama,
Un dia seras olvidado, ninguno te ama.

****

Palmas i alavasyones emborachan la persona ,
Tu korason no sentira mas las bozes ke sona,
No te deshes al korriente de un rio alokado,
Deves partajar tu amor, tu sensya i tu bokado.

****

No te glorifikes kon tu pasajera ermosura,
Esta natura poseda una enorme mesura,
Un dia te revoltaras kontra todos los espejos,
Te veras arugado,te toparas entre los viejos.

****

Bive alegre,mira a los faktos kon tu sonrisa,
Aleshate de un entorno ke tiene falsa risa
En tu serkano si remarkas
por tu gloria un selo,
Fuyete sin desirle nada,sin levantar su velo.

****

Nunka vas endikar tu fortuna
ma ni yorar yores,
Bive modestamente en dando a tu suerte lores.
Si te sentiras un pezgo por algun pekado echo,
Demanda ekskuzas i bushka tu kamino derecho.

****

Si el pekado era komo vino ke emborracha ,
O komo akea droga ke el meoyo lo mancha ,
Todos ivamos estar en las kayes komo lokos
porke akeos ke no pekan
kreyo ke son muy pokos.

Haim Vitali Sadacca
Montreal

- Copyright © sefarad.org - 1997 - 2017

CONTACT

Retour au site sefarad.org -