Accueil - sefarad.org

Harbin, una sivdad judiya

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

HARBIN - UNA SIVDAD JUDIYA

Dospues de mi artikolo sovre BIROBIDJAN ke era la Zona Otonoma de los judyos en la linya del Trans Siberiano, oy vos kero avlar de : HARBIN - UNA SIVDAD JUDIYA.

En el Norte Este de Manchurya en la China egziste la provinsya Heilonjiang i su kapitala es Harbin.

Harbin es un biervo de orijina Manchu i kere dizir "El lugar para sekar los files de peshka" La yaman tambien "La perla del kuelyo del Sinyo " porke esta provinsya tiene la forma de un sinyo/ cygne. Unos lo yaman el "Moskova Oriental" i otros "Paris del Este" por la arshitektura de la sivdad. Es konosida por ser la "Sivdad de Buz" (la glace) pormodo de sus inviyernos largos i muy yelados. Es nombrada por la egzibisyon de las splendidas estatuas de buz kada inviyerno. (link abasho)

Abasho esta tambien el link para ver los banyos de agua kaynte, los domos nombrados en las montanyas.

Verso la fin del 19en i en el 20en sieglo Harbin teniya la mas ancha populasyon de judyos en el Oryente Ekstremo. Era el sentro el mas grande de la politika, de la ekonomiya i de la kultura para los judyos de la rejyon.

Los primeros judyos yegaron a Harbin de Rusya i del Este de la Europa en 1898, kuando se empeso a fraguar los rayes del treno Trans-Siberyano para konektar Moscow kon Pekin.

Dospues de la Revolusyon Bolshevika en 1917 munchos judyos vinyeron i la Komunita alkanso a 25 000 habitantes.

Los judyos empesaron a mover a Shanghay deshando Harbin detras de eyos dospues de la Sigunda Guerra Mondial. Los Ofisyos judyos se serraron ofisyalamente en 1963. El dalkavo judyo en Harbin se muryo en 1985,

Vemos en esta ermoza sivdad, la Sinagoga prensipala de Harbin ke la yaman la Vieja Siagoga tambien. Fue konstruida en 1907-1909. 800 almas puediyan rogar en esta Sinagoga. Daron fin a los Servisyos en 1950 kuando los judyos se fueron de la sivdad.

La mueva Sinagog se konstruizo en 1916-1921 i oy es el sentro de la Historya Judiya en Harbin i una sala de egzibisyon kulturala.

Una skultura muy grande de una Menora de 7 brasos se topa a la entrada i se pueden ver tambien los grandes kaminos de emigrasyon del puevlo judyo en el mundo. Un filmo del Holokosto kon sutitros en Kinezo se da en la grande televizyon en una de las salas de entrada.

La Sinagoga prezenta una arshitektura judiya muy elaborada kon un manyifiko Magen David. Tiene 2 etajes. En las paredes se pueden ver muy munchas fotos en preto i blanko ke dokumentan la vida judiya en la sivdad. El Mupak de la Supa, Beitar el Movimiento de la Manseves Judiya, el Sentro d'Ayudo por las Mujeres, magazenes, plantas, la Libreriya, l'Orkestra, los kantaderes judyos, los atletos judyos, el kanton de los judyos famozos del mundo entero etc. Ay, tambien rekonstruksyones de kantones ke reprezentan la vida familyal judiya.

El simeteryo judyo Harbin Huang Shan es el mijor simetaryo prezervado en el Oryente Ekstremo. Se fondo en 1903, tiene 600 tombas engravadas kon eskriturya rusa i yiddish.

La restoraron en 1992 dospues ke las relasyones se mijoraron entre la China i Israel. Ehud Olmert izo ziara por su nono ke esta enterrado en este simetaryo. Le izo una matseva para Joseph Olmert ke muryo en 1941.

Fuentes :

Wikepedia Judyos de Harbin por Shiri Lav Ari
Los Judyos de Harbin por Dr. Irena Vladimirsky
http://www.istc.org/sisp/?fx=event&event_id=24299
http://www.whatsonwhen.com/sisp/index.htm?fx=event&event_id=185815
http://www.istc.org/sisp/?fx=event&event_id=24299

Sharope blanco

- Copyright © sefarad.org - 1997 - 2017

Retour au site sefarad.org -