Accueil - sefarad.org

Ayshe de Ferah Koy

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

AYSHE DE FERAH KOY
*

Eskrivir memoryas, keridos, es
si lo akseptamos o no, kerer deshar
raises en este mundo dospues de irmos
a muestra egzistensya espiritual...

En primero pensamos ke vana ser muestras
kreaturas ke seran muestras raises ma
dospues pensamos ke es lo ke logramos !
Personas, ke tienen muncho bueno, fundan
muzeos, batimientos, grandes tombas, statuas,
regalan eskolas, parkes....Dan nombres ets.
MA no les basta... Nada de esto les basta
para ser rekordados komo lo keren... No
se sienten PREZENTES en este mundo para
DOSPUES.   Savesh kuando se sienten
prezentes ?

Kuando KONTINUAN A AVLAR  en sus
otobiografias !

Esto es konkreto !  Sus vidas i eyos kedan en
los defteres o en los livros si se publikaron !
Kon munchas fotos EN EL LIVRO... Porke los otros
pueden dezapareser o echarsen... En el livro keda !
Porke kada uno es MUY IMPORTANTE  a su ojo !
No embarasa si en realitad dingunos se interesa a
el/eya !  Es lo ke tiene en su kavesa ke es
importante i kere kontinuar a bivir !  Kere ke
su ijos, sus amigos, la persona ke kere bien se
akodren i nunka se olviden, ke kontinuen a bivir
DOSPUES DE LA MUERTE  !   Es el dezeo komun
de TODAS  las personas  !  I.... Deke no ?
Keren ser regretados i amados dospues ke no
seran mas en este mundo.....

VOS  va kontar lo ke me afito...
Era el anyo 1997, 2 anyos dospues ke torni de
Israel a Istanbul.... I no porke lo kije ... Ma esto
es una otra istorya !
 
*

" Te reingrasyamos .A. ,entre innombravles
kozas, de kriyar las bizbas ke mos dan el
miel para muestra salud, muestra savor de
boka i por el menester ke tenemos del dulse,
AMEN "

Sharope blanco


Vos kijyera kontar un istorya reela ke yo bivi
antes mas de 10 anyos. Nunka me olvidare de
esto ni de akel tiempo bendicho ke duro approx.
1 mez en las montanyas, kon mis keridos, la
madre i el padre biologiko de mi kerido ijiko
Mustafa ke fue miyo des de su 3 er anyo de vida.
...Lo engrandesi ke ermano de mi proprio ijo.
Termino el Lycee en Galatasaray, ke es una de
las mijores eskolas de Turkiya. Izo sus estudyos
akedemikos en la Universitad de Istanbul, en
Beyazid i estudyo Finansas i Ekonomika. Oy es
kazado i tiene un ijiko de 13 anyos, Kerem, i
una ijika de 7 anyos, Sedef ke son mis keridos
inyetizikos de su parte. Es uno de los
direktores de la mas grande kompaniya de Turkiya
ARCELIK en GEBZE . Avla perfektamente el Fransez
i el Inglez. Mora a 1 km de mi kaza i tenemos
las mismas relasyones ke una madre i un ijo,
en mas mijor ! Ermano mas grande de 4 anyos de
mi ijo, se keren i se respektan i son attados
de manera inkreyivle. Es justamente ande sus
paryentes ke estava en akel enverano del anyo
1997. Me aviya fuido por tener el repozo ke
nesesitava para eskrivir...

Estava avlando kon los kampesinos delisyozos
i mas puros del oro, mas limpyos de las aguas
de sus montanyas i mas santas personas ke sus
tierras....

Ayshe, la ke vendiya el miel de sus bizbas en
el merkado, era una mujer de unos sinkuenta anyos,
muy amada i respektada en este puevlo. Aviya
engrandesido 7 ijos i no aviya tenido ijikas.
Se muriya por tener una ijika. Un diya me disho :

- Tu eskrives....Sos diferente de mozotros ! Ma
sos komo mozotros en mismo tiempo porke sos komo
nasites. Komo si no te ambezaron nada i no te
fuites a la eskola ! Bives, te vistes, avlas,
pensas, komes komo mozotros. Ma saves dizir lo
ke kale kuando kale ! Avlas komo mozotros ma sos
mas intelijente de muestro Hoca (el ke esta en
karga de la meskita) No lo mostras ma mozotros
lo vemos. Yo kero ke eskrivas de mi boka lo
ke bivi !!! Pasi una vida ke no asemeja a la
de dingunos ! Yo te la vo kontar i tu la vas
eskrivir !

- Para ke lo keres Ayshe ? No vas a pueder ni
meldar lo ke eskriveremos ! No saves meldar !
No es mijor si te aprendo a eskrivir i a meldar ?
Ven aprova !

- No no no ! Ya paso de mi ! Yo no lo vo
meldar ma mis ijos lo van a meldar i alora van
a entender ke madre ke teniyan ! Todo lo ke
ize por eyos ! I en este puevlo lo van a meldar
i van a oyir mis palavras ! Van a saver lo ke
valiya yo ! Sere nombrada por jenerasyones komo
"AYSHE DE FERAH KOY -
LA KE ENGRANDESYO 7 IJOS KON MIEL"...
De vedra vas a ver !
Kale ke eskrivas todo lo ke te vo kontar....
Estas libera agora ? Ven te kontare !
No va tomar muncho tiempo ! Manko de 1 hora.
Tu dospues lo azes livro komo tu saves ! ....

..I se asento kon mi unas 5 horas ! Porke estava
difisil de meter las kozas en una kronolojiya !triste,
mismo yorando, a vezes riendo, a vezes
inyervada i kon las sejas fronsadas, a vezes
mirando a los leshos....Un
pedaso de su fusta entre sus manos ke arrugava
asigun su humor.

Lo mas interesante ke konto fue un mirakolo de
vedra... Estava peryendo su sigundo ijo kuando
teniya 2 anyos i estava prinyada del treser.
Dospues ke el chiko no estava mas respirando i
todos aviyan dicho ke se muryo i ke eya estava
echando gritos a los sielos yamando Di-o para
ke la tome a eya al lugar del chiko, le vino
al tino de darle la miel de la Reyna de las
bizbas a la bokita del chiko! Ansina ! Sin
pensar ! Komo un orden de los Sielos ! Pishin
metyo su dedo aryento del miel i se fue a meter
el mismo dedo en la boka de su ijo, travandole
la lingua afuera i pushando su dedo fina el garon
para avrirle los kaminos de la respirasyon,
aremeneyarlo, no desharlo durmir en su dalkavo
suenyo, sin saver lo ke estava azyendo, kon el
instinkto de una haya ke se kere salvar seya lo
ke seya, sakudyendolo, yamandolo por su nombre,
gritando su nombre verso los sielos.... I el
mirakolo ke la izo la santa del puevlo !!
El chiko empeso a respirar i a yorar !

Des de este diya adelantre todos la veneraron.
Merkaron komo puediyan su miel ke arrebive las
personas, tanto se kreiyan ke de vedra se
sanaron personas sin esperansa ! Se kuraron los
muy hazinos, mujeres ke no pariyan puedyeron
tener kreaturas...Ayshe me sorprendyo ! No por
ke kreiya yo en mirakolos ma entendi una koza
muy importante kon eya... La vedra dos kozas
muy importantes ! La primera koza es la fuersa
de la emuna ! "Vouloir c'est pouvoir" dizen
los fransezes "Kerer es Pueder" Todo depende
de kuanto se kere ! I la segunda koza era el
dezeo del hombre de kontinuar a bivir en este
mundo mizmo dospues de su muerte ! Por ser
respektado, amado, admirado, porke kuando se
melda la vida o los biervos mismos de el ke
muryo i se miran a sus fotos es komo si el
muerto no se aviya murido !


Sharope blanco
"Los migajos de las Agranadas"


Lo ke kontava era inkoherante lo mas ! A vezes
 

- Copyright © sefarad.org - 1997 - 2017

Retour au site sefarad.org -