Accueil - sefarad.org

Las maskas de Venezia

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

LAS MASKAS DE VENEZIA
 
 
Keridos Amigos i mis Amigitas,
 
Esta semana tengo una fantaziya muy ermoza
ke penso prezentarvos kon mis biervos i a mi manera,
 
Buyrun   :
 
La Edad Medya...La Renesans...La Republika de
Venezia ke era governada por los poderozos Dodges. 
 
Las rikezas kolosales del komersyo de los naves,
de las sedas, de las joyas, de los vinos i de
las espesas ke viniyan del oryente...
El komersiyo del oro, de la plata i del kovre, los
perfumos egzotikos tan bushkados por las dammas
de los palasyos,  divertidas de la parte de los grandes
pintores, artistas, kantadores.. .

El grande poder de la eglisya i de los saserdotes
i los monhos kistyanos... .El tiempo de los asasinatos
en las kamaretas aleskuras por un nada o por aver oyido
una konversasyon, por aver mirado de lado...

El poder del poder !....Las rikezas danjerozas ke puediyan
kostar la vida para trokar de mano !

La relijyon por el poder, por las matansinas, por el ego,
para tener los reyes a sus piezes...

Tiempos aleskuros en lo klaro de diyas pasando
kon enfasyo, kon pasyones eskondidas, kon broderiyas
de oro ... Fiestas i banketos de los nobles ke puediyan
gozar de la vida a murir !

La dada de una espada o un kuchiyo en la noche..
Dospues...El bruido sodro de un puerpo echado
a los kanales ande se arezvalavan las gondolas
doradas... I el silensyo !

Es justamente de este silensyo kon tablos manyifikos
de los  festivales alavados de Venezia.. De los balos
maskados ke vos kero avlar en dizyendovos de oyir
de leshos las melodiyas lansinantes de la sonata
"claro de luna " de Beethoven ...
 
EL SILENSYO ES UN ARTE
(Poeziya en proza)

A vezes una mirada por entender mas aya de la
pupilla...El dezeo de dizir munchas kozas en
guadrando su gana..  Serrar la boka i deshar
korrer las ideyas sin ke s'eksteryorizen.

Deshar pasar tiempo entre las kestyones i las
repuestas.. Asperar ke los musklos yegen a dar
la ekspresyon de la kara... Asperar un sinyo.

Pensar ke el d'enfrente esta pensando tambien.
Asperar...Saver kayarse savyendo ke la solusyon
 a vezes no es siempre en avriyendo la boka...

Para kualo dizir todo i nada guadrar para si.
Deke no entyenden ke los biervos salen mas lentos
de los pensamientos i todo lo ke mos pasa por
la kavesa no se puede traduizir en biervos ?

Se puede dar a entender kon los jestos tambien
i el silensyo se bolta a ser un grito !
El silensyo en munchos lugares en los funerayes,
el silensyo de verguensa i de timides o kuando
duele el korason i no se puede ni yorar !
 
Kayarse para oyir, para mirar, kayarse por entender.
Kayarse por estar kayado ! Kayarse por entender ke
el silensyo es la maska de los sonidos los mas ermozos.

Menajar el silensyo es mas difisil ke menajar la avla !
 ( Clemenceau)

Sharope blanco....Kayandose
 

- Copyright © sefarad.org - 1997 - 2018

Retour au site sefarad.org -