Accueil - sefarad.org

El hombre - la mujer - el amor

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

EL HOMBRE - LA MUJER - EL AMOR
 

Keridos Amigos i mis Amigitas,

Todos a muestras edad tenemos una ideya de komo
es el hombre i komo es la mujer, dospues de tantos
anyos de vida, kon todo lo ke meldimos, vimos en
muestro doredor, seya en muestra famiya, seya kon
muestros amigos seya en los filmos i de lo ke la
gente mos kontaron.

Yo tambien tengo mi ideya kon mis 5 gramos de meoyo !
Ni se de ande se todo esto ! Arimo mi kolika i mi
nariz, golgo el ayre, miro a la siedra, miro a la
derecha, ago un largo miaaaaaaau i komprendo las
kozas a la Sharope !

Vos eskrivo aki mis empresyones i vos arrogo de
ekskuzarme si pensash ke me yerro... So pokita koza
por ansina de kestyones !

El Hombre ?


- Dale a komer kozas savrozas,
- Deshalo trankilo kon su pc i sus programes
en la TV.
- No le digas nada de negro por su famiya,
sus amigos i sus hobbis.
- Ten la kaza limpya i los chikos buen mirados,
- Ke nunka tenga en su tino ke sos una mujer
ke gasta muncho... Al kontraryo ! Mostrale los
groshes ke ekonomizas ma toma tu plazer para las
kozas ke kostan karo! El siempre va pensar
ke sos muy ekonomiyoza....
- Nunka keshate de lo ke te afito el diya, de
lo ke te endjida i te dezrepoza ! De toda
manera el puede solo komplikar ma no puede
ayudar !...Alora keshate a las paredas mizmo ma
no a el ! Ke te veyga siempre riyendo, alegre,
buen mirada, kon perfum i....seksi ! Ke no te
konoska enteramente ! Un poko de misteryo es
la sal i la pimyenta i, a parte de lo ke kale,
ke no te veyga muncho en tu entimitad kon ti
mizma !
- Tengas pasensya para oyir sus interminavles
avlas ke no te interesan del todo i demandarle
ke te eksplike mas ! 
- Kayarte kuando eksplika kozas a otros, mizmo
si topas ke esto no les plaze !
- Nunka dar una opinion ke saves no le va gustar !
- No tratar de meter tu naris en sus espasyos,
su komputadora, sus okupasyones.
- No mostrarle ke te selas ! I no azer NADA para
ke se sele...
- Ganar su konfiensya total sin mostrarle ke saves
mijor de el !

Solo kon estas rekomendasyones miyas puedesh ser
la mujer la mas horoza del mundo porke el se
va sintir rey al lado de vozotros ! I serash
su reyna para siempre !

La intelijensya para el es la mujer ke lo kudya
en la meza, no le krea problemes, le desha
espasyo de bivir sin kontraryar los ke ama,
es ekonomiyoza i save mostrarse atraktiva i
amoroza siempre i kuando kale !
La amistad viene kon los anyos DOSPUES !

Lo ke kijyera saver... Para kualo es nesesaryo
de tenerlo en kaza i ensima de la kavesa ?
De mas en mas el kazamiento se esta azyendo
una formalitad de la historya... Las mujeres
entendyeron, dospues de siglos ke los hombres
no se kontenten de UNA sola mujer i no ay de
azer eskova los kaveyos para un hombre ke va
kerer estar kon otra o I kon otra !!

Las mujeres tambien keren ser mas arregaladas
i amadas i el hombre en kaza no "tiene mas kavesa"
para esto ! Ademas si las mujeres se miran bueno,
guadran el puerpo de sus manseves i se topan
ermozas.. Keren ser amadas... Se tornan a otros
ke les azen sintir ke son dezeadas... Sovre todo
la libertad ekonomika trava la persona a ser
independiente i efasa las ovligasyones ke
se sintiyan antes anyos.

Porke ay tantos i tantos divorsyon en el mundo
de los mansevos ?
Porke el momento ke su fuye el amor entre
eyos no keda mas nada ke los detenga a kedar
endjuntos !
 

EL AMOR  (Poeziya en proza)

I.... el amor es un gitano pasionado
kon muncha fuersa i enerjiya,
kapache de destruyir mismo vidas !

ES una tempesta ke derroka todo
i un angelo en mizmo tiempo
ke logra todo lo mas ermozo,
lo mas savrozo,
lo mas kaptivante....

Transporta la persona a los pikos de las montanyas
para arezvalarlas dospues de boka abasho
kuando se asperan lo manko !
Este gitano ke es el amor,
te va ofreser la mas ermoza roza,
ke se va fanar en nada de tiempo,

i... el va kontinuar su kamino en su vida nomada...
Vas a guadrar la ermoza roza ke se seko...
solo por sus rekuerdos de los diyas ke era ermoza !
No la vas a ver muerta, kon lo poko de kolor ke le kedo
i su splendida golor ke ay tiempos, no le kedo !

Para ti sera la roza ke arresivites en tus manos
el primer diya ke el gitano te la dyo !
Gitano sin inteligensya, sin dinguna etika...
Gitano ke nunka se puede fiyar a el,
malgrado sus kantos i sus bayles
ke emborrachan las noches
de rios de vino, de kalor i de kolor de la flama.

sHaRoPe  bLaNcO

 

- Copyright © sefarad.org - 1997 - 2017

Retour au site sefarad.org -