Accueil - sefarad.org

Istikamet Han

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Istanbul - Galata   6  janvye 1950

ISTIKAMET HAN


Papi se fue a lavorar.  Mamita esta ande
Madam Beki, ariva, kon Klara i su madre
Madam Perla.  Fatma esta alimpyando la kaza
i me disho ke tiene muncho echo.  No va pueder
djugar kon mi.... Ya eskapi de koloriar todas
las figuras de mis livrikos de boyadar.
Ay uno ke me plazyo muncho, kon la prensesa
ke durmiya en el palasyo i el prens ke vino
kon su kavayo para espertarla kon un beso.

Tantine me regalo estos 24 kalemes/crayons de
boyadar  "Faber"  djusto a tiempo ! K'ermozura estos
kalemes... Los tomi en mis brasoz i me durmi
kon eyos.  Kale ke le diga a Papi ke me treyga
el mismo livro de boyadar kon la prensesa.
Esta noche se lo va dizir sin olvidarme i
ke me trayga tambien de estos dulses blankos
i kolorados ke azen para Purim ande Belifante.
En forma de gueyvo i de shaday kero !

Madam Beki tiene un bebe agora.  Se yama
Perlette. Es tanta chika ke no puedo djugar
kon eya.  Todos saviyan ke iva ser una ijika
por ke su madre se engodro ansina i se izo
feya kuando Perlette estava dayinda en su
tripa !  I mi mamita se izo feya kuando yo
estava en su tripa ? Nooooooo.
No es posivle porke yo la kero muncho bien
i eya es la mas ermoza del mundo !

Me vo ir ande Grasyela al treser etaj i
va ver si tiene ganas de djugar kon mi.
Mi kukla "Dilek" es amiga de la kukla de
Grasyela  "Dorit". Las banyamos i las
vistimos endjuntas. Eyos djugan en un
kanton i mozotros aparejamos a komer
kon papelikos ke kortamos komo fasulyas
i azemos koftes de lodo.  Dospues tomamos
muestras "ijas" i mos asuvimos a la terasa ande
el han entero enkolga el lavado.  Es una muy
grande terasa kon muncho sol i kuando no ay
lavado es un lugar maraviyozo para korrer i
djugar komo keremos.  Si ay lavado la djente se
estan keshando kuando djugamos. Dizen ke
estamos ensuzyando la ropa i la estamos echando
abasho.  No es verdad.  Yo nunka ago esto ma no
se kualo afita kuando Moiziko i Rafel djugan aya.
Grasyela i yo mos asentamos en un kantoniko
ensima de los tabures de rafya i mos burlamos
de Madam Kohen.  Mos kontamos lo ke vimos
kuando salimos kon muestras mamis,  todos muestros
 sekretos i ke vamos azer si Moiziko mos aferra en las
eskaleras ! 
 
Moiziko es el guerko ke abasho a este mundo !
Grasyela i yo mos espantamos de el i no  savemos
ande fuir kuando lo vemos.  El lugar el mas seguro
es estar kon los grandes endjuntos. Muestras mamis...
Porke mismo al lado de las mosas mos puede azer
miliun maldad !

Su mijor amigo es Rafael, el ijo de Madam Kohen
ke moran al kuatren etaj.  Moiziko mora al sinken i
kuando mos asuvimos a la terasa avremos los ojos
en ventikuatro para estar siguro ke no lo vamos a
enkuentrar supito i no mos va danyar.

Rafael es el mas grande de los chikos kon Anjel
ke ya tiyene 11 anyos.  Rafael tiyene 8 anyos
i esta en la segunda klasa de muestra eskola,
la Aliyans.  Esta es la eskola ande todos los
ijikos djudios se van. Ay i la Bene Berit tambien.
Tiyenen uniformas maron !  Ke komik !  Yo me vo
ir a la Aliyans i vo tener komo todos la prostela
preta i el kol blanko.  El Dio ke aga ke no seyamos
en la misma klasa kon Moiziko ! Empesaremos a la
eskola Grasyela el i yo a l'otro anyo.  Janet la
bova i Esterika tambien empesaran kon mozotros.
Yo ya se meldar i se eskrivir el nombre de todos
mis konosidos.  Se azer figuras de personas de
otobus del sol i munchas otras kozas.  Lo ke no
me plaze del todo es kuando granmami i mamita me
forsan a lavorar piyano !  De esto no kero saver
ma eyas son profesoras de piyano i me disheron ke
yo tambien sere profesora kuando me va engrandeser
ma yo kero ser doktor komo mi granpapi o lavandera
porke me plaze muncho djugar kon las aguas
enshavonadas... Kayintizikas... La ropa se arezvala
aryento del "tekne"  i las finyo para ke salga
todo lo suzyo i se agan blankas blankas. Ma es
difisil de esprimir.  No tengo muncha fuersa komo
Roza ke viene para azer el lavado.  De todo modo
Roza i todos en kaza se inyervan kuando kero
lavar i yo !   Mi echo es dar las trankas en la
mano de Roza kuando vamos a la terasa para enkolgar.
Un dia me apanyi la nariz kon una tranka, no se
deke i echi vardas de la dolor !  Eskularichas de
trankas eran para riir tambien !  Komo marido
sonyava de un dondurmadji  (ice cream seller) o
de un hombre polis o zabit (officer) pormodo ke
me tresaliya de sus uniformas i ke todos se
espantavan de eyos !  Mizmo Moiziko se iva fuyir
komo raton si me viya al lado de mi marido zabit !


Un dia Grasyela i yo apegimos la oreja a la
puerta de los Kohen porke saviyamos ke se estava
aparejando una muy grande boda por la sovrina Lili.
Todos estavan aya... Kantes...pransos... regalos
ma mozotros no pudiyamos entrar ! Mizmo Moiziko i
Rafael kon Andjel se ivan ido de kaza no se ande.
No saviyamos ken avlava ma sintimos todo !

- Asibiva madam Klara..Asentavos ayi, vaj estar
muncho mas konfortable. Kualo ke vos meta en el
tchini (plato)  Las borekitas estan muy savrozas.
Un poko de likorino ? Las salatas las ize yo !
Todo fresko de oy. Vos va dar de estas dolmayikas
chikitikas...Una lokura ! Es Korin ke las izo !
Dezmazalada peno tanto, No durmyo noche entera !
Ke vos kede lugar para los dulses....No me
digaj dospues ke no vos di haber ! (informer)

- Korin ! No me iva imajinar ke Lili teniya un
ashugar tan riko ! Ke ermozas kozas ke le izitej !
Mazaloza eya i su novyo ! Nunka vana tener de
menester de merkar manteles, tovajas,
"literie",(todo lo ke es menester para las kamas) bogos.
La lingerie ( chemises de nuit, kombinezones,
robes de chambre ets..) esta maraviyoza !
Ke gusto !
(munchos biervos en fransez proke estas kozas no se
uzavan en Sefarad kuando los djudyos yegaron al
Emperyo Ottomano i es la epoka kuando todos lo
djudios estavan tratando de avlar el fransez o el
franyol !)
Me enamori de las broderis. Kale ke
me mostres este punto del mantel krem !
Nunka vide este lavoro ! Ya saves... I mozotros
tenemos de aparejar ashugar. Mi ija es chika
dayinda ma el tiempo esta koryendo ! En nada
ya va tener edad de ser novya i ke mos ayege
el Dio de kazarla kon un manseviko komo lo
dezea muestro korason ! Pasame las filikas
por mundo tuyo ! No las alkanso ....EStan
por la otra parte de la meza ! Las izyeron kon
pasturma (komo salami ma de karne no tartikada)
i los sigaros son de berendjena.

- Ya lo saviya yo ke son ansina de djente !
No kaliya ke les disheras nada ! Selos !
Ansina es...No pueden suportar ke los otros
tengan bien i paz! El Dio ke les page !
Kuando te vaz a ir a Burgaz de muevo ?
Ya m'esta travanda la alma de ir kon ti !
Para boltar un poko ! Nada mas ! Ya me se
sikilo la alma d'estar en kaza kada diya.
Ke bueno iva ser si tomava un poko d'ayre
limpyo de las adas ! El otro diya las vizinas
se fueron todos endjuntos a komer al Bosfor !
Yo no puide pormodo de los chikos...Tiyenen
eskola i viyenen a kaza a midi. En la kaye
los iva deshar ? No es posivle ! No eskaparon
de kontar k'ermozo k'estava i el diya maraviya
ke pasaron endjuntos. Djugaron kunkamiko
(jeu de carte comme la canasta)
dospues de komer i se fueron al borekchi de
Sariyer a la tadre....


-  Atyooo ! Por lo ke les afito !  Oyites
esto ?  Ken lo puediya imajinar dospues de
tantos anyos de bolluk (abondance) i de
rikeza !  Dizen ke no le kedo ni grosh !
Es el echo del haver (associe) parese !
Te lo sorvyo sin ke se de kuenta kon kara
de buendad. Bensiyon teniya  una konfiyensiya
siega en el, se lo entrego todo i nunka
penso ke lo puediya kucheyar en la espalda !
Yo siempre digo ! No te vas a fiar en dinguno !
Su mujer ?  No me agas riir !  Lo esta
deshando... Dize ke lo meresyo ! Esta
resivyendo chaketon sovre chaketon !
Vaza dizir  "A mozos ke mos sale  ?"  si.
Tienes razon.  No es ke m'enteresa del todo !
Ma dime...No es pekado ?

-  Kuando ?  Kuando ?  I yo me kero ir al
banyo de novya ! Ya vide los takimes de banyo
(bathing stuff)  ke le metyeron en el ashugar !
Ke delgador de lavoros !  El tas
(un djarro komo un chini echo lo mas de kovre
en forma redonda i ondo de unos 5 santimetros
para echarse agua ensima de si en el hammam)
es de plata halis(veritable) !  Las takunyas (sabots)
enklavadas de sedef (nacre).  No se kere
dicho la maraviya ke estan las tovajas, los
tulbentes  (pedasos kare de ropa muy muy
delgada, brodado lo mas en los bodres para
meter lo ensima de la kavesa dospues del banyo)
i el bournous (vestimiyenta de ropa de tovaja
ke se mete ensima, dospues del banyo).
Vana yamar bayladeras i kantaderas al hammam
i el pranso no va ser manko de lo ke ves aki
oy ! Apareja las lirikas de oro hanumika !!!!
La vamos a kantar a la novya ! Guadrada de
nazar i de ojo malo ! Esta un lokumiko de
ijika.  Muy manseva....No se deke la dieron
tan presto !  Puediyan asperar a lo manko
fina los 18 anyos ! Disheron ke va morar kon
la suegra...Ya es buena persona ma ken save !
El chiko la kijo muy muy mucho disheron !
La esta tomando de baldes... Sin dota ni nada.
Si si...el ashugar por seguro, komo no !
Ya son rikos los onkles..Me parese ke le vana
dar una mano kuando va avrir su echo.
No te merikiyes ! Los jones (mansevos) de oy
no pizan en tavla rota ! Pensan a todo i no
es por esto ke keren manko a sus mujeres !
Todo djusto !  A mi ke me sale ?  Ma esta
bastante enteresante .... No ?

-  Kualo ? En vedra ?  Yo no lo oyi esto !
Ken te lo disho ?  Atyo !  Ke manziya !
Komo fue ke la desho !  Esto es.... Va kreyete
en los hombres !  El mijor al palo !
No ay de kreyer en eyos ! Ni en las mujeres
ma en eyos del todo !  I esta...savyendo todo
lo ke izo a las otras mujeres dayinda lo tomo ?
Komo no le kuadro ke a eya tambien la iva azer
sufrir i la iva deshar a la fin ! Esto es...
Ken derroka nunka tendra fin ... Ay Dio en
los sielos !  I a esta la va deshar...Ke te
paresyo !   No es muestro echo !  Ke vayan
i ke agan lo ke keren!  No mos interesa ma
kuryozo komo no supo lo ke le iva vinir en
la kavesa.... Vasa dizir: kualo peryo ?  Hehe...
El estimo de todos i su propriyo estimo ma
este modo de personas ni saven ke kere dizir
estimo ! Desha.....No vale la pena de avlar
de esto...Ke mos sale a mozotros !

--------


Grasyas a todos ke kijyeron ke eskriva
mis memoryas i estos tiempos bendichos
ke nunka puedremos olvidar.

Estas memoryas estan eskritas en el Espanyol
de Istanbul ke no troko , las ekspresyones
de lingua de kada dia, la vida i los
kostumbres,  komo las kreaturas i los mansevos
djudyos eran i biviyan en estos anyos.

Si avra personas ke se vana rekonoser en
estas memoryas les rogo de eskrivirme para
ke mos topemos de muevo.  Yo peryi a todos de
vista.

sharope blanko
 

- Copyright © sefarad.org - 1997 - 2017

Retour au site sefarad.org -