Accueil - sefarad.org

El hammam - El banyo turko

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

Keridos lektores mios

Me disheron ke mi eskrito " HAMMAM, El banyo Turko "
salyo esta semana en la revista  EL AMANESER publikada
kon el jurnal SHALOM  en Turkiya.  Este va ser mi d'alkavo
eskrito ke se publiko en esta revista en lakuala munchos
eskritos i poeziyas miyas fueron publikadas.  Les demandi
de no meter mas mis eskritos porke tenemos diferentes
maneras de lavorar i de ver i tratar las kozas ...

Kon esto, kije muncho ke este artikolo interesante aga
partido de mis eskritos en   SEFARAD.ORG   en estos
kantonikos ke Moise Rahmani metyo a mi dispozisyon
kon tanta grasya i nunka lo puedre reingrasyar bastante
para esto.   SEFARAD.ORG  es mi segunda kazika,
allado de  SEFARADIMUESTRO.

Vos prezento este artikolo ke kedara en estas kolonas
virtualas ma de grande valor para todos ke keren meldarlo
i toman plazer de lo ke eskrivo....

Karinyozamente

Sharope blanco

 

EL HAMMAM  -  El banyo turko


Tratando de eksplikar la sinyifikasyon del biervo keyf,
avli del " Hammam " ke es el banyo turko kolektivo kon
uzos sekularyos i dayinda muy popular en Turkiya, si no
mizmo komo lo era fina la mitad del siglo 20 !

El banyo turko/romano, son grandes salas  de marbro,
kayintadas por debasho del marbro, ande korren siempre
aguas kayintes i yeladas,  aryento de "kurnas" ke son
grandes paylas de marbro sin burako para ke la agua 
se vazye de  aryento.   Las aguas pueden solo debordar 
de las kurnas o ser vaziyadas kon un "tas"  ke es un jarro
komo un plato ondo, echo de  plata o de kovre lavorado,
i kon kualo se vazya la agua de la  kurna ensima de la
kavesa i del puerpo kuando se lava la persona.

Las tellakas - tellakos para los ombres - son las mujeres
ke se topan en el hammam para "akompanyar" las
senyoras a sus "kurnas", lavar i alimpyar el lugar antes
ke se asenten ensima de la estrada de marbro kayinte,
aparejarles "el kanton" kon los produktos ke vana uzar
durante el banyo, komo el penye, los shavones, las
kremas o olios del masaj, la "kese" kon kualo se frega
el puerpo antes de lavarse  "para kitar el kuero muerto
i suzyo ensima del kuero de la persona".  Dospues se
lava  kon la "shavonera" i para eskapar es el torno
del masaj super relaksante de una o dos ekspertas
en esto !

Las tellekas son ekspertas tambien para alimpyar el
puerpo en " desplumando " las  senyoras tambien i
okuparsen del  tratamiyento de los kaveyos ke se azen
komo seda dospues del hamam....

El keyf del hamam inkluiye las bevyentes yeladas i las
komidas ke se trayen aya.

El "banyo de novya" es partikularamente  un "keyf"
porke "la kantan" a la novya, las senyoras baylan kon
las  bayladeras ke se envitan para esta fiesta i pransos
enkreyivles se aparejan ensima de las lajas del hamam....
Las djoyas de las mujeres deznudas son un kontrasto ke
nunka se vana ir de delantre de mis ojos !

No kale olvidar de mensyonar tambien las "takunyas" ke
las mujeres tiyenen a sus piezes para kaminar ensima de
la laja kayinte i muy danjorozo porke se puede arezvalar
la persona en kaminando aya.

Las takunyas de los rikos i de las sarayliyas (del palasyo)
eran finamente lavoradas kon plata i oro mizmo i kon
piedras presyodas....

No kale olvidar ke el "hamam sefasi" =  el keyf del
hammam, (keyf = plazer, gozo)  era uno de los mas
grandes divertimiyentos de un tiempo.

Es en el hammam ke se eskojiya la novya por el ijo
regalado... Es aya ke " se kitava el rey para meter
el vezir",  ekspresyon para avlar de entrigas  danjorozas
i "dedikodu" = commerages  entre las mujeres ke
adoravan pasar el tiempo ansina !

Aviyan tambien las ke se "peleyavan" !!!
Peleyos entre las mujeres nunka mankavan, ademas
en esta sosyetad de envidya i muy seloza i ande la
ermozura fizika tomava el mas grande lugar kuando
se avlava del merito i de las kualitades de la mujer !

Las tellakas eran psikologas i saviyan "aferrar" el
punto flako de sus klientes en interpelandolas
" mi ermoza, mi miel, mi alma, " azyendo
komplimentos djustos o falsos (!) ensima de la
ermozura de la kara, de los kaveyos i del puerpo de
la senyora, de su grasya i de la dulsura de
lo ke le sale dela boka ! Por siguro ke
esta manera de komportamiyento teniya una
sola razon : El bahshish jenerozo de la senyora
a todas ke la serviyeron, la ayudaron tambiyen
a dezvistirse i vistirse en la kamareta rezervada
i privada de kada uno. Entre las kozas ke se
yevavan al hammam se topavan el "bournous"
echo de ropa de dimalo, godro, ancho, blando,
fina abasho i kon kakuleta (para tapar la kavesa)
por no yelarse dospues del banyo kayinte i
arepozarse en la "kamareta" de vistir, bevyendo
un chay o un kafe ... Las tovajas brodadas kon
pishkules, vistidos limpyos para trokar dospues
del banyo, fruta, sandviches, koftikas fritas yeladas,
borekitas, guevos kaminados.....I Kolonya para
sarpikarse para todo ! Inyervos, kanserya, ezmayoz,
dolor de kavesa, se kurava kon kolonya ! Para dolor
de estomago se vazyava la kolonya ensima de un
grande pedaso de algodon i se deteniva ensima del
estomago !  Dolor de kavesa lo mizmo.....Ademas
si aviya gente ke veniyan a vijitar en la "kamareta",
se les ofriya kolonya komo en kaza !  Para lavar las
manos dospues de las koftes, los sandviches i la
fruta la kolonya era muy importante tambien.

No ay de menester de dizir ke se iva al "hammam"
kon grandes  "validjas"/valise kon las kreaturas i las
serviyentas de la kaza i lo mas los Viyernes demanyana
dospues ke se alevantada muy demprano para aparejar
i kozer las komidas de Shabbat i todo lo ke se lavorava
en akel diya.  

El hammam sureyava (SUREYAR Verbo ke viene del
Turko kon la sinyifikasyon DURAR,TOMAR TIEMPO)
 4 - 5 horas todo inkluido !

Ayyyyyyyyyyyy ke diyas ermozos ke eran !

Mi dalkavo "keyf" en el hammam era en el inviyerno de
1995 kuando torni a Turkiya por entero...Noooooooo
En 2002 kuando la yevi a Hannah, mi amiga de Israel
ke vino a vijitarme i keriya absolutamente aver
eksperimentado este "keyf" por averlo oyido de mi
"no se kuando" !!!!   Esto segura ke nunka se lo va olvidar..
No se keriya ni kreyer ke aviya bivido esto...
Es vedra ke yo aviya serrado por mozotros el Hammam
de Galatasaray i todas las tellekkas  eran por Hanna,
una otra amiga miya i yo !   Mos  tanyaron, kantaron i
mos baylaron tambien.  Mismo por un diya es maraviyozo
de sintirse  "Sultana Otomana " kon todo lo ke komporta
esto ! Ve.....Sihaknu ota ad ha sof !
( I izimos todo lo ke kalliya para esto ! )

Me las yevi dospues a "Asitane" ke es un restaurant
"Ottomano" kon todas las komidas i las bevyentas,
 los "sherbetes"/sirops ke se aparejavan por los
sultanes otomanos,   en resipyentes asemejantes i
servidos de la misma manera.....Para los ke keren
saver ande es puedesh demandar al taxi de yevarvos
a " Kariye Muzesi " . Este retaurant se topa
immediatamente allado ...

Diyas de keyf ke tengash......

por Sharope blanco
 

- Copyright © sefarad.org - 1997 - 2017

Retour au site sefarad.org -