Accueil - sefarad.org

Yuksuk Kaldirim i la kula. EL kartye de los Judyos de Istanbul en los anyos 1920-1950

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

YUKSEK   KALDIRIM   I   LA   KULA
 

EL KARTYE DE LOS JUDYOS
DE ISTANBUL EN LOS ANYOS
1920 -  1950  
 
La epoka dospues de Haskoy-Balat
i antes de Taksim - Osmanbey- Sisli 
 
*

Shavua tov, semana buena a todos
kon salud, mazal briyozo i  luvya de estreyikas
(trayendovos todas estas kozas chikichikitikas
ke azen muestra felisitad i mos fasilitan la vida.
Ke sin eyos no tenemos mizmo savor de bivir ! )


Un haber de uno ke no sintimos de muncho tiempo,
un  regaliko ke mos plazyo, una koza ke dezeyavamos
i lo puedimos merkar por fin, una demanyana sin dolor
i keyf de bivir,  un kafiko ke se beve  kon una persona
ke mos agrada ser enjuntos, un ermozo livro ke mos
plaze meldar, fotos ke mos embiyan,  haberes buenos
de los chikos (mizmo si tienen 50 anyos !), un ermozo
filmo,  salir para  deskansar de ser siempre en kaza i
kaminar kon gana, tomar bilyetos para un teatro o un
konser, envitar (o ir ande) amigos,  enamorarse supito !
Ayyyyyyyyy k'ermozo !

i ansina una lista de kozas ke yo yamo luvya d'estreyas.

Oy avlaremos kon un poko de nostaljiya de Istanbul,
del tiempo ke los minoritaryos la  yamavan dayinda 
Constantinople  ! 

Los judyos moravan en  "Yuksek Kaldirim".  El nido,
el kartye de mi chikes i de serka de 50 000  judyos
ke bivyeron la primera mitad del sieglo 20 en
Istanbul.  Yo nasi en 1944  i me akodro ke mizmo
kuando mos movimos a Sisli  en el anyo 1951
dayinda le plaziya a mi madre de tomarme por la mano
i irmoz al kartye viejo para merkar lakerda i pishkados
ande David, merkar karne ande Jak Dalva, pasar por
el Desinator Saporta, trayer a kaza unos masapanes
de Moderno o Belifante, vijitar Grandmami, Tante
Esther o Tante Eujenie, vijitar el Oncle Leon,
su ermano o sus keridas amigas ke se estavan
preparandose a mover al muestro muevo kartye...

La Kula era el simbol impozante del tiempo ke los judyos
biviyan en Galata situada arriva de la kaleja de las
eskaleras.  Otr'una paralel a esta en la derecha es la
kaleja de las eskaleras de Kamondo i una antes paralela
es el Sair Ziya Pasha Yokushu, (si no me yerro !)  ande
se topava la eskola Aliyans, el kal i todo manera de botikas.
Kaji todas las kazas eran moradas por los judyos i una
vida muy koloryada arekayentava los korasones.  Sestos
se embiyavan kon kuedras a basho para ke los vendedores
metan sus ropas ke se merkavan de arriva, sin abashar !
(Yo dayinda lo ago en mi kazika !...Merko simit -begaleh-
patatas i sevoyas, a vezes frutas i domat ke vendedores
kon arabas de mano pasan i venden por las kayes...) 
Me akodra mi chikes i me siento horoza.  La sola koza ke
me manka muncho muncho, dospues de 40 anyos, dayinda
i dayinda es mi mamita....Ken save porke la peryi kuando
la teniya de menester lo mas...No me arti de eya.
I era una mujer muy espesyal, muy dulse, muy buena !
Si solo la teniya kon mi,  la iva aregalar sin fin !

 

Karinyozzzzzzzzzz

Sharop duls

- Copyright © sefarad.org - 1997 - 2017

Retour au site sefarad.org -