Accueil - sefarad.org

El tiempo ke pasa...

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;


EL TIEMPO KE PASA...

 

Keridos Amigos i mis Amigitas

Bokertov, Buenos diyas, Bonjour, Good Morning
Iyi sabahlar  SEFARAD.ORG  !

7.30  de la demanyana aki en Istanbul ande
avrimos los ojos a un diya oskuro kon ventos
i una luvya ke no supo kedar...
 
Ahhhhh  si solo puediya abrasar estas nuvlas
pretas, inchidas de la agua ke da vida i las
puediya embiyar ensima de la Kineret en la
GALIL  ande tengo mis 18 arvolikos al nombre
de mis keridos... Ke el Di-o les de fuersas i
ke engrandeskan i tengan munchos kreaturikas
i inyetizikos...

Oy  vamos a avlar del tiempo ke mos fuye de entre
los dedos..

Tengo dos ermozas poeziyas sovre este tema.
El   CARPE DIEM  ke ya embiyi i ke puedrash
topar entre  LOS ESKRITOS DE SAVOR DEL SHAROPE
BLANCO, en la Rubrika  "LAS PLUMAS DE KOLOR"
ande se topan todas las poeziyas miyas.

El segundo  "FALSA MANSEVES"  lo esto embiyando
oy i lo puedrash meldar en la mizma Rubrika.

Estas poeziyas son tan ermozas ke me digo
"  So yo ke eskrivi esto ?!!  "
No me gustan del todo las personas ke se azen
komplimentos de si para si !  Es tan feyo !  Ma esto
segura ke si los meldash me darash razon !
No las meldo komo mis ovras ma komo kantos i
versos eskritos por manos ajenas....

Avlando del tiempo ke pasa   :

Kada diya vos meten a vuestro kuento  86.400 Dollares.
Sosh libres de gastar esta moneda komo bien vos
parese.  Lo todo si keresh... Lo ke keda se echa...
Dingunos lo pueden uzar, nada se puede guadrar para
la amanyana....Kuando el diya pasa esta moneda no
vos apartenese mas... Al diya vos meten a vuestro
kuento el mizmo montante....

Ke pensash de esto ?  Maraviya no ?

Todos tenemos un kuento asemejado....
Si lo savesh o no.... Se yama  :  EL TIEMPO  !
Kada diya vos dan  86.400  segundos  a
vuestra dispozisyon.  Los puedesh uzar komo keresh.
Mo no puedesh nada emprestar del kuento de la
amanyana i no los puedesh guadrar para uzarlos
dospues.  Estos deven servir al mizmo diya i si
kedaron se echan al sierkol..... No egzisten mas....

Kale investir en buenos projektos para ke vos
traygan un buen intereso komo :  la salud, la
reushitad i la felisitad.  Kale gozar lo mas posivle
de vuestro kuento del diya ! Gastar kada uno de
estos segundos para ke se utilizen i no se echen
al sierkol.....

Por entender la valor de UN ANYO  kale demandar
esto a un elevo ke kedo en klasa akel anyo...

Por entender la valor de  UN MEZ  kale demandar
lo ke pensa una madre ke paryo un bebe prematurado...

Por entender la valor de UNA SEMANA  kale demandar
komo se organiza un editor ke deve kitar un jurnal
semanal...

Por entender la valor de UNA HORA kale demandar
komo se siente una novya el diya de su boda

Por entender la valor de UN MINUTO  kale toparse
en el peron del treno i ver las karas de las personas
ke vienen djusto de peryer el treno !

Por entender la valor de UN SEGUNDO kale pensar
al aksidente ke se pasa en un kuarto de segundo i
demandar lo ke pensa la persona ke se salvo i
esta bivyendo dayinda....


EL TIEMPO NO ASPERA...

"Ayer"  es historya.... "Amanyana"  no se save kualo
va afitar....  "OY"  es un regalo de lo Sielos !
Lo ke tenemos entre muestras manos... Bivir el segundo...


Kon muncho karinyo a vozotros todos

sHaRoPe bLaNkO
 
 
 

- Copyright © sefarad.org - 1997 - 2018

Retour au site sefarad.org -