Accueil - sefarad.org

En el treno de la Historia

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

EN EL TRENO DE LA HISTORIA
 
 
Tomado en partida  i kon la inspirasyon del
Dr. Guido Naisuls - Kiryat Bialik  en Israel
 
 
 
EN EL TRENO DE LA HISTORYA
Los djudyos sufriyeron en la historya largos i
dolorozos egzilyos, ekspulsyones, jenosidyos,
persekusyones, indjustas akuzasyones, konversyones
forsadas i asimilasyones ovligadas. Rezistyeron
komo puedyeron, nadando kontra el koryente,
eskondyendosen o luchando frente kon frente
tambien. Konsekuentamente se instalaron en
los kuatro puntos del mundo, avlaron diferentas
linguas i tuvyeron diferentes kolores de kuero.
Kon todo este multikulturalismo i kostumbres
importadas de las rejyenos ande los djudyos
bivyeron, vemos un judaismo multietniko i
pluralisto ma kon un gran destino komun.
 
Antes 70 anyos fuimos meresadores del empesijo
del ritorno a muestro ogar ansestral. La tierra
de Israel. De akel diya todo modo de djudyo fue
yamado para "tornar" a sus raises kon la famoza
Ley del Ritorno. Munchos sostenyeron a David Ben
Gorion i munchos no porke aviya rumores ke no todos
ke "tornaron" eran djudyos halaikamente.

El Ministro de Interior Meir SHitrit disho ke iva
modifiar la Ley del Ritorno i iva azer todo su
posivle para evitar ke non-djudyos puedan
aprovecharsen de esta Ley i ser sivdadinos de
Israel. Se refero a la emigrasyon de miembros de la
komunita djudiya de la Etyopya ke no puediyeron
dayinda yegar, de las tribus perdidas i anusim i
disho "SOn todos Kistyanos i no los nesesitamos,
tenemos de pensar al futuro de Israel i esta
"Aliya"kale ke eskape" El artiklo estuvo eskrito
en JERUSALEM POST kon los biervos del Ministro
del Interior ke adjusto a sus palavras ke
los "Falash Mura" teniyan ansestros djudyos i
ke todos fueron ovligados a konvertirsen des del
final del siglo 19. El eskritor de este artikolo
pensa ke esto es un intento a DETENER EL TRENO
DE LA HISTORYA I AZER DESENDER A MUNCHOS
PARA KONTINUAR KON UNA MINORITAD
SELEKSIYONADA.
 
Dr. Naisuls deklara ke dingunos, ni muestros
enimigos ni los politikos de korta vizyon, vana pueder
ir kontra la historya i pueder empidir la entrada en
Israel de sus ijos ke son los otentikos proprietaryos
de ISrael, los Anusim , ijos de djudios ke fueron
persekutados kon jenosidyos i leyes de asimilasyon.

Dize ke eyos mas ke todos tienen el derrito de KEDAR
EN ESTE TRENO I VIAJAR HASTA EL FINAL DE
LA HISTORYA.
 
Los pasajeros son los ANUSIM ke kere dizir "forsados"
en Hebreo. Djudyos ke kontra sus voluntades fueron
forsados a trokar de relijyon. Unos 60 Miliones de
personas biven en la Amerika Latina i son los ijos de
estos primeros djudyos sekretos, akeyos ke vinyeron
bushkando paz para pueder sobrebivir i kontinuar kon
sus relijyones i tradisyons djudiyas, estos miliones
de sus desendiyentes ke fueron kondanados a no saver
sus verdaderos raises i identitas.....No es posivle
de dar chifros de los Anusim en Espanya porke sigen a
eskondersen en todas las partes, en los 52 provinsyas
Espanyolas, este payis dayinda muy antisemito.
Los ijos de Menashe biven en el Nord-Este de la
India i son 1 milyon de personas kaji ke forman
una de los 10 tribus perdidas. Moran en Mizoram i
Manipur, son konsiderados en Israel ke Bnei Menashe
i es una tribu de 750.000 - 1.200 000 personas.
Solo unos 6000-7000 son por el momento djudyos. El
resto se konvertyo al Kistyanizmo kon la vinida de
los Inglezes a la rejyon.

Los djudyos de Uganda.... La Konunidad Abayudaya.
(El pueblo de LEhuda) Biven en las montanyas i en
las vales Ugandezas, Unos 500 negros ke pratikan
el djudaismo des de jenerasyones i jenerasyones
en sus sinagogas. Biven en 4 puevlos en el
doredor de la sivdad de Mbale.
 
Los djudyos Lemba....Son unos 40 000 Sudafrikanos
ke se konsideran desendiyentes de los Falaches.
Guadran el Brit Mila, un diya de deskanso en la
semana. No komen puerko. hipopotamo estos faktos
konsiderados de sus partes komo una parte de sus
erensyas djudiyas. Un ekipo de siantifistos ke
se okupan de genetika izyeron estudyos sovre
los hombres i toparon ke un porsentaje anormalo
tienen en sus ADN (DNA) los genes distinktivos
de los Cohanim, los saserdotes judyos konsiderados
ke los desendiyentes de Aaron. Ahmadiel be lehuda
afirma ke los esklavos kantavan baladas de Sion
i del rio Yarden. lo ke prueva ke son desendyentes
Hebraikas.
 
Sientos de famiyas Kolombianas desidyeron de ser
djudyos sin tener raises djudiyas o historikos,
kondisyon absolutamente nesesarya para ser yamado
djudyo. Son personas ke teniyan otras relijyones
ma ke keren ser djudyosd i bivir en Israel,
la Tierra Prometida.

La tribu Telugu en el sud de Nigerya.
Se konvertyeron al Kristianismo en el empesijo del
siglo 19. 50 Famiyas empesaron a estudiar el
Judaismo en 1981 . Son 400 famiyas hoy en diya.
Dizen ke vinyeron del Maroko i son los desendyentes
de la tribu de Ephraim.

40 Milyones de personas apartenyendo a la tribu
Pashtun en Pakistan i Afganistan. Son musulmanos
ma tienen kjostumbres similaryos a los djudyos.
No azen nada en Shabat, asyenden kandelas los
Viernes, uzan una koza ke asemeja al talleth,
arrogan en direksyon de Yerushalayim i no se
kortan los kaveyos de dos partes de la kara.
 
 
La kestyon es si tenemos derrito de AZERLOS
ABASHOR DEL TRENO DE LA HISTORYA DJUDIYA,
EYOS SIYENDO LEJITIMOS EREDEROS I NO DESHARLOS
FORMAR PARTE DEL GRANDE ENKUENTRO DE LA
DIASPORA. LES DIZEREMOS " BIEN VINIDOS A KAZA " ?
 
 
Sharope blanco

- Copyright © sefarad.org - 1997 - 2017

Retour au site sefarad.org -