Accueil - sefarad.org

Los kazamenteros de al tiempo

    MENU    

SEFARAD.org
ESKRITOS de savor
RESHETAS
AIDEZ-nous
Page PRECEDENTE;

LOS KAZAMENTEROS DE AL TIEMPO
 
Antes kuaji dos semanas era el diya de
los Namorados.. El Santo Valentin  o
la Santa Valentine  para los goyim !
Ya saven fiestar esta gente...  Kada
santo i santa es una fiesta i fiestar
es regalos, es fostanes, ermozura...
Yo me namoro !
 
Al tiempo fiestavan las bodas !   Los judyos
aziyan, i dayinde azen, bodas alavadas
kon todo briyando, luxuozo i muy elegante.
Solo ke era de uzo de kazarse kon el ayudo
de los shadhanes, los kazamenteros i las
kazamenteras  ke saviyan fina la kolor de
las bragas de los mansevos  !!!!  En ke famiya
ay manseva, en ke famiya ay mansevos, ke
kadar de dota tienen, ke les plaze komer,
kualo meldan, kualo oyen, komo se inyervan
i si son dulses o no, lo saviyan komo sus
nombres.  Kaminavan kon un chadir en la
mano i se les aziya muncha honor kuando
viniyan a vijitar una kaza.  
 
A vezes eran los parientes solo ke prokuravan
de lograr novyos o novyas para sus kreaturas.
Esto se pasava sovre todo en las famiyas
no tanto rikas ma no olvidar lo intelijente ke
eran los judyos. .. Puediyan lograr el mijor
partido del mundo  !   Komo un egzemplo vos
vo kontar komo el padre de un mansevo
logra la mano de la ija de Bill Gates para su
ijo regalado !
 
 
*
Un padre tomo su ijo en frente i le
disho ke ya era tiempo de kazarse por el.
 
El ijo le respondyo :
 
- Si ! Ma yo kero la ija de Bill Gates !
i para pueder kazarme kon eya devo ser
"a la hauteur" !  (De su rango, ke le
pueda dar todo a lo kualo es auzada...)
 
El padre penso penso i le disho a su ijo
- No te merikiyes !  Yo vo azer este echo !
 
Dezmazalado del padre se fue ande Bill GAtes
vistido shoronfonfon kon un ermozo after-shave,
kalsados briyando i kaveyos kon briyantin !
(agora se dize mousse/foam o gel !)
 
-  Senyor Gates... Mi ijo se namoro de tu ija
i kon nombre del Di-o te la demando para el !
 
-  Mi ija ?  Ma no pensamos darla dayinda
Senyor.  Esta estudyando i tiyene tiempo..
 
-  Oh !  No embarasa... Puede kontinuar kuanto
kere.   Mi ijo es riko i muy poderozo. Le
puede dar todo el tiempo ke kere.
 
-  Ah si ?  Ken es el ?
 
-  Es el Vice-Manager de la Banka Mundial !
 
-  Deke no lo saviya yo !  Mil ekskuzas Senyor.
En este kavzo lo akseptamos komo muestro
yerno.  Esta noche mizmo le avlare a mi ija
i le puedesh dizir a vuestro ijo ke este echo
se izo !
 
El padre se bolto a kaza i vido su ijo la kavesa
entre sus manos !  Pensando, angustyado !
 
-  Tengo novisyas maraviyozos ijo !  Este echo
se izo !  Gates aksepto de darte su ija !
 
-  Eh ?  No es posivle papa !  El ni entra por
muestra kaleja !  Ke le kontates ?
 
-  Le dishe ke sos el Vice-Manager de la Banka
Mundial !
 
-  Hahahahahahh ! Papa lo bolates ?  Yo ?
Komo ?  No eskapi ni mizmo mis estudyos !
 
-  Lo se ma sos el Vice-Manager de la Banka !
El mansevo se fue a su kamareta la kara preta !

A la demanyana vemos el musyo vistido kon los
mizmos vistidos sharonfonfon, los kalsados
briyando i los kaveyos briyantinados en la
sala de asperar del Prezidente de la Banka
Mundial !  La sekretarya no kere desharlo
entrar !  El refuza de irse i kere avlar
kon el Prezidente absolutamente !

A la fin entra de fuersa se asenta i le dize
kalmamente ke tiene un ijo maraviyozo i ke
dezea por el, el puesto de Vice-Manager en
la banka ! 
 
 El Prezidente no save komo azer para ke el
hombre se alevante i se  vayga de la kamareta ! 
Le avla de aki de aya, de kuanto es difisil de
vinir a este puesto,  ke no tienen de menester
agora ets... La  konversasyon no eskapa ! 
 
A la fin muesro musyo le dize  :
 
-  Te entyendo ma sos tu ke no me entyendes !
Ke lo vo dizir yo agora a Billy ?  Si si !
Bill Gates.  Somos kosuegros !  Mi ijo se
kaza en unos kuantos diyas kon su ija...
Ke no lo keritesh en la banka ?   Va ser
furyuzo i  va retirar sus kuentos !  Vine
mas por vozotros ke para mi ijo !  So muy
nasyonalisto i ves... Me aze pena !
 
-  Ay Senyor !  Deke no me lo dizes de
kuantas horas ke avlamos !  Te di pena
por nada i sin saver ke estava azyendo
yo mizmo una grande error !  Dile a tu
ijo ke venga a lavorar amanyana demanyana
mizmo !

*
 
Penso ke ansina de manipulasyon es de la
honor de los shadhanes de un tiempo !

Kada ofisyo tiene sus finesas.....
 
 
Sharope blanco

- Copyright © sefarad.org - 1997 - 2018

Retour au site sefarad.org -